مادر ملت دی قیام پاکستان، بانی پاکستان تے تعمیر پاکستان کیتےعظیم خدمات تے انہاں کوں پوری قوم سلام پیش کریندی اے ، وزیراعظم شہباز شریف
اسلام آباد۔وزیراعظم شہباز شریف مادر ملت فاطمہ جناح دے ورھیݨے تے خراج عقیدت پیش کریندے ہوئیں آکھیے جو مادر ملت دی قیام پاکستان، بانی پاکستان تے تعمیر پاکستان کیتے عظیم خدمات تے انہاں کوں پوری قوم سلام پیش کریندی اے ،محترمہ فاطمہ جناح، قائداعظم محمد علی جناح دی بھیݨ ہی کائنی ، بلکہ انہاں دی فکری وراثت دی وی امین ہن ۔ وزیراعظم آفس دے میڈیا ونگ توں جاری بیان موجب وزیراعظم شہباز شریف آپݨے پیغام اچ آکھیے جو محترمہ دی زندگی دا وݙا حصہ اپݨے عظیم بھرا دی رفاقت اچ گزریا،قائداعظم دی زندگی دے چھیکڑی 19 سال محترمہ فاطمہ جناح ہر ویلھے آپݨے بھرا دے نال رہیاں ، محترمہ فاطمہ جناح آپݨے عظیم بھرا دے نال پاکستان دے قیام دی جدوجہد اچ حصہ ڳھدا۔ انہاں آکھیے قیام پاکستان دے بعد شدید علیل قائد دی خدمت تے تیمارداری اچ ݙینھ رات ھک کرݙتا ۔ اپݨے عظیم بھرا دی وفات توں بعد انھاں انہاں دا مشن اڳوں ودھاوݨ دا کم سنبھال ڳھدا ۔انہاں تریمتاں کوں تحریک پاکستان اچ متحرک ومنظم کرݨ تے سیاسی جدوجہد اچ مرداں دے رلے کردار نبھاوݨ دا حوصلہ ، ہمت تے رہنمائی فرمائی۔ قوم مادر ملت دے احسانات کوں کݙاہیں نی بھلا سڳدی ۔ اللہ تعالیٰ مادر ملت دے درجات بلند فرماوے۔ آمین
