25 مئی کوں ”یومِ تکریمِ شہداءِ پاکستان “ مناوݨ دا اعلان، مضبوط فوج مملکت دی سلامتی اتے اتحاد دی ضامن ہوندی اے، آرمی چیف جنرل سید عاصم منیر
راولپنڈی۔22مئی (اے پی پی) پاک فوج دے سربراہ جنرل سید عاصم منیر 25 مئی کوں ”یومِ تکریمِ شہداءِ پاکستان “ مناوݨ دا اعلان کریندیں ہوئیں آکھیا جو مضبوط فوج مملکت دی سلامتی اتے اتحاد دی ضامن ہوندی اے۔شہیداں دی قربانیاں اتے غازیاں دی خدمات اساݙی قیمتی اثاثہ اتے سرمایہ ہن۔ پاک فوج بطور ادارہ اپݨے نال جڑے ہر بندے کوں اتے اوندے لواحقین کوں ہمیشہ یاد رکھیندے۔ افواجِ پاکستان دا ہر سپاہی اتے آفیسر سارے علاقائی، لسانی، اتے سیاسی تعصبات اتے امتیازات توں ہٹ تے صرف اپݨے فرض اتے ذمہ واریاں کوں مقدم رکھیندے۔ او سنوار کوں جنرل ہیڈ کوارٹرز راولپنڈی شہیداں اتے غازیاں دے اعزاز اچ تقریبِ تقسیم اعزازات توں خطاب کریندے پے ہن۔ آئی ایس پی آر موجب آرمی چیف جنرل سید عاصم منیر آپریشنز وچال بہادری اتے قوم کیتے شاندار خدمات تے پاک فوج دے افسراں اتے نینگراں کوں فوجی اعزازات نال نوازیا۔ 51 افسراں کوں ستارہ امتیاز(ملٹری) ،22 افسراں تے جواناں کوں تمغہ بسالت اتے 2 جواناں کوں اقوامِ متحدہ دے خصوصی میڈل دے اعزاز نال نوازیا۔ تقریب اچ وݙی تعداد اچ پاک فوج دے سینئر افسر اتے شہیداں دے ٹٻر شریک تھیے۔ آرمی چیف اڄوکے ݙینھاں فوجی تنصیبات، یادگاراں اتے شہداء دی حرمتاں تے حملیاں کوں افسوسناک قرار ݙیندیں ہوئیں آکھیا جو اے ناقابل برداشت اے۔
