صدارتی نظام دی کوئی ڳالھ اے نہ کوئی ان ہائوس تبدیلی تھیوݨی اے، جنوبی پنجاب صؤبہ ٻݨاوݨ کیتے قومی اسمبلی اچ بل پیش کریسوں، مخدوم شاہ محمودقریشی

ملتان۔22جنوری(اے پی پی)وزیرخارجہ مخدوم شاہ محمودقریشی آکھیے جو ملک اچ صدارتی نظام دیاں ڳالھیں افواہ ہین، وزیراعظم عمران خان اپݨی آئینی مدت پوری کریسن اتے ان ہاؤس تبدیلی دیکوئی ڳالھ کائنی، جنوبی پنجاب صوبے کیتے پی ٹی آئی خلوص نال کم کریندی پئی اے، ایندے کیتے آئینی لوڑھ پوری کرݨ لو اپوزیشن ہتھ ونݙاوے جیندے کیتے مسلم لیگ(ن) اتے پیپلزپارٹی کوں خط لکھ ݙتن، دشمن عناصر دیاں سازشاں مٹی اچ ملیسوں۔ اے ڳالھ انہاں ملتان اچ میڈیا نال الیندے آکھی۔ انہاں آکھیا جو اوکھ دے باوجود حکومت عوام اتے دوست ملکاں دے ونݙارے نال معاشی اوکھ تے قابو پاوݨ کیتے کم کریندی پئی اے، لوکاں کوں مہانڳ توں کݙھݨ اتے معاشی بحالی کیتے پر امید ہیں، ایں سانڳے عالمی اداریاں دا اعتماد حوصلہ افزا اے۔ انہاں آکھیا جو ن لیگ دے دور اچ شرح نمو 5 فیصد ہئی ڄیڑھی ورلڈ بینک دے سروے دے بعد ہݨ 5.37 تئیں پڄ ویسی، فی کس آمدن 547 ڈالر توں 1666 ڈالر تئیں پڄ ڳئی اے۔ وزیرخارجہ آکھیا جو ساݙی فوج، پولیس اتے ٻئے قاٰنون نافذ کرݨ آلے اداریاں دہشت گردی دا اڳیں آلی کار ݙٹ تے مقابلہ کریسن۔ انہاں آکھیا جو پاکستان تحریک انصاف 27 فروری کوں پنجاب توں سندھ دو مارچ کریسی۔ پیپلزپارٹی وی سندھ توں 27 فروری کوں مارچ کریسی تاں امید اے جو انہاں نال رستے اچ ملسوں۔ جنوبی پنجاب صوبہ ٻݨاوݨ کیتے انہاں آکھیا جو ݙوترہائی اکثریت کیتے اپوزیشن نال تھیوے، ساݙی حکومت جنوبی پنجاب دے عوام نال صوبے دا وعدہ کیتے، ایں سانڳے بہاولپور اتے ملتان اچ سیکرٹریٹ شروع تھیندے پن، جنوبی پنجاب صوبے کتیے قومی اسمبلی اچ بل پیش کریسوں، عوام ݙیکھ ڳھنسن جو کیہڑی جماعت صوبے کیتے مخلص اے۔