وزیر اعظم محمد شہباز شریف دا ایران دے صدر سید ابراہیم رئیسی نال ٹیلیفونک رابطہ، عید دی مبارخ ݙتی
۔10جولائی: وزیر اعظم محمد شہباز شریف ایران دے صدر سید ابراہیم رئیسی نال اتوار کوں ٹیلیفونک رابطہ کیتے تے انہاں کوں عید دی مبارخ ݙیوݨ دے نال نال ݙوپاسے دے تعلقات تے ڳالھ مہاڑ کیتی ۔ وزیراعظم پاکستان تے ایران دے درمیان جغرافیائی قربت، مشترکہ تاریخ اتے سانجھی افہام و تفہیم تے مبنی تاریخی تعلقات دی اہمیت کوں اجاگر کریندے ہوئیں تجارت، توانائی، بجلی تےعوامی رابطے سودھے سانجھے تعاون دے سارے شعبیں اچ ݙوطرفہ تعلقات کوں ودھاوݨ کیتے آپݨی حکومت دے مضبوط عزم دا اعادہ کیتے۔ انہاں آکھیے سانجھے اقتصادی کمیشن دا اجلاس وختی سݙݨ توں ݙوہیں ملکاں وچال اقتصادی رابطے مزید پکے تھیسن ۔ وزیر اعظم اے وی امید کیتی جو روزگار کوں سوکھا بݨاوݨ کیتے سرحدی علاقے اچ بارڈر اسٹیننس مارکیٹس وختی فعال تھی ویسن ۔ وزیر اعظم شہباز شریف صوبہ بلوچستان اچ جنگلات دی بھاہ وسماوݨ کیتے وختی مدد تے آئی ایل76 طیارہ پاکستان کوں ݙیوݨ تے ایرانی قیادت دا شکریہ ادا کیتا۔ وزیر اعظم محمد شہباز شریف ہر سال زائرین دے دورے دی سہولت کیتے ایران دے تعاون دی تعریف کریندے ہوئیں عوام وچال تبادلیں کوں مزید ودھاوݨ دی اہمیت تے زور ݙتا ۔ وزیراعظم جموں و کشمیر دے جھیڑے تے ایران خاص طور تے ایران دے سپریم لیڈر دی طرفوں مستقل حمایت دی تعریف کیتی ۔صدر سید ابراہیم رئیسی عید دی مبارخ ݙیوݨ تے وزیراعظم دا شکریہ ادا کیتا تے ݙو پاسے تجارت کوں مزید ودھاوݨ خاص طور تے مکران ڈویژن کوں بجلی ݙیوݨ اچ ایرانی تعاون دا یقین ݙیوائے ۔ وزیراعظم اعلی سطحی تبادلیں دی اہمیت تے زور ݙیندے ہوئیں ایرانی صدر کوں پاکستان دے دورہ دی دعوت ݙتی۔ ایرانی صدر سید ابراہیم رئیسی وزیراعظم محمد شہباز شریف کوں وختی ایران دا سرکاری دورہ کرݨ دی دعوت ݙتی ۔
