دہشتگرداں اتے انہان دے سہولت کاراں دی ملک اچ کوئی ڄاہ کائنی

کاکول ۔۔29اپریل(اے پی پی):آرمی چیف جنرل سید عاصم منیر آکھیے جو دہشتگرداں اتے انہان دے سہولت کاراں دی ملک اچ کوئی ڄاہ کائنی، امن دیاں کوششاں کوں ݙھل نا سمڄھیا ونڄے، دفاع وطن کیتے ہر قربانی کیتے تیار ہیں، مسئلہ کشمیر دے منصفانہ اتے پرامن حل دے بغیر علاقائی امن ادھورا راہسی۔ اے ڳالھ انہاں پی ایم اے کاکول اچ پاسنگ آئوٹ تقریب نال خطاب اچ آکھی۔ انہاں آکھیا جو ریاست دا محور پاکستان دے لوک ہین جنہاں دے تحفظ اتے سلامتی توں وݙا ٻیا کوئی مقصد کائنی، ریاست نال وفاداری پہلی ذمہ داری اے، غیور اتے سربکف سپاہی دشمن دی تعداد اتے وسائل نال مرعوب نہ تھیسن، دشمن دی ہر سازش ملیا میٹ کیتی ویسی، عوام اتے پاک فوج دا رشتہ برقرار رکھیا ویسی، مادر وطن دے دفاع کیتے کہیں قربانی توں پچھو نا ہٹسوں۔ آرمی چیف عزم دوہرائے جو وݙیاں قربانیاں نال ملݨ آلے امن کو کہیں صورت متاثر نہ تھیوݨ ݙیسوں، اپݨے ظاہری اتے لکیے ہوئے دشمن کوں سنڄاݨݨا ہوسی، ساݙا امن افغانستان اچ امن نال جڑیا ہوئے، کشمیری ٻھراواں دی سیاسی، اخلاقی و سفارتی حمایت جاری رکھسوں۔ آرمی چیف پاس آئوٹ تھیوݨ آلے کیڈٹس کوں مبارک ݙتی، شیلدز اتے ٻئے اعزازات ونݙین۔