شہبازشریف موسمیاتی تبدیلیاں

وزیراعظم محمد شہبازشریف موسمیاتی تبدیلیاں تے پاکستان اچ متاثرین سیلاب دے مسئلیں کوں چاتے

اسلام آباد۔24ستمبر (اے پی پی):وزیراعظم محمد شہبازشریف اقوام متحدہ دی جنرل اسمبلی دے 77ویں اجلاس اچ شرکت دے حوالے نال آپݨے دورہ نیویارک اچ ݙراکلیاں موسمی تبدیلیاں دے نتیجے اچ سامݨے آوݨ آلی صورت حال تے عالمی اقدامات چاوݨ توں علاوہ پاکستان اچ 33 ملین متاثرین سیلاب دے مسئلیں کوں چاتے جنہاں کوں بنیادی ضرورتاں دی ٻہوں لوڑھ اے ۔ اقوام متحدہ دی جنرل اسمبلی دے اجلاس اچ سائڈ لائن تے شیڈول وݙا مصروف رہیا جتھاں انہاں مختلف مسئلٰن تے کلیدی خطاب کیتے جنہاں اچ عالمی برادری کوں پیش آندی معاشی سست روی، پوسٹ کووڈ اکانومی، قیمتاں اچ ودھارا ، افراط زر، قرضے تے کھاوݨ پیوݨ دیاں چیزاں سودھے تیل دی قلت دے مسئلے شامل ہن ، انہاں مسئلیں دی وجہ توں پاکستان وی متاثر تھئے۔ انہاں موسمیاتی تبدیلیاں دے تباہ کن اثرات، معاشی مشکلات اتے غریب ملکاں دے ساریں توں ودھ متاثرہ طبقات کوں محفوظ بݨاوݨ کیتے بین الاقوامی سطح تے اجتماعی کاوشاں دا مطالبہ کیتا ۔ یواین جی اے دے اجلاس تے سائڈ لائن مصروفیات دے تحت وزیراعظم ٻہوں سارے عالمی رہنماواں نال ملاقات کیتی تے پاکستان اچ کروڑاں متاثرین سیلاب کوں وختی بنیادی ضرورتاں ݙیوݨ کوں چاتے تے آکھیے جو ایں ویلھے وی ملک اچ ٻہوں زیادہ رقبے تے پاݨی اے جتھاں بنیادی انسانی ضرورتاں دی دستیابی دے مسئلے ہن ایں حوالے نال آپݨے ھک ٹویٹ اچ وزیراعظم آکھیے جو اقوام متحدہ دی جنرل اسمبلی دے اجلاس ویلھے مختلف عالمی رہنماواں نال ملاقاتاں اچ ، میں موسمیاتی تبدیلیاں دے اثرات مکاوݨ کیتے مشترکہ عالمی کاوشاں تے زور ݙتے۔ میں انہاں کوں ݙسائے جو پاکستان تجارت اتے معیشت دے شعبیں اچ عالمی برادری نال شراکتداری اچ گھاٹی دلچسپی رکھیندے ۔ اجلاس دے موقع تے وزیراعظم شہباز شریف عالمی رہنماواں دے نال تھیوݨ آلیاں ملاقاتاں اچ سانجھے تعلقات  ودھاوݨ دی لوڑھ تے زور ݙتا انہاں کوں پاکستان اچ سیلاب دے بعد دی صورتحال دا وی ݙسایا ۔ وزیراعظم امریکی صدر جو بائیڈن نال وی ملاقات کیتی تے انہاں دی طرفوں پاکستان اچ سیلاب توں متاثرہ عوام نال ہمدردی اتے اظہار یکجہتی تے انہاں دا شکریہ ادا کیتا۔ ایں موقع تے امریکی صدر سینکڑاں اموات تے متاثرہ خانداناں نال ہمدردی دااظہار کیتا۔ وزیراعظم پاکستان دے متاثرین سیلاب دی مدد کیتے عالمی برادری کوں ݙتے ڳئے امریکی صدر دے پیغام تے انہاں دا شکریہ ادا کیتا۔ ایویں وزیراعظم بیلجیئم دے وزیراعظم، اپݨے جاپانی ہم منصب اتے ملایشیاء دے وزیراعظم نال ملاقاتاں کیتیاں ، وزیراعظم شہباز شریف اتے فرانسیسی صدر ایمانویل میکرون وچال ملاقات تھئی ، ایں موقع تے سانجھے تعلقات ودھاوݨ تے ڳالھ مہاڑ کیتی ڳئی۔ ݙوہیں رہنماوں اڄوکے سیلاب دے بعد پاکستان دی پائیدار معاشی بحالی کیتے عالمی برادری دے تعاون تے وی اتفاق کیتا ، ایویں وزیراعظم ایران دے صدر ابراہیم رئیسی نال ملاقات اچ مختلف شعبیں اچ پاک ایران تعلقات ودھاوݨ دی لوڑھ تے زور ݙتا ۔ وزیراعظم سپین دے صدر نال آپݨی ملاقات اچ ݙو پاسے تعلقات ودھاوݨ دے نال نال بین الپارلیمانی، سیکورٹی تے دفاع دے شعبیں اچ تعاون دی لوڑھ تے زور ݙتا ۔ وزیراعظم آسٹریا دے چانسلر کارل نیہامر نال وی ملاقات کیتی ۔  ملنڈا اینڈ بل گیٹس فائونڈیشن دے شریک بانی وی وزیراعظم نال ملاقات کیتی ، ایں توں انڄ وزیراعظم شہباز شریف اقوام متحدہ دے سیکرٹری جنرل انتونیو گوتریس نال اقوام متحدہ دے ہیڈ کوارٹر اچ ملاقات کیتی۔ اقوام متحدہ دی جنرل اسمبلی دے صدر نال ملاقات اچ وزیراعظم اقوام متحدہ دی سلامتی کونسل اچ جامع اصلاحات دی ضرورت تے زور ݙتا انہاں آکھیے جو حکومتاں وچال شفاف، مشاورتی اتے مثبت مذاکرات بنیادی اہمیت دے حامل ہن جیں تے سارے رکن ملکاں کوں آپمی صورتحال اتے توقعات کوں واضح کرݨا چاہیدے۔ سائڈ لائن ملاقاتاں اچ انہاں عالمی بنک گروپ دے صدر ڈیوڈ آر ملپس اتے آئی ایم ایف دی منیجنگ ڈائریکٹر کرسٹا لینا جارجیوا نال وی انڄ انڄ ملاقاتاں کیتیاں ، انہاں پاکستان اچ انفراسٹرکچر، زراعت، دیہی اتے شہری ترقی، سماجی خدمات دے نال نال معاشی ترقی دے حوالے نال عالمی بنک دے جاری منصوبیں تے ڳالھ مہاڑ کیتی ۔ اقوام متحدہ دی جنرل اسمبلی دے اجلاس اچ آپݨی جامع تقریر اچ وزیراعظم عالمی برادری کوں موسمیاتی تبدیلیاں تے گلوبل وارمنگ دی حساسیت کوں سمجھݨ تے ایندے حل کیتے جامع اقدامات دی تجویز پیش کیتی۔ انہاں ایں عزم دا اعادہ کیتا جو کاربن دے اخراج اچ ھک فیصد توں وی گھٹ حصہ ہووݨ دے باوجود پاکستانی معیشت اتے عوام ݙوڑی قیمت ݙیندی پئی اے جیڑھاجو موسمیاتی ناانصافی اے۔ انہاں آکھیے جو پاکستان کوں آوݨ آلے ݙکھ بیان کرݨ کیتے کوئی الفاظ کائنی ۔ ساݙی اوکھ اندازیں توں کتھائیں ودھ اے ۔ وزیراعظم اقوام متحدہ دی سلامتی کونسل دیاں قرارداداں دے مطابق غیرقانونی بھارتی مقبوضہ و جموں کشمیر دے جھیڑے دے پرامن حل تے وی زور ݙتا ۔ آپݨے دورہ نیو یارک اچ وزیراعظم محمد شہباز شریف پاکستان اچ سیلاب دیاں تباہ کاریاں دے حوالے منعقدہ نمائش دا دورہ وی کیتا جیڑھا جو اقوام متحدہ دی عمارت دی لابی اچ لاتیاں ڳیاں ہن ۔ وزیراعظم یو این جی اے دے اجلاس دے سائڈ لائن تے ٻہوں سارے عالمی رہنماواں تے ٻئے ملکاں دے اعلیٰ حکام نال ڳالھ مہاڑ کیتی۔

Leave a Reply

Your email address will not be published. Required fields are marked *