اسلام آباد۔21اپریل(اے پی پی):وزیراعظم محمد شہباز شریف شاعر مشرق علامہ محمد اقبالؒ کوں انہاں دے 85 ویں ورھیݨے دے موقع تے شاندار الفاظ اچ خراج عقیدت پیش کیتے۔ ھک ٹویٹ اچ وزیر اعظم آکھیے جتھاں فکر و عمل دی نشونما کیتے مغربی افکارتوں ترجمانی گھنݨ کوں ترجیح ݙتی ویندی پئی ہئی ، اتھائیں مشرق دے ھک عظیم فلسفی، اقبالؒ اپݨے منفرد فلسفے اتے اردو و فارسی شاعری توں امت مسلمہ کوں ھک انڄ فکری پاسہ ݙتا ۔ وزیر اعظم محمد شہباز شریف آکھیے علامہ محمد اقبال دے 85 ویں ورھیݨے تے میں سودھے پوری قوم اناہں کوں خراج عقیدت پیش کریندی اے۔

اسلام آباد۔21اپریل(اے پی پی) اسلامی تعاون تنظیم (او آئی سی)دے رکن ملکاں اچ روایتی ادوائیں تے ایندے نال جڑیے بائیو میڈیکل سائنسز اچ تعاون کوں مضبوط بݨاوݨ کیتے چینی سائنسداناں تے صنعت کاراں ھک اعلیٰ سطح دا 22 رکنی وفد پاکستان دا دورہ کریسی ۔ اسلامی تعاون تنظیم دے ذیلی ادارے کامسٹیک موجب چینی سائنسداناں تے صنعت کاراں دا وفد ادارہ جاتی اتے صنعتی رابطے دے ذریعے قدرتی مصنوعات، بائیو ٹیکنالوجی، مالیکیولر اتے سیل بائیولوجی اتے روایتی ادوائیں دے شعبیں اچ تحقیق اتے ترقی اچ تعاون کوں ودھارا ݙیوݨ کیتے مفاہمت دی یادداشت تے دستخط کرݨ کیتے 27 اپریل کوں اسلام آباد اچ کامسٹیک سیکرٹریٹ دا دورہ کریسی ۔ مفاہمتی یادداشت تے دستخط توں عوامی جمہوریہ چین اتے او آئی سی دے رکن ملکاں وچال علمی اتے تحقیقی اقدامات کوں مضبوط بݨاوݨ اچ مدد ملسی ۔ دستخطی تقریب دے موقع تے ایں موضوع تے سائنس داناں تے چین اچ دواسازی دی صنعتاں دے نمائندیں دی اہم ڳالھ مہاڑ وی تھیسی۔

اسلام آباد (اے پی پی)وزیراعظم محمد شہباز شریف آکھیےآئین دی پاسداری تے احترام کیتے سارے اداریں تے پوری قوم کوں کٹھے تھیوݨا پوسی ، آئین پارلیمان دی گود توں جنم ڳھدے، عدلیہ آئین دی تشریح کرسڳدی اے لیکن ’’ری رائٹ‘‘نی کرسڳدی ،دنیا اچ کتھائیں کوئی ایجھی مثال کائنی جو پارلیمان دے قانون،جݙاں جو حالی او معرض وجود اچ وی نہ آیا ہووے،تے عدالت حکم امتناعی جاری کرݙیوے ،اساں انشاء اللہ اپݨے سیاسی اثاثے کوں ریاست بچاوݨ دی خاطرقربان کرݨ اچ ھک لمحے کیتے وی نہ ہچکچیسوں ۔ او خمیس کوں اتھاں آئین پاکستان 1973دی موبائل ایپ دے اجراء دی تقریب توں خطاب کریندے پئے ہن ۔ ایں موقع تے وفاقی وزیر اطلاعات ونشریات مریم اورنگزیب،وفاقی وزیرداخلہ رانا ثناء اللہ وی موجود ہن ۔وزیراعظم شہباز شریف آکھیے آئین دے ڈیجیٹل ایپ تے دستیاب ہووݨ توں طلباء و طالبات تے کروڑاں پاکستانی آئین دی منشا تے آئین پاکستان دی بنیادی اساس توں فیدہ چاسڳسن ۔ انہاں آکھیے اے حسن اتفاق اے جو میں 12 اکتوبر1999 کوں پی ٹی وی دی ایں بلڈنگ توں گزریا جݙاں ھک غیرآئینی قدم چاتا ڳیا ہئی تے اڄ الحمد اللہ آئین دے احترام تے آئین دی شقاں کوں ہر خاص وعام تئیں پڄاوݨ کیتے ول ایں عمارت اچ موجود ہاں۔ایں آئین دے بانیان جنھاں اچ سابق وزیراعظم ذوالفقار علی بھٹو، مفتی محمود مرحوم، مولانا شاہ احمد نورانی مرحوم، خان عبدالولی خان جیہی قدآور شخصیات ہن جیڑھی جو آپݨی سیاسی سوچ دے مطابق اپݨی جماعتاں دی قیادت کریندے پئے ہن لیکن آئین پاکستان کیتے انہاں آپݨے سارے اختلافات کوں ھک پاسے رکھیندے ہوئیں ایں آٓئین کوں تخلیق کیتا تے ایں طرح رہندی دنیا تئیں انہاں دا ناں ہمیشہ سنہرے حروف اچ یاد رکھیا ویسی ۔

اسلام آباد۔19اپریل(اے پی پی):صدر مملکت ڈاکٹر عارف علوی سپریم کورٹ (پریکٹس اینڈ پروسیجر) بل 2023 دستخط کیتے بغیر ولا بھیج ݙتے۔ ایوان صدر دے پریس ونگ ݙسائے جو صدر مملکت آکھیے جو قانون سازی دی اہلیت اتے بل دی درستگی دا معاملہ ملک دے اعلیٰ ترین عدالتی فورم اچ زیر سماعت اے، معاملہ زیرسماعت ہووݨ دے احترام اچ بل تے ٻعی کوئی کارروائی مناسب نئیں۔

 اچ ہک جھرلو اتے فراڈ الیکشن نال ملک دی ترقی دا پندھ مُکا ݙتا ڳیا، عمران دور اچ کرپشن دی انتہا تھی ڳی , شہباز شریف

