سئیں طارق احمد طارق

شاہ صدر دین دے شہر دا احمد خان طارق اپنڑی وسوں دا ہک مہان شاعر

شاہ صدر دین دے شہر دا احمد خان طارق اپنڑی وسوں دا ہک مہان شاعر اے ، طارق دا ڈوہڑا سرائیکی شاعری اچ ہک خاص مقام رکھدے ۔
سئیں کوں اپنڑا بیٹ، بیلا، ونڑ، وسوں تے دھرتی نال عشق اے تے انہاں اپنڑاں اے عشق اپنڑی شاعری اچ ورتیا ۔
شاہ صدر دین دے شہر دے فقیر دے کلام اچ عام جہیں پکھنڑو دی مثال اچ وسوں دے تل وطنیاں واسطے ہک مزاحمت نظردی اے، انہاں ہک چیڑی جہیں معصوم پکھی دا آکھ کے وسوں دے لوکیں کوں ہک پیغام ڈتے جو

چڑیاں اُٹھو کئی دھاں کرو
چپ نہ کرو ، چپ نہ کرو

خالق جہاں دی خیر کر
ہتھ جوڑ کے چِلکیاں کرو

تن بے کفن ڈیکھو کتھائیں
ونج کے پراں دی چھاں کرو

ہتھ وچ جے کوئی ہتھیار نئی
چیں چیں کرو، چاں چاں کرو

طارقّ سویرے شام آ
ویڑھے میڈے چگیاں کرو

(سئیں احمد خان طارقّ)

کاں تے وسوں دا گانڈھا جڑیندیں ہوئیں ، جیڑھا کہیں سجنڑ دے آونڑدا پیغام ڈیندے، کہیں کوں ہک امید ڈیندے ، تے طارق سئیں وی اوں مونجھ تے تانگھ بارے آہدن جو

میڈے دل دی کندھ تے کاں میڈا جو گال کریندے روح ڈیندے

کدی اےسُنڑوا کدی او سنڑوا جو حال سُنڑیندے روح ڈیندے

کدی اہدےپرسوں آندا پئے موئے ہوئےجلویندے روح ڈیندے

میڈا کاں طارق بئی مان وڈا توڑے کُوڑ مریندے روح ڈیندے

(احمد خان طارق)

سئیں دی شاعری اچ ہمیشہ پریت، محبت دا درس اے جیہڑی ساکوں ہک اینجے خدا نال جڑیندی اے جیہڑا صرف ساڈا خدا اے، ساڈی اوں مسیت دا خدا جیہڑا ساڈے نال ہر حال اچ ہوندے، جیہڑا ساکوں دڑکے نی ڈیندا تے ساکوں ہتھیں تسبی ڈے کے رقص کرویندے۔

اساں کلھیاں پڑھ پڑھ انج رہ گیوں
جُل کہیں دے کول نماز پڑھوں

ہتھیں تسبی مسجد رقص کروں
پا گل وچ دول نماز پڑھوں

ہتھ بدھ بھاویں ہتھ کھول پڑھوں
اے پھول نہ پھول نماز پڑھوں

جتھاں طارقّ دڑکے نہ ہوون
اوہا مسجد گول نماز پڑھوں

(سئیں احمد خاں طارقّ)

اہدن جو شاعر سرائیکی شاعری اچ تریمت بنڑ تے گالھ کریندے ، تے تریمت دے جزبات تے احساسات دے نال نال مونجھ تے تانگھ دی گالھ وی طارق سئیں دی شاعری اچ ملدی اے جو

میں کیوں آکھاں میں کلہی آں

میں آں، چلہہ اے ، کندھ اے، کاں اے !

(احمد خان طارقّ)

ول آہدن،

رو روونڑ عین عبادت ہے
پر بے آواز رنی کر

کجھ عید نماز توں پہلے رو
کجھ بعد نماز رنی کر

اے آہیں دھائیں ڈکھ ڈسکیاں
بھن سارے ساز رنی کر

اے طارق راز دیاں گالہیں ہن
رکھ دل وچ راز رنی کر

(احمد خان طارق)

طارق ناں دا اے بزرگ جڈاں وی کہیں کوں ملدا ہا تاں دعائیں دے انبار ہوندی زبان تے ہوندے ہن ، لوّظ “میڈا بچڑا” توں شروع تھیندے ہن تے ول دعائیں دی گنڈھڑی لا ڈیندے ہن۔

جے مڑریں طارقّ آپ مراں

شالا مال مری اکوں کیوں آکھاں!

طارق سئیں بارے مرشد اشو لعل سئیں نے مہرے آلے میلے تے فرمایا ہا جو “طارق ہک عہد دا ناں اے تے اساں طارق دے عہد اچ جیندے پئے ہیں” تے نال ہی سئیں دے بارے “دیوتا” دا لوّظ ورتیا۔

میڈی خوش قسمتی جو 30 مارچ 2014 کوں کوٹ ادو اچ مشاعرے تے طارق سئیں نال ملاقات دا شرف نصیب تھیا ہا۔
میں فقیر کوں ارداس کیتی جو میکوں کجھ اپنڑے ہتھیں نال کجھ لِکھ تے ڈیسو تاں اے میڈے واسطے ہک اعزاز ہوسی ، تے طارق سئیں نے بزرگی اچ اپنڑے کمبدے ہتھیں نال ایں لکھائی اچ ہک بند تقریباٙٙ 20 منٹ اچ لکھیا ہا تے میں آہدا رہ گیا ہم جو ڈاڈا سئیں تساں ہک لائن ای لکھ ڈتی اے تاں میڈے واسطے بہوں قیمتی اے پر انہاں جواب ڈتا
“میڈا بچڑا، توں میڈے کینے لنگھ آئیں ، تیکوں خالی تاں نمی ولیندا”
سئیں دے لکھیے اے قیمتی لوّظ میڈے واسطے بہوں معنی رکھدن !

نہ مالک_ملک زمین دے ہیں ، نہ مال ء ٹوکرے بدھنڑے ہیں

اساں کانباں تاڑ کے بہندے ہیں ، جھر جال ء ٹوکرے بدھنڑے ہیں

ایہا گال ہمیشہ کیوں پچھدیں ، تیکوں حال ء ٹوکرے بدھنڑے ہیں

ساڈا “طارق” دل ہے جگ وانگوں ، ایہا گال ء ٹوکرے بدھنڑے ہیں
(سئیں احمد خان طارق)

تحریر:- زیبی بھٹہ
کوٹ ادو

Similar Posts

Leave a Reply

Your email address will not be published. Required fields are marked *