ملک کوں اسلامی فلاحی ریاست ٻݨاوݨ دے رستے تے ٹردے پئے ہیں، کورونا نال کامیابی نال نمٹیے ہیں، ہݨ مہانڳ نال وی نمٹسوں، محصولات اچ ودھارے دے نال نال تنخواہیں وی ودھیسوں، وزیر اعظم عمران خان دے ”آپ کا وزیراعظم آپ کے ساتھ” اچ جوابات
اسلام آباد۔23جنوری(اے پی پی)وزیراعظم عمران خان آکھیے جو ملک کوں اسلامی فلاحی ریاست ٻݨاوݨ دے رستے تے ٹردے پئے ہیں، کورونا نال کامیابی نال نمٹیے ہیں، ہݨ مہانڳ نال وی نمٹسوں، محصولات اچ ودھارے دے نال نال تنخواہیں وی ودھیسوں، جے تئیں ایں ملک دے ٻݨآوݨ دے مقصد تے نہ ٹرسوں کامیاب نسے تھی سڳدے۔ آݙت کوں ”آپ کا وزیراعظم آپ کے ساتھ” پروگرام اچ عوام نال براہ راست ٹیلی فون تے الیندے اتے انہاں دے سوالاں دا ولدا ݙیندے وزیراعظم عمران خان آکھیے ساݙی حکومت کو بحران ترکے اچ ملیے ہن بھل چنڳیاں پالیسیاں پاروں وݙے مسلیاں تے قابو پا ڳھدے جیویں کرونا بحران اچوں نکلیے ہیں، ایویں مہانڳ تے وی قابو پیسوں اتے عوام کوں ودھ توں ودھ ریلیف ݙتا ویسی۔ وزیراعظم آکھیا جو میں پارلیمنٹ اچ سوالاں دا ولدا ݙیوݨ چاہندا ہم بھل اتھاں این آر او منگݨ آلے شور مچا ݙیندے ہن اتے میکوں الاوݨ نئیں ݙیندے، سیاست اچ آوݨ توں پہلے ہی ﷲ ہر شے ݙے ݙتی ہوئی بھل انہاں کوں سیاست اچ آوݨ توں پہلے کوئی وی نہ ڄاݨدا ہا، میں 25 سال پہلے اسلامی فلاحی ریاست دے منشور نال سیاست اچ آیاں اتے میکوں آہدن جو اے مذہب دے پچھو لکدے۔ انہاں آکھیا جو کرونا ڄڳ دی وݙی وبا ہئی جیندے توں کوئی نئیں بچیا، وݙیاں وݙیاں معیشتاں آن ݙٹھن بھل پاکستان او کلہا ملک اے ڄیڑھا درست سمت اچ اڳو تے ودھدا پئے، میکوں مہانڳ سمݨ نئیں ݙیندا۔ صدارتی نظام بارے انہاں آکھیا جو میں ایں مافیا دے خلاف سیاست اچ آیاں جئیں این آر او کیتے ہر ویلھے بلیک میل کرݨے بھل میں ملک دے وݙے ڈاکواں نال کوئی مفاہمت اتے سمجھوتہ نہ کریساں۔