لاہور  (اے پی پی) وزیر اعظم محمد شہباز شریف آکھیا جو 2018اچ  ہک جھرلو اتے فراڈ الیکشن نال ملک دی ترقی دا پندھ مُکا ݙتا ڳیا، عمران دور اچ کرپشن دی انتہا تھی ڳی، پنجاب اچ 65 ارب روپے نال مفت اٹا سکیم شروع کیتی اے۔ پاکستان تحریک انصاف کوں اقتدار اچ ڳھن آوݨ کیتے انتخابی نتیجے بدلیے ڳے، پچھلی حکومت آئی ایم ایف نال جیڑھا بھنیا ترٹا معاہدہ کیتا او اساݙے ڳل پے ڳے ہݨ اساں آئی ایم ایف توں جان چھڑاوݨ وی چاہوں تاں نی چھڑا

سڳدے۔

شاہدرہ فلائی اوور دی تعمیر

 شاہدرہ فلائی اوور دی تعمیر پنجاب حکومت دا منصوبہ اے اتے اساں میٹرو بس سروس کوں کالا شاہ کاکو تئیں ڳھن تے ویسوں۔ سابق چیف جسٹس ثاقب نثار اساݙے سابقہ دور حکومت دے ترقیاتی منصوبیاں کوں نہ رکیندے تاں اڄ پنجاب دے ایجھے حالات نہ ہوندے۔ اے ڳالھیں انہاں چھݨ چھݨ کوں 6رویہ امامیہ کالونی ریلوے کراسنگ فلائی اووراتے ملٹی لیول شاہدرہ چوک فلائی اوور دے افتتاحی منصوبیاں دی تقریب توں خطاب کریندیں ہوئیں آکھی۔

تقریب اچ نگران وزیر اعلیٰ پنجاب محسن نقوی ،وفاقی وزیر تعلیم رانا تنویر حسین،وزیر اعظم دے خصوصی مشیر احد چیمہ، چیف سیکرٹری پنجاب زاہد اختر زمان،سیکرٹری مواصلات کیپٹن (ر)محمد خرم آغا ،آئی جی پنجاب ڈاکٹر عثمان انور،کمشنر تے ڈپٹی کمشنر لاہور اتے اراکین قومی تے صوبائی اسمبلی سمیت اہل علاقہ دی وݙی تعداد شریک ہئی۔

ترقی دا جیڑھا پندھ

تقریب توں خطاب کریندیں ہوئیں وزیراعظم آکھیا جو میکوں خوشی اے جو ترقی دا جیڑھا پندھ اساں پنجاب اچ چھوڑ تے ڳے ہاسے نگران وزیر اعلیٰ محسن نقوی انتہائی جاں فشانی نال اونکوں اڳوں ڳھن تے ٹردے پن۔اچ  ہک جھرلو اتے فراڈ الیکشن نال ملک دی ترقی دا پندھ مُکا ݙتا ڳیا، عمران دور اچ کرپشن دی انتہا تھی ڳی، پنجاب اچ 65 ارب روپے نال مفت اٹا سکیم شروع کیتی اے۔ انہاں آکھیا جو اساکوں قائد اعظم اتے علامہ اقبال دا پاکستان ٻݨاوݨ کیتے یکجہتی،محنت اتے قومی فائدے کوں سامھے رکھݨا پوسی۔

ایں توں پہلے وزیر اعظم محمد شہباز شریف کوں امامیہ کالونی فلائی اوور اتے ملٹی لیول  شاہدرہ چوک فلائی اوور منصوبیاں تے بریفنگ ݙتی ڳی۔

اسلام آباد (اے پی پی)نیشنل الیکٹرک پاور ریگولیٹری اتھارٹی (نیپرا) فی یونٹ بجلی دا ملھ 46 پیسے ودھا ݙتے۔ نیپرا اے ودھارا سہ ماہی فیول پرائس ایڈجسٹمنٹ سانڳے کیتے۔ بجلی ایں مالی سال دی ݙوڄھی سہ ماہی ایڈجسٹمنٹ دی مد اچ مہنگی کیتی گئی اے۔ نیپرا اپݨے فیصلے اچ آکھیے جو بجلی صارفین کوں 3 مہینے اچ وادھو ادائیگیاں کرݨیاں ہوسن۔ بجلی صارفین توں اپریل، مئی اتے جون دے بلاں اچ اضافی وصولیاں کیتان ویسن۔ بجلی مہانگی تھیوݨ نال صارفین تے 15 ارب 45 کروڑ روپے دا وادھو ٻھار پوسی ٻھل اضافی وصولیاں دا اطلاق کے الیکٹرک تے نا تھیسی۔

اسلام آباد۔14اپریل  (اے پی پی) وفاقی وزیر  برائے منصوبہ بندی تے ترقی احسن اقبال 15 رکنی قومی ٹاسک فورس برائے  آرٹیفیشل انٹیلی جنس تشکیل ٻݨا ݙتی اے، ایندے اچ  آرٹیفیشل انٹیلی جنس دے ماہرین، نجی شعبے اتے حکومت دے  نمائندے شامل ہن،ٹاسک فورس آرٹیفیشل انٹیلی جنس کوں معیشت، گورننس اتے تعلیم دے شعبیاں اچ متعارف کراوݨ دا لائحہ عمل تجویز کریسی۔ ایں ڳالھ دا اعلان انہاں ایں ابرے تھیوݨ آلے ہک اجلاس توں ویڈیو لنک توں خطاب اچ کیتا۔ انہاں آکھیا جو آرٹیفیشل انٹیلی جنس  تے دسترس آوݨ آلے دور اچ ترقی دی ضامن اے، معیشت، گورننس اتے تعلیم دے شعبیاں اچ  آرٹیفیشل انٹیلی جنس نال دور رس تبدیلیاں تھیندیاں پن۔ انہاں آکھیا جو ٹاسک فورس حکومت کوں زراعت، گورننس، تعلیم، معیشت دے شعبیاں اچ آرٹیفیشل انٹیلی جنس دے استعمال، فیصلہ سازی اتے ترقی دا 10سالہ روڈ میپ ٻݨاوݨ اچ تعاون کریسی۔ انہاں آکھیا جو   2018  اچ مسلم لیگ (ن ) دی حکومت آرٹیفیشل انٹیلی جنس دا قومی مرکز ٻݨایا ہئی۔

اسلام آباد۔14اپریل  (اے پی پی) عیدالفظر کیتے 21 توں 25 اپریل سرکاری تعطیلات دا اعلان  ،  کابینہ ڈویژن نوٹیفکیشن جاری کر ݙتے ۔ کابینہ ڈویژن توں جاری نوٹیفکیشن موجب عیدالفطر دے موقع تے پنڄ چھٹیاں ہوسن۔ اعلامیہ اچ ݙسیا ڳیا جو عیدالفطر دی چھٹیاں 21 اپریل جمعہ توں 25 اپریل منگل تئیں ہوسن۔

