پاکستان امن چاہندے،بھارت اپنڑی انتہا پسندپالیسیاں نال پورے خطے دے امن کوں داﺅ تے لا ڈتے، وزیر خارجہ مخدوم شاہ محمود قریشی

اسلام آباد ۔   وزیر خارجہ مخدوم شاہ محمود قریشی آکھیا جو پاکستان امن چاہندے،بھارت اپنڑی انتہا پسندپالیسیاں نال پورے خطے دے امن کوں داﺅ تے لا ڈتے۔اومنگل کوں وزارت خارجہ اچ قومی سلامتی بارے اعلیٰ سطح اجلاس دی صدارت کریندے پئے ہن۔اجلاس اچ وزیر اعظم دے معاون خصوصی برائے قومی سلامتی ڈاکٹر معید یوسف، سیکرٹری خارجہ سہیل محمود اتے اعلی عسکری حکام شرکت کیتی۔

اجلاس اچ قومی سلامتی،علاقائی سلامتی اتے خطے دی صورتحال بارے تفصیلی مشورہ کیتا گئیا۔وزیرخارجہ آکھیا جو پاکستان امن چاہندے،بھارت اپنڑی انتہا پسندپالیسیاں نال پورے خطے دے امن کوں داﺅ تے لا ڈتے۔شاہ محمود قریشی آکھیا جو اقوام متحدہ دے سیکرٹری جنرل، صدر سیکورٹی کونسل اتے او آئی سی دے سیکرٹری جنرل کوں وی بھارت دے مذموم عزائم بارے ڈسا ڈتے۔انہاں آکھیا جو پاکستان ،افغان امن عمل سودھے،خطے اچ امن سانگے اپنڑی مخلص کوششاں کریندا رہسی۔ اے پی پی