وزیراعظم عمران خان

ملک صنعتی ترقی نال اڳوں ودھدے ، حکومت صنعتاں کیتے مراعات ݙیندی پئی اے، وزیراعظم عمرا ن خان

لاہور  (اے پی پی):وزیراعظم عمران خان آکھیے ملک صنعتی ترقی توں اڳوں ودھدے ، حکومت صنعتاں کیتے مراعات ݙیندی پئی اے ، ماضی اچ برآمدات دے ودھارے تے توجہ نی ݙتی ڳئی ، ساݙی توجہ چھوٹےاتے درمیانے درجے دیاں صنعتاں تے ہے، ایس ایم ایز کیتے مراعات ݙیندے پیوں ، سمندرپار پاکستانیاں کوں ملک اچ سرمایہ کاری کیتے راغب کریسوں ۔ اے ڳالھ انہاں منڳل کوں اتھاں انڈسریل پیکج  دے حوالے نال تقریب توں خطاب کریندے ہوئیں آکھی اے ۔ وزیراعظم آکھیے حکومت دی کارکردگی دا تواتر توں جائزہ گھندا رہنداں، کارباری طبقے کیتے پیکج دااعلان ٻہوں پہلےتھی ونڄݨا چاہیدا ہئی ۔

انہاں آکھیے جو صنعتی ترقی دی بنیاد تے ہی ملک اڳوں ودھدن۔ ماضی اچ پاکستان وݙی تکھے ترقی کریندا پیا ہئی ۔70 دے ݙھاکے اچ تھیوݨ آلی نیشنلائزیشن  توں ضیان تھیا، سوشلسٹ مائنڈ سیٹ دے مطابق صنعتاں کوں منافع کماوݨ دی اجازت نہ ہووے تاں ترقی کیویں تھی سڳدی اے ۔ دولت دی پیداوار توں ہی ملک ترقی کریندے ۔ وزیراعظم آکھیے جو گزریل حکومتاں ملک دی معیشت سدھی کرݨ اچ ناکام رہیاں ۔ پرکشش مراعات دی بنیاد تے سرمایہ کار راغب تھیندن  حکومت اچ آندے ہی ساݙی پہلی ترجیح ملک اچ صنعتی شعبے دا ودھارا ہئی ۔ انہاں آکھیے جو ایمنسٹی دے عمل توں صنعتی شعبے کوں  براہ راست فیدہ پڄݨا چاہیدے ۔

وزیراعظم برآمدات دے ودھارے کیتے حکومت دیاں پالیسیاں کوں اجاگر کریندے ہوئیں آکھیے جو ماضی اچ برآمدات دے ودھارے تے توجہ نی ݙتی ڳئی۔ ساݙی توجہ چھوٹےاتے درمیانے درجے دے کاروبار  کیتے سوکھ پیدا کرݨ تےہے ۔ اساں ایں حوالے نال پالیسی گھن تے آئے تے ایں شعبے کوں مراعات ݙیندے پیوں۔ وزیراعظم آکھیے جو کاروبار کیتے سوکھ پیدا کرݨ آلے ملکاں دی درجہ بندی اچ پاکستان دی پوزیشن اچ مزید بہتری آسی ۔ انہاں آکھیے جو سمندر پارپاکستانی ملک دا اثاثہ ہن ۔ انہاں کیتے مزید آسانیاں پیدا کریسوں تے مراعات ݙیسوں ۔ حکومتی پالیسیاں دی بدولت اڄ ترسیلات زر ریکارڈ سطح تے ہن ۔

Similar Posts

Leave a Reply

Your email address will not be published. Required fields are marked *