اسلام آباد۔14اپریل(اے پی پی سرائیکی نیوز سروس)  تحریک انصاف دے مرکزی اگواݨ اعظم سواتی خسرو بختیار بارے آکھے جو خسرو بختیار تحریک انصاف دے متھے تے کالا دھبہ اے  تے اے آکھیا اے کہ جو ذاتی فیدے  کیتے خسرو بختیار پی ٹی آئی اچ  آئے ہن تے جیڑھلے عمران خان تے اوکھا ویلھا آئے تاں غیب تھی گئے انھاں دا بیا آکھݨ ہا جو ہݨ خسرو بختیار کوں  تحریک انصاف دا ٹکٹ نہ ڈیسوں او تحریک انصاف توں  فارغ تھی گئین۔ خسرو بختیار وکھو وکھ دور اچ سیاسی پارٹیاں بدلدے ریہن ۔  مخدوم خسرو بختیار دے حلقے اچ سندھ دریا دے کٹاؤ پاروں  سینکڑاں وستیاں چھل دے پانڑی اچ آونڑ پاروں گھر تے فصلاں تباہ تھی گئین ۔ مسیتاں تے مزار دریا دے پانڑی اچ آگئے جیڑھلے متاثرین  مخدوم خسرو بختیار توں مدد دی  اپیل کیتی تاں مخدوم خسرو بختیار متاثرین کوں جواب ڈتا جومیں ووٹ مل گھنداں تے تساڈے وڈیرے رقم گھن ویندن  میں مدد نمی کرسگدا ۔مخدوم خسرو بختیار اتے مخدوم ہاشم جواں بخت ہک روپے دی مدد نہ کیتی۔ ہک نجی ٹی وی دے پروگرام اچ ہک  سوال دے جواب اچ سرائیکی لفظ تے صوبے دی تحریک دی وی حمایت نہ کیتی ۔سرائیکی اگواݨ ظہور دھریجہ دا آکھݨ ہا جو  خسرو بختیار دے حلقے اچ وکھو وکھ برادریاں ان جنھاں اچ گھلیجہ ، کورائی ، جتوئی ، آرائیں ،  دشتی ، لولائی ، گوپانگ ، رند تے ڈوجھیاں وڈیاں برادریاں ان تے ہݨ انھاں کوں سوچ سمجھ تے ووٹ  ڈیوݨاں چاہیدا اے۔

اسلام آباد۔14اپریل  (اے پی پی) وفاقی وزیر برائے تخفیف غربت اتے سماجی تحفظ شازیہ مری آکھیا جو بے نظیر انکم سپورٹ پروگرام دا بجٹ 235ارب توں ودھا تے 400 ارب روپے کر ݙتا ڳے۔ اسلام آباد اچ معاون خصوصی برائے  تخفیف غربت اتے سماجی تحفظ فیصل کریم کنڈی دے رَلے ہک نیوز کانفرنس توں خطاب کریندیں ہوئیں آکھیا جو نوے لکھ ٹٻراں دی کفالت پروگرام دا حصہ ہن۔ انہاں آکھیا جو بی آئی ایس پی دے تحت وظیفہ 7000 توں ودھا تے 8750 روپے کر ݙتا ڳے۔ شازیہ مری آکھیا جو ملک دے 28 لکھ چھل توں متاثرہ ٹبراں اچ ستر ارب روپے تقسیم کیتے ڳن۔ انہاں آکھیاجو پی ٹی آئی حکومت دی ناقص پالیسیاں پاروں غریب اتے متوسط طبقے دے لوک مہانگ دا شکار ہن۔ انہاں آکھیا جو بینظیر تعلیم وظیفہ حاصل کرݨ آلے ٹبراں دی تعداد 2.6 ملین توں ودھا تے 7.1 ملین تھی ڳی اے۔  معاون خصوصی برائے تخفیف غربت تے سماجی تحفظ فیصل کریم کنڈی آکھیا جو پاکستان پیپلز پارٹی اڳوں ودھاوݨ کیتے مذاکرات تے یقین رکھیندی اے۔

اسلام آباد۔14اپریل  (اے پی پی) وزیراعظم دی ٻݨائی ڳی خصوصی کمیٹی ، کنڑک، کھنڈ، کھاد اتے ٻی شہیں دی ملک توں ٻاہر سمگلنگ کوں خوراک اتے قومی سلامتی کیتے وݙا مسئلہ قرار ݙیندیں ہوئیں پولیس ، کسٹم اتے ٻے قانون دے اداریاں تے مشتمل جوائنٹ چیک پوسٹ ٻݨاوݨ دی منظوری ݙتی اے، جوائنٹ پٹرولنگ دا وی آغاز جلدی کر ݙتا ویسی۔ وزیراعظم شہباز شریف دی ہدایات تے ٻݨی خصوصی کمیٹی دا وفاقی وزیرداخلہ رانا ثنا اللہ خان ، وزیر دفاع خواجہ محمد آصف دی صدارت تریجھا اجلاس جمعے کوں تھیا۔اجلاس اچ وزیر تجارت سید نوید قمر، وزیر صنعت مخدوم مرتضیٰ محمود، معاون خصوصی برائے ریوینیو طارق محمود پاشا،سیکرٹری داخلہ سید علی مرتضیٰ، چیئرمین فیڈرل بورڈ آف ریونیو آصف احمد اتے وفاقی تے صوبائی اداریاں دے نمائندے شریک تھیے۔ وزیر داخلہ رانا ثنا اللہ خان اجلاس توں خطاب کریندیں ہوئیں آکھیا جو کھاوݨ پیوݨ دی شہیں ملک توں ٻاہر سمگلنگ نا صرف اساݙی فوڈ سکیورٹی بلکہ نیشنل سیکیورٹی دا مسئلہ اے۔

اسلام آباد۔14اپریل  (اے پی پی) پاکستان انٹرنیشنل ایئر لائن (پی آئی اے) عیدالفطر تے ساری مقامی پروازاں دے کرایاں اچ ݙاہ فیصد ڳھٹکی دا اعلان کیتے۔ ترجمان پی آئی اے موجب اے سہولت 22 اتے 23 اپریل 2023ء کوں مقامی پروازاں تے سفر کرݨ آلیاں کیتے ہوسی۔

