چھی اپریل سرائیکی تریخ دا نویکلا ݙینھ، 1962 کوں پہلی واری زبان کوں ” سرائیکی ” دا ناں ملیا ہا
6 اسلام آباد (اے پی پی)سرائیکی ٻولو ، سرائیکی پڑھو اتے سرائیکی لکھو۔ چھی اپریل سرائیکی تریخ دا او نویکلا ݙینھ ݙینھ اے ڄݙاں ایں ݙینھ 1962 کوں پہلی واری ساݙی زبان کوں ” سرائیکی ” دا ناں ملیا ہا۔ ایں سانڳے سرائیکی عوامی تریمت تحریک پاکستان دی نائب صدر ادی نیناں اے پی پی نال گالھ مہاڑ کریندے آکھے جو کہیں وی دھرتی، خطے یا علاقے وچ رہݨ والے لوکیں دی ٻولی اُتھوں دے لوکیں دی ماء ٻولی سݙوِیندی ہے ہر جاندار بھانویں او جانور، چرند، پرند ہووے یاانسان، اوندی ٻولی اُوندی سنڄاݨ ہوندی ہے، بغیر سنڄاݨ دے جِیندا رہݨ ٻہوں محال اے، جیکر جڳ جہان دے مختلف تہذیبیں یا خطیں تے دید بھنوؤں تاں ماء ٻولی دی اہمیت دا مزید اے پتا چلدے جو بعض خطیں ءچ ماء ٻولی وِسارݨ مرونڄݨ دی علامت اے۔ تاریخی حوالے نال ݙیکھوں تاں ساݙی ماء ٻولی 5 ہزار ورھیاں توں وی ودھیک قدیم تے پراݨی ہے شاید ساݙی ٻولی برصغیر ءچ سبھ توں ودھیک ٻولݨ والی ٻولی اے ـ مختلف تہذیبیں دی مختلف تحقیقات ءچ وی ساݙی ماء ٻولی دی قدیم تہذیب وثقافت نشابُر تھئی ہے . اے ٻولی تقریبًا پورے خطے ءچ ٻولی ویندی ھئی پر اپݨے علاقائی ناویں نال سنڄاݨی ویندی ہئی جیویں ملتانی ، ریاستی ، جھنگوی ، جانگلی ، ڄاٹکی ، ڈیرِہ وال ، ڈیروی ، بارکھانی ، کھتران اوبھیچڑی ، ٻلھوڑکی وغیرہ . ایں ٻولی تے تحقیقات تاں ڈھڳ عرصے کنوں تھیندی پئی ہئی 1957 ءچ ماء ٻولی ٻولݨ والے سارے سُڄاک مُہاندرے دانشور ، ادیب ، محقق کٹھے تھے ایں ماء ٻولی کوں ہکو ناں ݙیوݨ کیتے ڳالھ مہاڑ تھئی . اوڑک سبھنیں سڄاک سوجھواݨیں دی کاوشیں نال 6 اپریل 1962 کوں سمرا پبلک ہائی اسکول ملتان ءچ ہک کانفرنس منقعد تھئی . اوندی صدارت غلام قاسم خاکوانی کیتی ٻے شرکاہ ریاض انور ایڈووکیٹ ، اخترعلی خان، مولانا نور احمد فریدی ، ڈاکٹر مہر عبدالحق ، سیٹھ عبیدالرحمٰن ، علامہ نسیم طاغوت ، میر حسان الحیدری ، ارشد ملتانی تے ٻئے ݙھیر سارے مُہاندرے شامل ہن اکثریت ایں ناں تے متفق تھئی آئندہ ملتان ، بہاولپور ، دیرہ غازی خان ، رحیم یارخان دیرہ اسماعیل خان سمیت پورے خطے اچ ٻولݨ آلی ایں ٻولی کوں ایندے مختلف علاقائی لہجیں دے ناں ختم کرتے اِنہاں کوں سرائیکی آکھیا ویسی . اے ٻولی انہاں علاقیاں دے علاوہ جتھاں جتھاں ٻولی ویندی پئی ہے اُونکوں وی سرائیکی آکھیا ویسی ـانھاں بیا آکھے جواساکوں چاہیدا اے جو آپدے بالاں نال “ماء ٻولی” اچ گالھ کروں تانجو آپدی زبان تے ثقافت کوں آندیاں نسلاں تئیں پجا سگوں۔
