وزیر خارجہ مخدوم شاہ محمود قریشی رومانیہ اتے سپین دے چار ݙینھ دے سرکاری دورے تے (کل)روانہ تھیسن
اسلام آباد۔7جنوری (اے پی پی):وزیر خارجہ مخدوم شاہ محمود قریشی (کل) اتوار کوں رومانیہ اتے سپین دے چار ݙینھ دے سرکاری دورے تے روانہ تھیسن ۔ جمعہ کوں ترجمان دفتر خارجہ موجب دورے دے پہلے مرحلے اچ وزیر خارجہ شاہ محمود قریشی 9 توں 10 جنوری تئیں رومانیہ دے اپݨے ہم منصب بوگدان اوریسکو دی دعوت تے بخارسٹ دا دورہ کریسن ۔ وزیر خارجہ رومانیہ دے اپݨے ہم منصب اتے بئے حکام نال ملاقاتاں کریسن ۔ ملاقاتاں دے دوران ݙوطرفہ تعاون کوں مزید ودھاوݨ دے اقدامات تے توجہ کرݨ دے علاوہ فریقین علاقائی اتے بین الاقوامی مسئلیں تے وی مشاورت کریسن ۔ وزیر خارجہ بعد اچ 10 توں 12 جنوری تئیں ہسپانوی ہم منصب جوزے مینوئل الباریس بیونو دی دعوت تے سپین دا دورہ کریسن ۔ اپݨے ہسپانوی ہم منصب نال ملاقات دے علاوہ وزیر خارجہ شاہ محمود قریشی ٻئے ہسپانوی وزراء اتے ارکان پارلیمنٹ نال ملاقاتاں کریسن ۔ سپین اچ رہݨ آلے پاکستانیاں دی وݙی تعداد ݙوہیں ملکاں وچال ھک مضبوط پل دا کم کریندی اے ، گزریل سال پاکستان اتے سپین سفارتی تعلقات دے قیام دی 70ویں سالگرہ منائی۔ رومانیہ اتے سپین ݙوطرفہ اتے یورپی یونین دے تناظر اچ پاکستان دے اہم شراکت دار ہن۔ وزیر خارجہ دا دورہ انہاں ݙوہیں دوست ملکاں دے نال ودھدے تعاون کوں مزید تقویت ݙٰیسی۔