اسلام آباد۔11اپریل  (اے پی پی) پیپلزپارٹی سرائیکی وسیب دی کلچرل ونگ دے سیکریٹری اطلاعات راشد عزیز بھٹہ کیتے جو سرائیکی وسیب دے ضلع راجن پور اچ  داجل دے نیڑھے مولا علی علیہ السلام دے 18 ویں پتر حضرت امیر حمزہ سلطان ابن علی دا مزار تے توجہ ݙتی ونڄے جیندی نگرانی محکمہ اوقاف دی ذمہ واری اے۔ انہاں آکھیا جو ایں مزار تے ملک دے اندروں تے باہرلے ملکیں توں زائرین آندن پر افسوس زائرین سانگے پیوݨ دے صاف پاݨی کیتے فلٹر پلانٹ موجود کائینی اتے زائرین دی  رہائش سانگے وی محکمہ اوقاف پنجاب کوئی کم نی کیتا۔  سرائیکی وسیب دے حقوق کیتے جدوجہد کرݨ آلے سرائیکی وسیب اچ پیپلزپارٹی دی کلچرل ونگ دے عہدیدار سئیں راشدعزیزبھٹہ آپدے  ساتھیاں دے کٹھےحضرت امیر حمزہ ابن علی ع دے مزار تے پجے تے زیارت کیتی ۔ مزار دے متولی مظاہر حسین سئیں نال وی  ملاقات کیتی۔ مزار دے متولی خادم دربار مظاہر حسین ڈسایا جو  مزار تے آوݨ آلے زائرین دیاں اوکھائیاں مکاوݨ سانگے حکومت پنجاب اقدامات کرے ۔انھاں دا آکھݨ ہا  داجل سڑک ترٹ بھج دا شکار اے ۔ اساݙا مطالبہ اے جو مزار دے نیڑھے  کمپلیکس ٻݨایا ونجے ۔مزار دے متولی مظاہر حسین راشد عزیز بھٹہ توں اپیل کیتی جو او مسئلہ تےاواز چاون اتے اعلی حکام دی توجہ وسیب دے ایں مزار پاسے ڈیواون۔ انہاں مطالبہ کیتا جو زائرین دی سہولت کیتے مزار تے فلٹریشن پلانٹ لاتا وںجے اتے زائرین دی رہائش کیتے وی مناسب بندوبست کیتا ونجے۔

اسلام آباد۔11اپریل  (اے پی پی) وفاقی وزیر خزانہ تے محصولات سینیٹر محمد اسحاق ڈار  ہوابازی دے شعبے اچ بہتری بارے کیتے ڳے اقدامات اتے کوششاں دی تعریف کریندیں ہوئیں   پی آئی اے دی تنظیم نو بارے کیتے ڳے اقدامات اچ ایوی ایشن ڈویژن کوں ہرممکن تعاون دا یقین ݙوایا۔ اے ڳالھیں اناہں منگل کوں شہری ہوا بازی بارے اجلاس دی صدارت کریندیں ہوئیں آکھی۔ اجلاس اچ   وفاقی وزیر ریلوے و ہوابازی خواجہ سعد رفیق،  سیکرٹری ایوی ایشن، معاون خصوصی طارق باجوہ، سپیشل سیکرٹری خزانہ اتے  ایوی ایشن دے سینئر افسر شریک تھیے۔ اجلاس اچ وفاقی وزیر ہوا بازی خواجہ سعد رفیق  وزیرخزانہ کوں آئی ایف نال ملک دے ترائے وݙے ہوائی اݙیاں دی آؤٹ سورسنگ معاہدے بارے پیشرفت تے ݙسیا۔

اسلام آباد۔11اپریل  (اے پی پی) وزیر خارجہ بلاول بھٹو زرداری نال پاکستان اچ ایران دے سفیر سید محمد علی حسینی منگل کوں الوداعی ملاقات کیتی۔ دفتر خارجہ موجب وزارت خارجہ اسلام آباد اچ تھیوݨ آلی ملاقات اچ پاکستان اتے ایران وچال ݙو پاسہ تعلقات تے ڳالھ مہاڑ تھئی۔ ایں موقع تے وزیر خارجہ بلاول بھٹو زرداری آکھیا جو پاکستان ایران نال سارے شعبیاں اچ اپݨے تعلقات کوں اہمیت ݙیندے۔ انہاں آکھیا جو ایران سعودی عرب سفارتی تعلقات دی بحالی خطے دے امن کیتے ٻہوں اہم اے۔ وزیر خارجہ پاکستان اچ تعیناتی وچال پاک ایران تعلقات بارے سید محمد علی حسینی دی خدمات دی تعریف کیتی۔

اسلام آباد۔11اپریل  (اے پی پی) وزیر خارجہ بلاول بھٹو زرداری آکھیا جو سعودی عرب ایران سفارتی تعلقات دی بحالی خطے دے امن کیتے ٻہوں اہم اے۔ اے ڳالھیں انہاں پاکستان اچ  سعودی عرب دے سفیر نواف بن سعید المالکی نال ملاقات اچ آکھی جنہاں منگل کوں وزارت خارجہ اچ انہاں نال ملاقات کیتی۔ ملاقاتا چ پاکستان اتے سعودی عرب وچال ݙو پاسہ تعلقات کوں اہمیت ݙیندے۔ وزیر خارجہ ملاقات اچ سعودی قیادت کیتے نیک خواہشات دا اظہار کیتا۔ انہاں ہر اوکھ اچ پاکستان دے نال تھیوݨ تے سعودی قیادت دا شکریہ ادا کیتا۔

اسلام آباد (اے پی پی) وزیراعظم محمد شہباز شریف دی کوئٹہ اچ دھماکے دی شدید مذمت کریندیں ہوئیں دہشت گرد حملے بارے متعلقہ حکام توں رپورٹ منڳ ڳھدی اے۔ سنوار کوں وزیراعظم آفس دے میڈیا ونگ توں جاری بیان موجب وزیراعظم زخمیاں کوں ہرممکن طبی امداد ݙیوݨ دی ہدایت کیتی۔ وزیراعظم دہشت گرد حملے بارے متعلقہ حکام توں رپورٹ منڳ ڳھدی اے۔ انہاں دھماکےا چ شہید تھیوݨ آلیاں دے درجات دی بلندی دی دعا اتے لواحقین نال تعزیت کیتی۔

