منسک۔12اپریل(اے پی پی) وزیراعظم محمد شہباز شریف بیلاروس دے دارالحکومت منسک دے نیڑے مائننگ ڈمپ ٹرکاں، تعمیراتی و کان کنی دی ہیوی مشینری اتے گاݙیاں تیار کرݨ آلی فیکٹری ” بیلاز” دا دورہ کیتے۔انہاں تعمیر و ترقی اچ معاون عالمی فیکٹری دی مصنوعات اچ دلچسپی گھندے دورہ کوں بہوں متاثر کن اتے فیکٹری کوں ھک عظیم منصوبہ قرارݙتا ۔ انہاں آکھیے پاکستان کوں اعلیٰ معیار دی ہیوی مشینری اتے مصنوعات درکار ہن۔
انہاں بیلاروس دے وزیراعظم کوں دورہ پاکستان دی دعوت ݙیندے آکھیے رل ٻہہ تے سانجھے منصوبیں تے فیکٹری دی مصنوعات اتے سازوسامان تے ڳالھ مہاڑ کریسوں ۔ ایندے توں پہلے بیلا روس دے وزیراعظم الیگزینڈر تورچن بیلاز آوݨ تے وزیراعظم پاکستان دا استقبال کیتا۔ وزیراعظم کوں فیکٹری دا تفصیلی دورہ کرایا ڳئے تے بریفنگ ݙتی ڳئی ۔بریفنگ اچ وزیراعظم کوں ݙسایا ڳئے جو اے فیکٹری 1948 اچ بݨائی ڳئی ہئی تے اتھاں کان کنی اچ استعمال تھیوݨ آلے آلات تیار کیتے ویندن جݙاں جو1951 اچ اتھاں گاݙیاں دا ٻیا سامان تیار کرݨ دا آغاز کیتا ڳئے۔ وزیراعظم محمد شہباز شریف کوں بیلاز فیکٹری دی ورکنگ اتے مصنوعات دی تیاری تے بریفنگ اچ ݙسایا ڳئے 1958 اچ 25 ٹن دی استعداد دے حامل ٹرکاں دی پیداوار دا آغاز تھیا جݙاں جو 1961 اچ زیادہ وزن چاوݨ آلے ڈمپ ٹرکس دی پیداوار شروع کیتی ڳئی ۔ وزیراعظم فیکٹری اچ تیار کیتی ونڄݨ آلی ہیوی مشینری اتے ٻئے سامان تے آلات اچ دلچسپی ڳھدی تے ایں حوالے نال مختلف سوال وی کیتے ۔
بریفنگ اچ ݙسایا ڳئے 1961 توں بیلاز اچ ٹرک وی تیار کیتے ویندے پئن جنہاں اچ الیکٹرک ٹرک اتے ہائی برڈ ڈمپ ٹرک وی شامل ہن۔ الیکٹرک ڈمپ اتے بیٹری نال چلݨ آلے ٹرک 490 ٹن تئیں وزن چاوݨ دی صلاحیت رکھیندن ۔ ہیوی ڈمپ ٹرکس تیار کرݨ آلے یونٹ اچ وزیراعظم کوں کانکنی اتے کوئری مشینری و ٹرکس تے وی بریفنگ ݙتی ڳئی ۔
وزیراعظم محمد شہباز شریف کوئری مشینری اچ دلچسپی ڳھدی تے گاݙیاں دی تیاری اچ استعمال تھیوݨ آضے آلات دا پچھیے جئیں تے انہاں کوں ݙسیا ڳئے جو ہیوی گاݙیاں دی تیاری اچ استعمال تھیوݨ آلے پرزہ جات مقامی طورتے تیار کیتے ویندن تاں جو کجھ انجݨ درآمد کیتے ویندن جݙاں جو ٹائر وی بیلا روس اچ ہی تیار تھیندن۔ انہاں آکھیے پاکستان کانکنی اتے کوئری اچ استعمال تھیوݨ آلی مشینری اتے وݙے ٹرکس توں پیداواری فیدے گھن سڳدے ۔
وزیراعظم کوں ݙسایا ڳئے فیکٹری اچ تیار کیتی ونڄݨ آلی مصنوعات تے مشینری پاکستان کوں وی ݙتی ویندی اے جݙاں جو بیلاز فیکٹری دی تیار کیتی ڳئی مشینری اتے ٻئی مصنوعات گزریل سال 22 مختلف ملکاں کوں برآمد کیتی ڳئی ۔ وزیراعظم دے سوال تے ݙسایا ڳئے کان کنی تے کوئری اچ استعمال تھیوݨ آلے ہیوی ڈمپ ٹرکس فیکٹری اچ تیار کیتے ویندے پئن ۔وزیراعظم محمد شہبازشریف الیکٹرک بس اچ سوار تھی تے فیکٹری دی مختلف جہیں دا دورہ کیتے ۔ بریفنگ اچ وزیراعظم فیکٹری دے مختلف شعبیں دے دورے تے انجینئرز نال روسی زبان اچ سوال تے ڳالھ مہاڑ وی کیتی ۔
دورہ بیلاز دے مکݨ تے ڳالھ کریندے وزیراعظم آکھیے بیلاز اچ تیار کیتی ونڄݨ آلی مشینری و آلات پاکستان اچ وی پیدواری مقصد سانڳے استعمال کیتے ونڄ سڳدن ۔ انہاں بیلا روس دے وزیراعظم کوں دعوت ݙتی جو ایں حوالے نال اعلیٰ سطح دا وفد پاکستان دا دورہ کرے تاں جو ایں حوالے نال تفصیلی ڳالھ مہاڑ کیتی ونڄ سڳے ۔ انہاں آکھیے اساکوں فیکٹری مصنوعات تے تفصیلی ڳالھ مہاڑ دی لوڑھ اے تاں جو سانجھے تعاون بشمول جوائنٹ وینچرز تے لائحہ عمل تیار کیتا ونڄ سڳے ۔ انہاں آکھیے اساکوں اعلیٰ معیاردی مصنوعات درکار ہوسن ۔ تے اے میݙا دورہ ٻہوں کامیاب رہیے بیلاز فیکٹری دے دورے دے بغیر میݙا دورہ بیلاروس نامکمل تھیندا ۔
انہاں مہمان نوازی تے بیلا روس دے صدر نال اظہار تشکر وی کیتے تے آکھیے آپݨے آندے دورے دے موقع تے میں بیلاز پلانٹ دا تفصیلی دورہ کرݨ چاہساں ۔ انہاں آکھیے اساں پاکستان اچ وی ایں طرح داپلانٹ لاوݨ چاہسوں ۔وزیراعظم محمد شہباز شریف بیلا روس دے وزیراعظم الیگزینڈر تورچن کوں باقاعدہ دورہ پاکستان دی دعوت ݙتی جئیں تے بیلا روس دے وزیراعظم آکھیے پاکستان دا دورہ کرݨ میں سانڳے باعث اعزاز ہوسی تے پاکستان دا دورہ کرتے میکوں خوشی تھیسی ۔
وزیراعظم محمد شہباز شریف پاکستانی حکام کوں ہدایت کیتی جو ایں دورے اچ جیڑھے معاملات طے کیتے ڳئن انہاں تے عمل درآمد تھیوݨا چاہیدے ۔ بیلاز دے دورہ دے موقع تے نائب وزیراعظم اسحاق ڈار اتے وفاقی وزرا عطا اللہ تارڑ ، جام کمال خان اتے عبدالعلیم خان وی وزیراعظم کدے رلے ہن۔
Leave a Reply