ملک اچ کرونا نال اموات دی شرح خدشیاں توں گھٹ اے،کرونا دی ویکسین ا ٓونڑ تئیں احتیاط دے علاوہ بیا کوئی راہ کائنی،وزیراعظم عمران خان
اسلام آباد (اے پی پی)وزیراعظم عمران خان آکھیے جو ملک اچ کرونا نال اموات دی شرح خدشیاں توں گھٹ اے،کرونا دی ویکسین ا ٓونڑ تئیں سوچ سمجھ تے ٹرنڑا ہوسی، احتیاط ہی او تئیں بہترین علاج اے۔اسلام آباد اچ کرونا وائرس دی صورتحال تے اپنڑے خطاب اچ لویندے وزیراعظم آکھیے جو سوچا ہئی جو ہنڑ تئیں کرونا دے مریضاں نال آئی سی یو بھریج ویسن بھل شکر اے جو ایویں نئیں تھیا،حالی وی نئیں پتا جو اے وبا کے تئیں راہسی،جے تئیں ایندی ویکسین نئیںا ٓندی او تئیں سارے جگ کوں سوچ سمجھ تے چلنڑا ہوسی تاں جو ایندے توں بچیا ونج سگے۔
وزیراعظم آکھیے جو کرونا آونڑ توں بعد خدشہ ہا جو لاک ڈاون لگنڑ نال ڈیہاڑی دار مزدور اتے غریب طبقہ بہوں متاثر تھیسی، تہوں اساں انہاں کوںسوکھ ڈیونڑ کیتے احساس ایمرجنسی کیش پروگرام شروع کیتے تاں جو انہاں دی مالی مدد تھی سگے اتے او بکھ توں نہ مرن۔انہاں ثانیہ نشتر کوں مبارک ڈتی جو پورے جگ اچ مستحقین کوں اتنی ودھ مالی امدادکتھائیں نئیں ڈتی گئی جیڑھی احساس ایمرجنسی کیش پروگرام اچ ڈتی گئی اے،ایندے کیتے سیاسی مداخلت، وابستگی کوں ہک پاسے رکھیا گئے اتے بغیر کہیں وانجھ دے رقم ونڈی گئی اے،ہنڑ تئیں چھیائٹھ لکھ ٹبراں کوں اکاسی ارب روپے ونڈیے گین اتے کوشش اے جو ڈاہ ڈینھ تئیں اے رقم ہک کروڑ ویھ لکھ تئیں پچائی ونجے،اے پسیہ صرف کرونا نال متاثرہ لوکاں کیتے رکھیا گئے۔