اسلام آباد (اے پی پی) وزیراعظم محمد شہباز شریف آکھیا جو سیاسی زعماء مفاہمت دے رستے ٹر تے 1973 دا متفقہ آئین ٻݨا تے تاریخ رقم کیتی، اتحادی حکومت رَل تے چیلنجز نال لڑدی پئی اے۔ آئین دی گولڈن جوبلی تقریبات بارے قومی اسمبلی ہال اچ تھیوݨ آلے کنونشن اچ آئین دی گولڈن جوبلی قرارداد پیش کریندیں ہوئیں اپݨے خطاب اچ انہاں آکھیا جو ݙاہ اپریل پاکستان دی تاریخ دا اہم ݙینھ اے۔ انہاں کنونشن اچ زندگی دے مختلف شعبیاں توں تعلق رکھݨ آلے شرکاء دا خیر مقدم کریندیں ہوئیں آکھیا جو مختلف موقعیاں تے آئین اچ تھیوݨ آلی ترامیم دے باوجود زندہ اے۔ انہاں آکھیا جو ملک اچ آئین دی حکمرانی اتے انصاف دے بول بالا کیتے مختلف نظریات اتے سوچ رکھݨ آلی جماعتاں رَل ٻہہ تے آئین ٻݨائے۔ ذوالفقار علی بھٹو شہید، مولانا مفتی محمود، مولانا شاہ احمد نورانی سودھے ٻے زعماء ایجھا کارنامہ سرانجام ݙتے جئیں کوں بھلایا نی ونڄ سڳدا۔ انہاں آکھیا جو 1999 اچ پہلی واری نظریہ ضرورت کوں ایجاد کیتا ڳیا اتے کینویں ہک چیف جسٹس ہک ڈکٹیٹر کوں ست سال دی رعایت ݙتی۔ انہاں سپیکر قومی اسمبلی راجہ پرویز اشرف اتے سینیٹر میاں رضا ربانی کوں گولڈن جوبلی تقریبات کراوݨ تے مبارخ ݙتی۔

اسلام آباد (اے پی پی) وفاقی وزیر اطلاعات تے نشریات مریم اورنگزیب آکھیا جو ہر سال ‏10 اپریل کوں قومی یوم دستور منایا ویسی۔ سنوار کوں اپݨے ٹویٹ اچ وفاقی وزیر اطلاعات مریم اورنگزیب آکھیا جو 1973 دے آئین دے پنڄاہ سال پورے تھیوݨ تے تھیوݨ آلے قومی آئین کنونشن اچ وزیراعظم شہباز شریف دی پیش کیتی قرارداد منظور کر ڳھدی ڳی اے۔ ایں ݙینھ کوں مناوݨ دا مقصد ملک کیتے آئین دی اہمیت، شہریاں دے حقوق، ریاستی اداریاں دے فرائض نال عوام کوں آگاہ رکھݨ اے۔

اسلام آباد (اے پی پی) چیئرمین سینیٹ محمد صادق سنجرانی یوم آئین دے موقع تے قوم کوں مبارخ ݙتی اے۔ سینٹ سیکرٹریٹ موجب اپݨے سنیھے اچ چیئرمین سینیٹ پاکستان دے آئین کوں جمہوریت دا بنیادی ستون قرار ݙتے جیڑھا جو انصاف، مساوات اتے ساریاں کیتے آزاری کوں برقرار رکھیندے۔ انہاں پاکستانی آئین دے اصولاں کوں برقرار رکھیندیں ہوئیں ہک مضبوط اوتےر خوشحال پاکستان دی تعمیر کیتے رَل تے کم کرݨ دی لوڑھ تے زور ݙتے۔ انہاں پاکستان دے آئین کوں برقرار رکھݨ دے اپݨے عہد دی تجدید کیتی اتے قوم تے زور ݙتے جو او اینویں کرن۔ انہاں پاکستان دی ترقی تے خوشحالی کیتے نیک خواہشات دا اظہار کیتا۔

اسلام آباد (اے پی پی)وفاقی وزیر منصوبہ بندی اتے ترقی احسن اقبال آکھیے جو پورے ملک اچ انتخابات اکتوبر کوں ہی تھیسن، پنجاب اچ پہلے انتخابات کراوݨ نال فساد ہی نئیں آئینی مسلے سامݨے آوݨ دا وی چنتا اے۔ نارووال اچ تقریب نال خطاب کریندے انہاں آکھیا جو ملک اچ ایں ویلھے وݙا آئینی و سیاسی بحران چلدا پئے، 1971 اچ اینڄھے انتخابات دے نتائج ٻھوڳ چکیے ہیں، صوبے برابر دی اکائیاں ہین جیندے نال ہی وفاق ٻندے، جیکر پنجاب اچ پہلے انتخابات تھئے تاں وفاق کوں پنجاب دے تلے لا ݙتا ویسی۔ انہاں آکھیا جو سپریم کورٹ کوں ساریاں کوں سݨ تے ہی کوئی فیصلہ کرݨا چاہیدا ہا، پتا نئیں کیا جلدی پئی ہئی جو اے فیصلہ آئے۔ احسن اقبال آکھیا جو صدر مملکت دا ترمیمی بل پاس نہ کرݨ ہک غیر آئینی عمل اے، امید اے چیف جسٹس ایں بحران توں ملک کوں کݙھسن۔

لاہور (اے پی پی)نگران وزیراعلی پنجاب محسن نقوی دی زیر صدارت وزیراعلی آفس اچ سڑکاں دی تعمیر دے منصوبیاں اچ اڳونہی دا جائزہ ڳھدا ڳئے اتے اجلاس لوکاں کوں ودھ سوکھ ݙیوݨ کیتے صوبے اچ سڑکاں دی تعمیر اتے مرمت دے جاری منصوبے ویلھے تے مکمل کرݨ دی ہدایت کیتی ڳئی جو موٹر وے نال شہراں کوں ملاوݨ آلیاں سڑکاں ترجیحی بنیاداں تے مکمل تھیوݨیاں چاہیدن۔ وزیر اعلیٰ رابطہ سڑکاں دی تعمیرومرمت ویلھے تے کرݨ، پیچ ورک اتے روڈ شولڈر دی بحالی سودھا ویلھے تے تعمیر کوں ترجیح ݙیوݨ دی ہدایت کیتی۔ اجلاس اچ سڑکاں دے جاری منصوبیاں بارے بریفنگ ݙتی ڳئی جو صوبے اچ سڑکاں دی تعمیر و مرمت ے ہک ہزار 819 منصوبے زیر تکمیل ہین۔ صوبائی وزیر تعمیرات و مواصلات بلال افضل، چیئرمین منصوبہ بندی و ترقیات، سیکرٹری خزانہ، سیکرٹری تعمیرات و مواصلات اتے متعلقہ حکام اجلاس اچ شرکت کیتی۔

