اقتصادی رابطہ کمیٹی دا اجلاس، کݨک ڳھنݨ دا ملھ 3 ہزار 9 سو روپے مقرر

اسلام آباد۔8مارچ(اے پی پی)اقتصادی رابطہ کمیٹی فی مݨ کݨک دا ملھ 39 سو روپے مقرر کریندے عالمی اسکواش چیمپئن جان شیر خان دے علاج کیتے ہک کروڑ روپے دی منظوری ݙتی اے۔ ای سی سی اجلاس دی اڳواݨی وزیر خزانہ اسحاق ڈار کیتی۔ اجلاس اچ وفاقی وزیر بجلی خرم دستگیر خان، وفاقی وزیر صنعت و پیداوار سید مرتضیٰ محمود، وفاقی وزیر تجارت سید نوید قمر، وزیر مملکت پٹرولیم مصدق ملک، شاہد خاقان عباسی، معاون خصوصی خزانہ طارق باجوہ، معاون خصوصی محصولات طارق محمود پاشا، معاون خصوصی حکومتی افادیت ڈاکٹر محمد جہانزیب خان، چیئرمین ایس ای سی پی، ایم ڈی پاسکو، وفاقی سیکرٹریز اتے ٻعے سینئر افسران شرکت کیتی۔ ای سی سی بین الصوبائی رابطہ دی وزارت دی سمری تے غور کیتا اتے تکنیکی ضمنی گرانٹ ݙتی۔ وزارت قومی غذائی تحفظ اتے تحقیق سال 2023 کیتے پاسکو دے کݨک ملھ ڳھنݨ دے اہداف سانڳے سمری پیش کیتی اتے ملک اچ کݨک دی دستیابی تے بریفنگ ݙتی۔ پنجاب، سندھ، خیبرپختونخوا اتے بلوچستان پاسکو دے سٹاک توں کݨک دی وادھو مانگ، کیری فارورڈ سٹاک دی ڳھٹو ڳھٹ سطح اتے مقامی کݨک دی منڈی اچ ملھ دے مروجہ طریقہ کار سانڳے ای سی سی وزارت نیشنل فوڈ سکیورٹی اینڈ ریسرچ دی سفارشات منظور کر ڳھدن، کݨک ڳھنݨ دا ہدف 1.80 ایم ایم ٹی، ملھ 3,900 روپے فی مݨ کر ݙتے۔ ای سی سی وزارت نیشنل فوڈ سکیورٹی اینڈ ریسرچ کوں ہدایت کیتی جو ملک اچ کݨک دے مناسب استعمال، کݨک دے ذخیرہ دے طریقہ کار/ سائلوز دے جائزے کیتے کمیٹی ٻݨاوے اتے 15 ݙینھ اچ رپورٹ ای سی سی کوں ݙیوے۔