پاکستان دے عام انتخابات پرامن طریقے نال تھئن ، اساں ایں تے پاکستان کوں مبارخ ݙیندوں ، چینی وزارت خارجہ

بیجنگ۔19فروری  (اے پی پی):چین  دی  وزار ت خارجہ دی  ترجمان ماؤ نینگ آکھیے جو پاکستان دے عام انتخابات عمومی طور تے ، پرامن طریقے نال تھئن اساں ایندے تے پاکستانی حکومت کوں مبارخ ݙیندوں ۔ پریس کانفرنس اچ انہاں آکھیے جو ھک دوست ہمسایہ ملک دے طور تے چین ، پاکستانی عوام دے انتخاب دا مکمل احترام کریندے تے پوری امید کریندے جو پاکستان اچ ساریاں سیاسی جماعتاں انتخابات دے بعد سیاسی اتحاد اتے سماجی استحکام دا سانجھا تحفظ کریسن تے قوم دی  ترقی  تے مستقبل سانڳے رل تے کم کریسن ۔ ماؤ نینگ آکھیے جو چین اتے پاکستان چارے موسماں دے تزویراتی شراکت دار ہن۔  انہاں آکھیے جو چین ،روایتی دوستی کوں جاری رکھݨ ، مختلف شعبیں اچ عملی تعاون کوں مزید ودھاوݨ ، نویں عہد اچ مزید قربت دے نال چین پاکستان ہم نصیب معاشرے  دی تعمیر کوں تکھا کرݨ سانڳے پاکستان نال کم کرݨ دا منتظر اے تاں جو چنڳے طریقے نال ݙوہیں ملکاں دے عوام کوں فیدہ پڄ سڳے۔