اسلام آباد (اے پی پی)وفاقی وزیراطلاعات و نشریات مریم اورنگزیب آکھیے جو اقتدار دی ٻکھ اچ بزدل عمران خان غیر ملکی لابی فرمز دیاں سازشاں نال حقیقی آزادی دی جنگ لڑدا ودے، جیڑھا اپݨی دھی کوں عزت نئیں ݙے سڳیا، ڄیڑھا کرسی دے لالچ اچ گھر دیاں تریمتیں کوں چوری اتے منی لانڈرنگ کیتے استعمال کرے، کالے ݙبے اچ منہ لکا تے ٻاھرو نکلے او جنگ نئیں لڑدا ٻھل بزدل سݙویندے۔ عمران خان دے بیان اچ ولدا ݙیندے مریم اورنگزیب آکھیا جو عمران خان او دلیر اے ڄیڑھا کالے ݙبے توں منہ ٻاھرو نئیں کݙھ سڳدا اتے کتھائیں منہ پاوݨ دا نئیں او نوازشریف کوں بزدل آہدے۔ انہاں آکھیا جو بزدل او ہوندے جیڑھا تریمتیں اتے ٻالاں کوں اپݨی اݙ ٻݨا تے آپ کٹھڑے ہیٹھ لک وںجے، او بزدل ہوندے جیڑھا کُرسی دی خاطر ملک دے خلاف سازش کریندے۔

اسلام آباد  (اے پی پی):وزیراعظم محمد شہباز شریف سگریٹ دی صنعت اچ ٹیکس چوری روکݨ کیتے فوری اقدامات اتے آندے ݙو ہفتیاں اچ ملک اچ سگریٹ دے سارے کارخانیاں تے ٹریک اینڈ ٹریس سسٹم لاوݨ دی ہدایت کیتی اے۔ وزیراعظم آفس دے میڈیا ونگ توں جاری بیان موجب وزیرِاعظم محمد شہباز شریف دی صدارت ملک اچ سگریٹ سازی دی صنعت اچ وزیراعظم شہباز شریف دی صدارت سگریٹ سازی دی صنعت اچ خودکار ٹریک اینڈ ٹریس سسٹم لاوݨ، پوائنٹ آف سیلز اتے مجموعی طور تے ٹیکس دا حجم ودھاوݨ بارے جائزہ اجلاس تھیا۔ وزیراعظم اجلاس توں خطاب کریندیں ہوئیں آکھیا جو قانون نافذ کرݨ آلے اداریاں کوں ہدایت کیتی جو سمگلنگ اتے غیر قانونی سگریٹ ویچݨ اچ ایف بی آر کوں ہر قسم دا تعاون کیتا ونڄے۔ وزیراعظم شوگر ملاں تے ہݨ تئیں خودکارٹریک اینڈ ٹریس سسٹم نہ لاوݨ کیتے ذمہ داراں دا تعین کر تے انکوائری رپورٹ پیش کرݨ دی ہدایت کیتی۔ اجلاس اچ وفاقی وزراء اسحاق ڈار، رانا ثناء اللہ خان، مخدوم مرتضیٰ محمود، اعظم نذیر تارڑ، مشیرِ وزیرِ اعظم احد خان چیمہ، معاونین خصوصی جہانزیب خان، طارق پاشا اتے متعلقہ اعلیٰ حکام شریک تھیے۔

بیجنگ   (اے پی پی) وفاقی وزیر برائے منصوبہ بندی، ترقی اتے خصوصی اقدامات پروفیسر احسن اقبال منگل کوں چین دے نائب وزیر خارجہ سن ویڈونگ بیجنگ اچ ملاقات کیتی۔ ایں موقع تے ݙوپاسہ تعلقات سودھے مختلف شعبیاں تے ڳالھ مہاڑ کیتی ڳی۔ انہاں رلے وزیراعظم دے معاون خصوصی طارق باجوہ،چین اچ پاکستان دے سفیر معین الحق اتے سفارتخانہ دے حکام وی موجود ہن۔ ݙوہیں فریقاں پاک چین لازوال دوستی اتے ’’ سدا بہار سٹرٹیجک کوآپریٹو پارٹنرشپ‘‘ دی اہمیت کوں اجاگر کیتے۔ ݙوہیں فریقاں ݙوپاسہ تعلقات دے سارے پہلواں دا جائزہ ڳھدے جئیں اچ چین پاکستان اقتصادی راہداری (سی پیک ) دے تحت تعاون، تجارتی، اقتصادی اتے مالیاتی تعاون، ثقافتی تبادلے اتے عوام وچال تعلقات شامل ہن اتے تعاون کوں ٻیا مضبوط ٻݨاوݨ دا عزم کیتے۔ وفاقی وزیر منصوبہ بندی ملک دی معاشی مشکلات کوں ڳھٹ کرݨ اتے کورونا وبائی امراض وچال پاکستان دی اہم حمایت تے چینی فریق دا شکریہ ادا کیتا۔ ایں سال جولائی اچ بیلٹ اینڈ روڈ انیشیٹو (بی آر آئی) اتے سی پیک دی ہک ݙھاکا پورا تھیوݨ دا ذکر کریندیں ہوئیں وزیرمنصوبہ بندی ایں سنگ میل کوں شایان شان انداز اچ مناوݨ دے حکومتی عزم دا اظہار کیتا۔

اسلام آباد  (اے پی پی) سپیکر قومی اسمبلی راجہ پرویز اشرف نال سعودی سفیرنواف بن سعید المالکی منگل کوں پارلیمنٹ ہاؤس اچ ملاقات کیتی جئیں اچ ݙوپاسہ تعلقات سودھے آپسی دلچسپی دے معاملیاں تے ڳالھ کیتی ڳی۔ سپیکر سعودی سفیر نال ڳالھ مہاڑ کریندیں ہوئیں آکھیا جو پاکستان اتے سعودی عرب وچال برادرانہ تعلقات مذہب، ثقافت اتے مشترکہ روایات دے مضبوط رشتیاں اچ بدھین۔ ݙوہیں برادرملک آزمائش ویلھے ہک ݙوجھے نال کھڑن۔ سعودی عرب ہمیشہ پاکستان دی سماجی اتے اقتصادی ترقی اچ دل کھول تے کردار ادا کیتے۔ پاکستان سعودی عرب نال ݙو پاسہ تجارت ودھاوݨ کیتے پرعزم اے۔ آپسی فائدے کیتے مختلف شعبیاں اچ تعاون ضروری اے۔

