اقتصادی رابطہ کمیٹی دا اجلاس، حکومت بلوچستان کوں ریکوڈیک منصوبہ توں 6 سال اچ 71 کروڑ 70 لکھ ڈالر دی مجموعی فنڈنگ ݙیوں دا عزم

اسلام آباد . اقتصادی رابطہ کمیٹی حکومت بلوچستان کوں ریکوڈیک منصوبہ توں 6 سال اچ 71 کروڑ 70 لکھ ڈالر دی مجموعی فنڈنگ دا عزم کیتے۔ ای سی سی دا اجلاس وزیرخزانہ سینیٹر اسحاق ڈار دی اڳواݨی اچ زوم تے تھیا جیندے اچ وفاقی وزیر بجلی خرم دستگیر خان، وفاقی وزیر تجارت سید نوید قمر، وزیر مملکت برائے پٹرولیم مصدق ملک، وزیرمملکت برائے خزانہ ڈاکٹر عائشہ غوث پاشا، وزیراعظم دے معاون خصوصی برائے ریونیو طارق محمود پاشا، وفاقی سیکرٹریز، چیئرمین ایف بی آر اتے ٻئے اعلیٰ حکام شریک ہن۔ کمیٹی ریکو ڈیک منصوبے بارے ݙو اہم امور دی منظوری ݙتی جیندے بعد ریکوڈیک منصوبے کوں تیکھے شروع کرݨ اچ مدد ملسی۔ وزارت توانائی ریکوڈیک منصوبہ بارے جھیڑے مکاوݨ کیتے ایسکرو اکائونٹ دے پیسے تے کٹھا تھیوݨ آلے سود بارے سمری پیش کیتی۔ معاملے تے تصفیے کیتے ای سی سی وزارت خزانہ کوں جی ایچ پی ایل، او جی ڈی سی ایل اتے پی پی ایل کوں سود دی مجموعی رقم ݙو کروڑ27 لکھ 18 ہزار 173 ڈالر جمع کراوݨ دی اجازت ݙتی اتے حکومت بلوچستان دے شیئر کیتے وزارت خزانہ کوں 85 لکھ 19 ہزار 314 ڈالر دے قابل ادائیگی سود دا بندوبست کرݨ دا وی آکھیا۔ جی ایچ پی ایل حکومت پاکستان دی گارنٹی نال 65 ارب روپے پہلے ہی کٹھے کیتن۔ ای سی سی حکومت پاکستان اتے متعلقہ ڈویژناں کوں اینڄھے کم کرݨ دی اجازت ݙتی جو ایس او ایز ولوں ایسکرو اکائونٹ اچ جمع کردہ سود دی رقم ریکوڈیک مائننگ کمپنی لمیٹڈ دے حصص ڳھنݨ کیتے ڳݨیڄے۔ ای سی سی ریکو ڈیک منصوبہ اچ حکومت بلوچستان دے حصہ کیتے وفاقی حکومت دے فنڈنگ پلان بارے سمری نال وزارت خزانہ دی تجویز منظور کیتی جیندے نال وفاقی حکومت ولوں ایس پی وی پراجیکٹ کیپٹل کمٹمنٹ دے تحت 6 سال اچ صوبائی حکومت کوں 71 کروڑ 70 لکھ ڈالر دی مجموعی فنڈنگ کیتی ویسی۔