آ ئی ایم ایف پاکستان کیتے قرض پروگرام بحالی سانڳے 1.17 ارب ڈالر ݙیوݨ دی منظوری ݙتی اے، اعلامیہ
واشنگٹن ۔14جولائی(اے پی پی)بین الاقوامی مالیاتی فنڈ (آ ئی ایم ایف ) پاکستان کیتے قرض پروگرام بحالی سانڳے 1.17 ارب ڈالر دی منظوری ݙتی اے ایندے نال ملکی معیشت سنٻھالݨ اچ مدد ملسی، عالمی مالیاتی فنڈ دے توسیعی پروگرام دے تحت 4 ارب 20 کروڑ ڈالر ٻئے ݙتے ویسن، آندے سال جون تئیں اے رقم 7 ارب ڈالر کرݙتی ویسی۔ ناتھن پورٹر دی سربراہی اچ بین الاقوامی مالیاتی فنڈ دی ٹیم پاکستان دے اقتصادی پروگرام دے مشترکہ ستویں اتے اٹھویں جائزاں کیتے ڳالھ کوں حتمی شکل ݙتی اے جیندے اچ آئی ایم ایف ایکسٹینڈڈ فنڈ فیسیلٹی (ای ایف ایف) بحالی تے الائے۔ اعلامیہ موجب پاکستان نال قرض پروگرام بحال تھی ڳئے اتے پاکستان کوں ہک ارب 17 کروڑ ڈالر ملسن۔ آئی ایم ایف پاکستان دے معاشی اصلاحات پروگرام دی تعریف کیتی اے ٻھل آئی ایم ایف بورڈ معاہدے دی حتمی منظوری ݙیسی۔ آئی ایم ایف پاکستان کوں طلب و رسد دا ایکسچینج ریٹ تسلسل برقرار رکھݨ، مستعد مانیٹری پالیسی اتے سرکاری اداریاں دی کارکردگی چنڳی کرݨ دا آکھیے جو پاکستان کوں اڄوکے بجٹ تے سختی نال عمل کرݨا ہوسی، بجت خسارہ محدود رکھݨا ہوسی، ایکسپورٹ ری فنانس اسکیماں شرح سود نال منسلک رہسن، کرپشن کنٹرول کرݨ اتے اثاثے ظاہر کرݨ کیتے پاکستان ناکام رہے، ایں سانڳے وادھو اقدامات کیتے ہر ویلھے تیار رہݨا ہوسی، ایکسٹینڈڈ فنڈز فیسیلٹی پروگرام جون 2023 تئیں ودھاوݨ تے غور کیتا ویسی۔