اسلام آباد  (اے پی پی) وزیراعظم محمد شہباز شریف معاون خصوصی برائے پبلک پالیسی اینڈ سٹریٹجک کمیونیکیشن فہد حسین دی ملک دی خدمات دا اعتراف کریندیں ہوئیں انہاں کیتے اپݨے ٹویٹ اچ نیک خواہشات دا اظہار کیتے۔ منگل کوں اپݨے ٹویٹ اچ انہاں ملک دی خدمات کیتے فہد حسین دا شکریہ ادا کیتا اتے آکھیا جو پبلک پالیسی اینڈ سٹریٹجک کمیونیکیشن بارے میݙے معاون خصوصی دے طور میکوں انہاں دے دانشمندانہ مشوریاں دا ٻہوں فائدہ تھیے۔ انہاں آکھیاجو میں تساں کوں ہک شاندار ٹیم پلیئر اتے ہک عظیم انسان پاتے۔

اسلام آباد  (اے پی پی) وفاقی وزیر قانون تے انصاف سینیٹر اعظم نذیر تارڑ سپر یم کورٹ دے فیصلے تے افسوس کریندیں ہوئیں آکھیا جو سپریم کورٹ پارلیمان،حکومت، اتحادی جماعتاں، بارکونسلز اتے سول سوسائٹی دے مطالبے تے غور نی کیتا، 3رکنی بنچ دے فیصلے تے ݙکھ تے افسوس کیتا ونڄ سڳدے، ،،ازخود نوٹس ، دائر اختیار سمیت قانونی اتے آئینی معاملات کیتے 13 رکنی بنچ ٻݨایا ونڄے۔ او منگل کوں سپریم کورٹ دے فیصلے دے بعد پریس کانفرنس توں خطاب کریندیں ہوئیں آکھی۔ وفاقی وزیر قانون تے انصاف سینیٹر اعظم نذیر تارڑ آکھیا جو سپریم کورٹ آف پاکستان ݙو صوبیاں اچ الیکشن بارے مختصر فیصلہ ݙتے۔ انہاں آکھیا جو اڄ دے فیصلے نال ملک اچ جاری سیاسی اتے آئینی بحران ٻیا سنگین اتے ڳھاٹا تھیسی۔ انہاں آکھیا جو اڄ سپریم کورٹ دے فیصلے نال چھی رکنی بنچ ٻݨا ݙتا ڳے جئیں دی سربراہی جسٹس اعجاز الاحسن کریسن جو ایں ڳالھ دا ثبوت اے جو اٹارنی جنرل جسٹس قاضی فائز عیسی دے ازخود نوٹس بارے فیصلہ بارے کل جیڑھے دلائل ݙتے او درست ہن۔ وفاقی وزیر سینیٹر اعظم نذیر تارڑ آکھیا جو اٹارنی جنرل اتے الیکشن کمیشن عدالت عظمی اچ بحث کیتی جو قانون اتے آئین دا تقاضا اے جو پہلے مقدمے دی پہلے سماعت کرن اتے بعد آلے کوں بعد اچ کرن۔ انہاں آکھیا جو وزیراعظم اتے پارلیمان قرار داد دے ذریعے سپریم کورٹ توں مطالبہ کیتے جو اجتماعی سوچ آلے پاسے ودھیا ونڄے۔

راولپنڈی ۔1اپریل (اے پی پی) ایرانی سرزمین توں دہشت گردی دی کارروائیاں اچ ملوث دہشت گرداں دے ہک گروپ ضلع کیچ دے جلگئی سیکٹر اچ پاکستان-ایران سرحد تے تعینات پاکستانی سکیورٹی فورسز دے معمول دے سرحدی گشت وچال حملہ کیتا جئیں اچ چار جوان شہید تھی ڳے۔ چھݨ چھݨ کوں آئی ایس پی آر توں جاری پریس ریلیز موجب حملے اچ بدقسمتی نال نائیک شیر احمد، لانس نائیک محمد اصغر، سپاہی محمد عرفان اتے سپاہی عبدالرشید سودھے چار فوجی شدید زخمی تیے اتے بعد اچ شہید تھی ڳے۔ آئی ایس پی آر ولوں ٻیا آکھیا ڳیا جو ایران ولوں دہشتگرداں دے خلاف موثر کاروائی اتے مستقبل اچ ایجھے واقعیاں کوں روکݨ کیتے رابطہ کیتا ویندا پے۔

اسلام آباد۔1اپریل (اے پی پی) خاتون اول بیگم ثمینہ علوی آٹزم سپیکٹرم ڈس آرڈر (اے ایس ڈی) بارے ودھ توں ودھ آگاہی، سازگار ماحول نال معاشرے اچ تبدیلی تے زور ݙتے تانجو ودھ توں ودھ تفہیم پیدا تھیوے۔ والدین کوں ابتدائی مداخلت دے علاج دی ترغیب ݙتی ونڄے اتے معاشرے اچ آٹزم دے شکار لوکاں دے ودھ توں ودھ انظمام کوں یقینی ٻݨایا ونڄے۔خاتون اول بیگم ثمینہ علوی چھݨ چھݨ کوں شفا انٹرنیشنل ہسپتال اچ عالمی آٹزم ڈے دے موقع تے تھیوݨ آلے سیمینار توں خطاب کریدنیں ہوئیں آکھیا جو اساݙے معاشرے اچ معذوری دے پھیلاؤ دےباوجود، معذور لوکاں کوں شمولیت اتے شرکت اچ ٻہوں رکاوٹاں ہن۔ انہاں کوں امتیازی سلوک،بدنظمی اتے ضروری خدمات جینویں تعلیم، صحت دی ݙیکھ ٻھال اتے روزگار اچ ڳھٹکی دا سامݨا کرݨا پوندے۔ انہاں آکھیا جو اے اساݙی ذمہ واری اے جو معاشرے دے سارے شعبیاں اچ انہاں کوں ودھ توں ودھ شمولیت کوں ودھا تے معذوراں کیتے سماجی رکاوٹاں ختم کرݨ کیتے کم کروں۔ انہاں آٹزم سپیکٹرم ڈس آرڈر (اے ایس ڈی) بارے ودھ توں ودھ آگاہی، سازگار ماحول نال معاشرے اچ تبدیلی تے زور ݙتا۔

اسلام آباد۔1اپریل (اے پی پی) وفاقی وزیر خزانہ ومحصولات سینیٹر محمد اسحاق ڈار نال چھݨ چھݨ کوں سابق وزیراعظم سید یوسف رضا گیلانی اتے وفاقی وزیر آبی وسائل سید خورشید شاہ ملاقات کیتی۔ سید یوسف رضا گیلانی نال ملاقاتا چ سینیٹ بارے معاملیاں دا جائزہ ڳھدا ڳیا۔ وزیرخزانہ سید خورشید شاہ نال ملاقات اچ وزارت آبی وسائل بارے ڳالھ مہاڑ کیتی۔

