عمران خان اپݨی 22 سالہ جدوجہد، کارکناں دی محنت اتے عوام دے ووٹاں نال وزیر اعظم ٻݨین، گورنر پنجاب چوہدری محمدسرور
لاہور۔23جنوری(اے پی پی)گورنر پنجاب چوہدری محمد سرور آکھیے جو کہیں کوں وزیراعظم ٻݨواوݨ تاں ٻئی ڳالھ اے کوئی کلہا ڄݨا کہیں کوں ایم این اے وی نئیں ٻݨوا سڳدا، عمران خان اپݨی 22 سالہ جدوجہد، کارکناں دی محنت اتے عوام دے ووٹاں نال وزیر اعظم ٻݨین، میں کݙاھیں نئیں آکھیا جو نوازشریف، بینظیر بھٹو اتے عمران خان کوں کلہیں میں وزیر اعظم ٻݨوائے۔ لاہور اچ پریس کانفرنس کریندے انہاں آکھیا جو دہشت گردی دے خلاف جنگ اتے ملکی دفاع کیتے پوری قوم افواج پاکستان دے نال اے، اللہ واسطے افواج پاکستان کوں سیاسی معاملات توں انڄھ رکھیا ونڄے۔ انہاں آکھیا جو پنجاب آب پاک اتھارٹی اتے این جی اوز دے ڳانݙھے نال یکم مارچ تئیں پنجاب دے ݙیݙھ کروڑ لوکاں کوں پیوݨ دا صاف پاݨی ملنا شروع تھی ویسی۔ ایں موقع تے صوبائی وزیر بلدیات میاں محمودالرشید، رکن پنجاب اسمبلی ملک ندیم بارا، چیئرمین پنجاب آب پاک اتھارٹی ڈاکٹر شکیل احمد اتے الخدمت فاونڈیشن دے احسان اللہ وقاص سودھا ٻئے لوک وی موجود ہن۔
