اسلام آباد۔ 7 اپریل (اے پی پی) نائب وزیراعظم اتے وزیرِ خارجہ محمد اسحاق ڈار آکھیا جو پاکستان خطے اچ جاری بحران کوں گھٹ کرݨ تے ایران تے امریکہ وچال مذاکرات کیتے راہ ہموار کرݨ دی خاطر بھرپور سفارتی کوشِشاں کیتن۔ منگل کوں سینیٹ دے اجلاس اچ خطے دی موجودہ صورتحال تے ڳالھ کریندیں ہوئیں انھاں اپوزیشن لیڈر سینیٹر راجہ ناصر عباس دا شکریہ ادا کیتا جنھاں حکومت دی کوشِشاں کوں سراہیا ۔ اسحاق ڈار آکھیا جو پاکستان شروع توں ای ایں بحران اچ سرگرم رہیے ۔ انھاں ݙسایا جو جݙاں ایران تے پہلا حملہ تھیا تاں او مدینہ منورہ اچ او آئی سی اجلاس دے بعد موجود ہن جتھاں توں انھاں فوری طور تے دفترِ خارجہ نال رابطہ کیتا اتے ہک خودمختار ملک تے اسرائیلی حملے دی سخت مذمت دی ہدایت ݙتی اے۔ اسحاق ڈار دے مطابق انھاں فوری طور تے ایرانی وزیرِ خارجہ نال وی رابطہ کیتا اتے پاکستان دی حمایت تے ہمدردی دا سنیھا ݙتا، نال ای خطے دے ملکاں کوں کشیدگی گھٹ کرݨ کیتے متحرک کرݨ دا یقین ݙیوایا ۔ انھاں آکھیا جو پاکستان مسلسل خطے تے ٻئے ملکاں بشمول چین، جاپان، برطانیہ، کینیڈا تے کئی یورپی ملکاں نال رابطے اچ رہیا تاں جو تحمل تے کشیدگی اچ ڳھٹکی کوں فروغ ݙتا ونڃ سڳے ۔ نائب وزیراعظم آکھیا جو پاکستان ہک سہولت کار تے ثالث دے طور تے کم کریندا پیا اے تے حساس سفارتی کوشِشاں کوں متاثر تھیوݨ توں بچاوݨ کیتے احتیاط نال اقدامات کیتے ویندی پئن ۔ انھاں ݙسایا جو وزیراعظم شہباز شریف، فیلڈ مارشل سید عاصم منیر تے دفترِ خارجہ ایں عمل اچ مکمل طور تے متحرک اے ۔ اسحاق ڈار آکھیا جو سعودی عرب 19 مارچ کوں 12 ملکاں دا اجلاس ریاض اچ منعقد کیتا جیندے اچ پاکستان آپݨا موقف پیش کیتا اتے ہک متوازن مشترکہ اعلامیہ جاری کراوݨ اچ کردار ادا کیتا جیندے اچ اسرائیل دی مذمت وی شامل ہئی اے۔ انھاں ٻیا ݙسایا جو سعودی عرب، مصر، ترکیہ تے پاکستان تے مشتمل چار ملکی گروپ وی امن کیتے کم کریندا پئے اتے ایندا آوݨ آلا اجلاس جیڑھا پہلے استنبول اچ تھیوݨا ہئی ہݨ اسلام آباد منتقل کر ݙتا ڳئے۔ انھاں آکھیا جو انھاں تریہے ملکاں دے وزرائے خارجہ 29 مارچ کوں پاکستان دا دورہ کیتا جتھاں ݙو پاسہ اتے چار فریقی ملاقاتاں تھین۔ انھاں ٻیا ݙسایا جو چین دے نال وی اعلیٰ سطحی رابطے تھئیے اتے 31 مارچ دے دورے اچ پنج نکاتی امن منصوبے تے ڳالھ مہاڑ کیتی ڳئی جیڑھی بعد اچ منظرِ عام تے آندی ڳئی اے۔ اسحاق ڈار آکھیا جو اقوامِ متحدہ دے سیکرٹری جنرل وی پاکستان دے کردار کوں سراہیا اتے تعاون دی پیشکش کیتی اے۔ انھاں آکھیا جو پاکستان آخری لمحے تائیں کوشِش کیتی جو فریقین وچال ڳالھ مہاڑ تے وقفے دی گنجائش پیدا کیتی ونڃے تاں ہم تازہ پیشرفت صورتحال کوں ٻیا پیچیدہ بݨا ݙتے ۔ انھاں خبردار کیتا جو خطے اچ طویل تنازعہ دنیا تے پاکستان ݙوہیں کیتے سنگین نتائج دا باعث بݨ سڳدے خاص طور تے تیل دی قیمتاں تے معیشت تے اثرات پے سڳدن ۔ انھاں امید ظاہر کیتی جو سفارتی کوشِشاں خطے اچ امن دی بحالی تے باعزت حل دی طرف گھن ویسن ۔
پاکستان خطے اچ جاری بحران گھٹ کرݨ اتے ایران تے امریکہ وچال مذاکرات دی راہ ہموار کیتی،اسحاق ڈار
