اسلام آباد۔ 2 اپریل (اے پی پی) وفاقی وزیر خزانہ و محصولات سینیٹر محمد اورنگزیب امریکی شراکت داراں دے تعمیری کردار دی تعریف کریندے آکھیے پاکستان سرمایہ کاری دے حوالے نال سہولتاں ݙیوݨ تے کاروباری ماحول کوں بہتر بݨاوݨ کیتے پرعزم اے، ڈھانچہ جاتی اصلاحات، برآمدات تے مبنی نمو تے ادارہ جاتی نظام کوں تکڑا بݨاوݨ اساݙی ترجیح اے۔
انھاں اے ڳالھ پاکستان اچ تعینات امریکہ دی ناظم الامور نٹالی بیکر نال ملاقات اچ آکھی اے۔ ملاقات دے دوران فریقین پاکستان تے امریکہ دے ݙو پاسہ تعلقات، جاری اقتصادی پیش رفت تے تجارت، سرمایہ کاری تے توانائی دے شعبیں اچ تعاون مزید ودھاوݨ دے امکانات تے تفصیلی ڳالھ مہاڑ کیتی۔نتالی بیکر واشنگٹن ڈی سی اچ ہݨے ہی منعقد تھیوݨ آلے سمپوزیم دا ذکر کیتا جیندے میزبان امریکی کانگریس دے پاکستان کاکس ہن ۔
انھاں ݙوہیں ملکاں وچال رابطیں اچ مثبت پیش رفت دی تعریف کیتی ۔ وزیر خزانہ نٹالی بیکر کوں توانائی دے شعبے اچ درپیش چیلنجز نال نبٹݨ کیتے جاری اقدامات دا ݙسایا جنھاں اچ ایندھن دی خریداری، قیمتاں دے تعین دا نظام تے ہدفی سبسڈیز شامل ہن۔
انھاں ݙسایا جو حکومت سبسڈیز کوں زیادہ موثر انداز اچ کمزور طبقیں تائیں پڄاوݨ تے کم کریندی پئی اے۔ فریقین پاکستان دی بین الاقوامی مالیاتی اداریں دے نال جاری رابطیں تے وی ڳالھ مہاڑ کیتی ۔
نتالی بیکر پاکستان دے اقتصادی اصلاحات دے ایجنڈے دی حمایت دا اعادہ کیتا تے اوکھے حالات اچ معیشت کوں مستحکم کرݨ کیتے حکومت دی کوششاں دی تعریف کیتی ۔ انھاں توانائی، معدنیات، ٹیکنالوجی تے لاجسٹکس وانگو اہم شعبیں اچ سرمایہ کاری ودھاوݨ اچ امریکہ دی مسلسل دلچسپی دا وی ذکر کیتے۔
