عسکری قیادت دا اہم اجلاس؛ دفاعی تیاریاں تے اطمینان، ملک کوں درپیش ہر خطرے دا تکڑا ولدا ݙیوݨ دا عزم
راولپنڈی۔22 جولائی(اے پی پی)عسکری قیادت دفاعی تیاریاں تے اطمینان کریندے ہر خطرے دا تکڑا ولدا ݙیوݨ دا عزم دوہرائے۔ پاک فوج دے شعبہ تعلقات عامہ (آئی ایس پی آر) دے بیان موجب دفاعی و سلامتی بارے چیئرمین جوائنٹ چیفس آف سٹاف کمیٹی اتے سارے سروس چیفس دا اجلاس جوائنٹ اسٹاف ہیڈ کوارٹرز اچ تھئے۔ اجلاس دی اڳواݨی چیئرمین جوائنٹ چیفس آف سٹاف کمیٹی جنرل ندیم رضا کیتی۔ اجلاس اچ آرمی چیف جنرل قمر جاوید باجوہ، چیف آف نیول سٹاف ایڈمرل امجد خان نیازی اتے ایئرچیف مارشل ظہیر احمد بابر سدھو شرکت کیتی۔ اجلاس کوں مغربی سرحد، خیبرپختونخوا اتے بلوچستان بارے قومی سلامتی دی صورتحال دا جائزہ ڳھنݨ تے تفصیلی بریفنگ ݙتی گئی ڄݙاں جو اسٹریٹجک اتے روایتی پالیسیاں دے دائرے اچ تیز رفتار پیشرفت، خطے اچ پائیدار ترقی کیتے افغانستان اچ امن دی اہمیت اتے مسلح افواج دی آپریشنل تیاریاں تے وی الایا۔ اجلاس دے شرکا مسلح افواج دے سارے خطریاں دا تکڑا ولدا ݙیوݨ دا عزم کیتے۔
