وزیر اعظم دا جنوبی پنجاب صوبے داٻل قومی اسمبلی اچ گھن آوݨ 500 ارب روپے دے ترقیاتی پیکیج دا اعلان، خون دے چھیکڑی قطرے تئیں کرپٹ سیاستداناں دے خلاف جنگ جاری رہسی ، وزیراعظم عمران خان دا جلسہ عام توں خطاب
میلسی ۔6مارچ (اے پی پی):وزیراعظم عمران خان نے جنوبی پنجاب صوبہ دا ٻل قومی اسمبلی اچ گھن آوݨ 500 ارب روپے دے ترقیاتی پیکیج دا اعلان کریندے ہوئیں آکھیے جو خون دے چھیکڑی قطرے تئیں کرپٹ سیاستداناں دے خلاف جنگ جاری رہیسی ،30 سال توں ملک کوں ݙوہیں ہتھاں نال لٹݨ آلیں کوں ھک واری ول اپݨے دور دی یاد آ ندی پئی اے ایں کیتے انہاں کوں عدم اعتماد دی جلدی اے، اے لوک عدم اعتماد دی ناکامی دے بعد جیڑھا میں انہاں دے نال کریساں ایں کیتے تیار رہن ، ٹیکس دی ریکارڈ وصولی تے عوام کوں دنیا اچ تکھے تھیوݨ آلی مہانگ دے مقابلے اچ ریلیف ݙتے ، قوم مزید ٹیکس ݙیوے تاں انہاں نال وعدہ اے جو اے ٹیکس انہاں کوں ریلیف ݙیوݨ تے خرچ کریسوں ، لندن اچ ٻیٹھے بھگوڑے توں رقم پاکستان واپس آوے تاں پٹرول تے ڈیزل دیاں قیمتاں ادھ کرݙیسوں روس یوکرائن جنگ توں دنیا دی مشکلات ودھ ڳئن، اساں جنگ اچ کہیں دا ساتھ نہ ݙیسوں امن قائم کرم اچ ساریں دا ساتھ ݙیسوں ۔ اتوار کوں میلسی اچ جلسہ عام توں خطاب کریندے ہوئیں وزیراعظم آکھیے جو شاندار جلسہ کراوݨ تے ارکان قومی اسمبلی اورنگزیب کھچی اتے طاہر اقبال کوں خراج تحسین پیش کریندن ۔ وفاقی حکومت فیصلہ کیتے جو جنوبی پنجاب کیتے 500 ارب روپے دا ترقیاتی پیکج ݙیسوں، جنوبی پنجاب صوبہ کیتے قومی اسمبلی اچ ٻل گھن آسوں ، عوام ایں تے پیپلز پارٹی اتے مسلم لیگ (ن) دا اصل چہرہ وی ݙیکھ گھنسن ۔ وزیراعظم آکھیے اساکوں ݙکر اے جو ساݙے دور اچ کساناں کوں ساریں توں ودھ پیسہ آئے ، مکئی، کݨک تے ، کپاہ دی فی ایکڑ پیداوار تے نمایاں منافع حاصل تھئے ، دنیا اچ یوریا دی قلت دے باوجود اساں آپݨے کاشتکار کوں یوریا دی دستیابی دا فیصلہ کیتے ، ھک لکھ ٹن یوریا چین توں منگویندے پیوں ھک ہفتے اچ پڄ ؤیسی کھاد تے 132 ارب روپے دی سبسڈی ݙتی اے ۔ وزیراعظم آکھیے جو کسان خوشحال تھیسی تاں پاکستان ترقی کریسی جݙاں اساکوں اقتدار ملیاں تاں اوں ویلھے ملک دیوالیہ ہئی اساں اینکوں سنبھالیے ول کورونا آ گیا، اللہ دا شکر ادا کریندوں جو پاکستان 190 ملکاں اچوں انہاں ترائے ملکاں اچ شامل اے جنہاں کورونا توں بچݨ کیتے بہترین منصوبہ بندی کیتی ول دنیا دی تاریخ اچ مہانگ آئی تان جو ہر آزمائش ستوں پاکستان سرخرو تھی تے نکلیا ، ایں مہانگ دے باوجود پاکستان اچ ایں ویلھے 2008ء توں 2013ء دے مقابلے اچ مہانگ گھٹ اے ، پٹرول ، ڈیزل تے 10 روپے اتے بجلی تے 5 روپے فی یونٹ کمی کیتی، قوم توں وعدہ اے او جتنا زیادہ ٹیکس ݙیسی اتنا سرمایہ عوام تے ٻوجھ گھٹ کیتے لیسوں ۔ وزیراعظم آکھیے اساں پاکستان کوں کݙاہیں کہیں دی غلامی نی کرݨ ݙیوݨی ، عمران خان اڄ تئیں نہ کہیں سے سامݨے جھکیے تے نہ جھکسی ، جݙاں تئیں خون دا آخری قطرہ باقی اے قوم کوں جھکݨ نہ ݙیساں وزیراعظم آکھیے جو یورپی یونین دے سفیر پاکستان کوں روس دے خلاف ووٹ ݙیوݨ دا خط لکھیا ، ایں توں میݙا سوال اے جو کیا اوں ہندوستان کوں وی ایجھا خط لکھیے ، پاکستان دہشت گردی دے خلاف جنگ اچ نیٹو دا ساتھ ݙتا، میں اقتدار اچ ہوندا تاں کݙاہیں ساتھ نہ ݙیندا جنگ توں پاکستان کوں 80 ہزار جاناں، 100 ارب ڈالر توں ودھ معاشی ضیان تھئے ، قبائلی علاقہ اجڑ ڳئے، 35 لکھ لوکاں نقل مکانی کیتی، یورپی یونین ݙساوے جو کیااوں ساݙا شکریہ ادا کیتے، الٹا افغانستان جنگ اچ ناکامی دا ذمہ وار پاکستان کوں آکھیے ۔ ، 2008ء توں 2018ء دے دوران 400 ڈرون حملے تھئے ، کیا کݙاہیں اینویں تھئے جو ملک جنگ اچ تساݙا ساتھ ݙیوے تے ایں تے حملے تھیون ۔وزیراعظم آکھیے جے انہاں دے دور اچ کہیں ڈرون حملے دی کوشش کیتی تاں فضائیہ کوں آکھسں جو اینکوں مار ڈھاوے اے قانون دی خلاف ورزی اے، اے جنگل دا قانون اے۔ وزیراعظم آکھیے ساݙی کہیں نال دشمنی کائنی ساریں نال یاری چاہندوں روس، امریکہ، چین اتے یورپ ساریں نال یاری اے اساں غیر جانبدار ہیسے، اساں کہیں کیمپ اچ کائنی ، یوکرائن جنگ تے ساݙا موقف اے جو اے دنیا کیتے نقصان دہ اے، ۔ وزیراعظم آکھیے جو شہباز شریف مقصود چپڑاسی دے اکائونٹ اچ 375 کروڑ روپے پاتے، لندن اچ ٻیٹھا نواز شریف بھگوڑا اتے ایندی دھی فوج کوں برا بھلا آکھدن جݙاں جو شہباز شریف ٻوٹ پالش کریندے ، اے سݨ گھنن جو اے جنرل جیلانی دا زمانہ کائنی زمانہ بدل ڳئے ، شہباز شریف جو مرضی کرے اینکوں نوکراں دے اکائونٹ اچ 16 ارب روپے آوݨ دا حساب ݙیوݨا پوسی ایندا پتر ، جواترا ٻہر بیٹھن انہاں کوں ݙر اے جے اے کیس آ گیا تا اے جیل اچ ہوسی ہیں سنگے اینکوں عدم اعتماد دی جلدی اے۔ وزیراعظم آکھیے عدم ا عتماد گھن آوݨ آلی تریجھی وݙی بیماری زرداری اے، بے نظیر دے اقتدار اچ آندے نال ہی ایں حوالے نال 10 فیصد کمیشن دی دھوم مچ ڳئی ہئی، وزیراعظم آکھیے جݙاں زرداری سرے محل دی ملکیت توں انکار کیتا تاں بعد اچ پاکستان ایندا کیس جتیا اے وڳ ڳئے تے مشرف این آر او ݙتا تاں ایندے پیسے اتے سوئٹزر لینڈ اچ پئے 6 کروڑ ڈالر ہضم کرݙتا ، اے لوک ملک دے حالات خراب ݙکھا تے عدم اعتماد دیاں ڳالھیں کریندن ۔ عدم اعتماد گھن آوݨ آلا چوتھا کردار فضل الرحمان اے جیں کوں میں کݙاہیں مولانا نہ آکھساں اے ڈیزل دے پرمٹ ویچ تے پیسے بݨیندا رہیا ، دھرنے اچ مدرسے دے ٻال بلیک میل کرݨ کیتے اسلام آبادگھن آیا ، انہاں ٻالاں توں پچھیا ڳیا تاں او کیوں آئے تاں انہاں آکھیے جو عمران خان یہودیاں دا ایجنٹ اے، فضل الرحمان ݙساؤے انہاں ڈاکوواں دے ٹولے دے ہوندے ہوئیں یہودیاں کوں پاکستان اچ سازش کرݨ دی لوڑھ کیا اے 2008ءتوں 2018ء تئیں ملک داقرضہ 6 ہزار ارب توں ودھ تے 30 ہزار ارب تئیں پڄ ڳیا ، ٹیکس دی ادھی آمدن انہاں دے قرضے ݙیوݨ اچ لڳ ویندی اے ۔ وزیراعظم آکھیے جو میں سیاست اچ آیا ہی انہاں دا مقابلہ کرݨ کیتے ہاں ، خون دے آخری قطرے تئیں انہاں دا مقابلہ کریساں ، پوری تیاری اے، اے جو کریسن میں ایں کیتے تیار ہاں لیکن ڈاکوواں دا اے گلدستہ یاد رکھے جو عدم اعتماددی تحریک دی ناکامی دے بعد جیڑھا میں انہاں دے نال کریساں اوں کیتے اے تیار رہن۔
