پاکستان، روس دے نال ݙو طرفہ تعلقات کوں خصوصی اہمیت ݙیندے،وزیر خارجہ مخدوم شاہ محمود قریشی دی روسی ہم منصب سرگئی لاوروف ںال ملاقات اچ ڳالھ مہاڑ
ماسکو۔24فروری (اے پی پی):وزیر خارجہ مخدوم شاہ محمود قریشی آکھیے جو پاکستان، روس دے نال ݙو طرفہ تعلقات کوں خصوصی اہمیت ݙیندے ۔اے ڳالھ انہاں خمیس کوں ماسکو اچ آپݨے روسی ہم منصب سرگئی لاوروف دے نال ملاقات اچ آکھی اے ۔ملاقات اچ ݙوطرفہ تعلقات ،سانجھی دلچسپی دے شعبیں اچ تعاون ودھاوݨ سودھے اہم علاقائی و عالمی امور تے ڳالھ مہاڑ کیتی ڳئی ۔روسی وزیر خارجہ ماسکو آمد تے وزیر خارجہ مخدوم شاہ محمود قریشی دا شکریہ ادا کیتے۔ݙوہیں وزرائے خارجہ پاکستان اتے روس دے درمیان ݙو طرفہ تعلقات دے سارے پہلوواں دا جائزہ ڳھدے ۔وزیر خارجہ آکھیے جو پاکستان، روس دے نال ݙو طرفہ تعلقات کوں خصوصی اہمیت ݙیندے ،پاکستان اتے روس وچال تعلقات بتدریج مستحکم تھئن ۔ شاہ محمود قریشی آکھیے جوپاکستان، وزیر اعظم عمران خان دے وژن دی روشنی اچ اقتصادی ترجیحات اتے علاقائی رابطے دے ودھارے دے ایجنڈے تے عمل پیرا اے۔ݙوہیں وزرا خارجہ پاکستان تے روس وچال ݙو طرفہ تعلقات کوں مزید مستحکم بݨاوݨ دے عزم دا اعادہ کیتا ۔روسی وزیر خارجہ افغانستان دے حوالے نال او آئی سی وزرائے خارجہ کونسل دے غیر معمولی اجلاس دی کامیابی تے وزیر خارجہ مخدوم شاہ محمود قریشی اتے پاکستان دی قیادت کوں مبارخ ݙتی تے 22/23 مارچ کوں اسلام آباد اچ متوقع او آئی سی وزرائے خارجہ کونسل دے 48 ویں اجلاس دی کامیابی کیتے نیک خواہشات دا اظہار کیتے۔وزیر خارجہ پرتپاک خیر مقدم اتے پر خلوص میزبانی تے روسی ہم منصب دا شکریہ ادا کیتے،سیکرٹری خارجہ سہیل محمود اتے وزارت خارجہ دے سینئر افسران وی ایں ملاقات اچ موجود ہن ۔