اسلام آباد۔30مارچ(اے پی پی) وزیرِاعظم محمد شہباز شریف نال جمعیت علماء اسلام دے سربراہ مولانا فضل الرحمن وزیرِ اعظم ہاؤس اچ خمیس کوں ملاقات کیتی ۔ وزیراعظم آفس دے میڈیا ونگ توں جاری بیان موجب مولانا فضل الرحمن نے وزیرِاعظم محمد شہباز شریف کوں سپریم کورٹ پریکٹس اینڈ پروسیجر ٻل دی پارلیمنٹ توں منظوری تے مبارخ ݙتی ، انہاں وزیرِاعظم کوں اتحادیاں دی طرفوں پورے تعاون دا یقین ݙیوائے ۔ ملاقات اچ موجودہ ملکی سیاسی صورتحال تے وی تفصیلی مشاورت کیتی ڳئی ۔

اسلام آباد(اے پی پی) وفاقی وزیر برائے قانون انصاف سینیٹر اعظم نذیر تارڑ آکھیا جو ملک اچ پہلی واری ڈیجیٹل مردم شماری تھیندی پی اے جیڑھی جو 30 اپریل تئیں پوری تھیوݨی اے، مردم شماری دے تحت آندے انتخابات آئینی معاملہ اے حتمی مردم شماری تھی ڳی تاں انتخابات نویں حلقہ بندیاں دے تحت تھیسن۔ خمیس کوں سینیٹ اجلاس اچ سینیٹر بہرہ مند تنگی اتے سینیٹر ہدایت اللہ دے سوال دے جواب اچ انہاں آکھیا جو 2017 اچ مردم شماری تے کافی اعتراضات آئن، 2018 دے انتخابات کوں قانونی حیثت ݙیوݨ کیتے آرٹیکل 51 اچ ترمیم کر تے ہک ویلھے کیتے پرویژنل مردم شماری کراوݨ دی موکل ݙتی ڳی۔ اڄوکی حکومت 2022-23 دے مالی سال اچ مردم شماری کیتے 35 ارب روپے رکھین۔

اسلام آباد  (اے پی پی) صدر مملکت ڈاکٹر عارف علوی یونیورسٹی دے ریٹائرڈ پروفیسر دی پنشن بارے وفاقی محتسب دا فیصلہ برقرار رکھیندیں ہوئیں بین الاقوامی اسلامی یونیورسٹی اچ 14 سال تئیں خدمات ݙیوݨ آلے پروفیسر کوں سپریم کورٹ دے فیصلے دی روشنی اچ پنشن ݙیوݨ دا حکم ݙتے۔ ایوان صدر دے پریس ونگ موجب صدر مملکت ڈاکٹر عارف علوی سماعت اچ یونیورسٹی پروفیسردے دعوے کوں منیے اتے ازالے دا یقین ݙوائے۔ صدرمملکت آکھیا جو قانون توں ہٹ تے پنشن دے حق توں محروم یا دیر دی موکل نی ݙتی ونڄ سڳدی۔ پروفیسر ڈاکٹر علی اصغر چشتی بین الاقوامی اسلامی یونیورسٹی اچ 14 سال بطور فیکلٹی ممبر خدمات ݙتی ہن، پروفیسر چشتی قانون اتے قاعدے دے مطابق علامہ اقبال اوپن یونیورسٹی اچ ملازمت اختیار کیتی۔ 2020 ء اچ علامہ اقبال یونیورسٹی نال ریٹائرمنٹ تے سابقہ یونیورسٹی نال پنشن شیئر دی منتقلی دی درخواست کیتی۔

اسلام آباد  (اے پی پی) وزیراعظم محمد شہباز شریف شیخ منصور بن زید النیہان کوں متحدہ عرب امارات دے نائب صدر دے طور تے تقرری تے پاکستان دی عوام اتے حکومت ولوں انہاں کوں مبارخ ݙتی۔ خمیس کوں اپݨے ٹویٹ اچ وزیراعظم شیخ منصور بن زید النیہان کوں مبارخ ݙیندیں ہوئیں دعا کیتی جو انہاں دی تقرری متحدہ عرب امارات اتے اوندی عوام کیتے کامیابی اتے خوشحالی دا نواں باب ہووے۔

اسلام آباد (اے پی پی)وزیرداخلہ رانا ثناء اللہ خان آکھیے جو اڄوکے ملکی حالات اچ صبر اتے سمڄھداری نال فیصلے کرݨے ہوسن نتاں ملک اچ سیاسی و معاشی استحکام نہ آسی، قومی و صوبائی اسمبلیاں دے انتخابات کٹھے شفاف اتے منصفانہ تھیوݨے چاہیدن ایہو ملک کیتے بہتر ہوسی، پارلیمنٹ ہی سارے اداریاں دی حدود طے کریندے اے اے اتے کہیں وی ادارے دا دائرہ اختیار چاہوے تاں ودھا وی سڳدی اے اتے ڳھٹا وی سڳدی اے، قومی اہمیت دے معاملیاں تے پارلیمنٹ حکومت اتے اداراں دی رہنمائی کرے۔

پارلیمنٹ دے مشترکہ اجلاس اچ پالیسی بیان ݙیندے انہاں آکھیا جو زلزلہ اچ وݙا جانی ضیان نا تھیوݨ تے اللہ دا شکر اے، حکومت نقصانات دا جائزہ قھندی پئی اے جیندی تلافی کیتی ویسی۔ انہاں آکھیا جو وزیرستان اچ سینئر فوج افسر دی شہادت تے افسوس اے، پوری قوم اپݨے سیکیورٹی فورسز دے نال کھڑی اے ڄیڑھی فرنٹ لائن تے دہشتگرداں نال لڑدی پئی اے۔ وزیر داخلہ آکھیا جو ملک کوں روز سیاسی، انتظامی اتے عدالتی بحران وات کرݨ دی کوشش کیتی ویندی پئی اے جیندا محرک ہکو ڄݨا اے ڄیڑھا حالات خراب کر تے فساد کھنݙاوݨ چاہندے، ایندے تے پارلیمنٹ کوں تکڑا ولدا ݙیوݨا ہوسی جو ملک کوں بحراناں توں بچیڄے۔

اسلام آباد۔ (اے پی پی)صدر مملکت ڈاکٹر عارف علوی یوم پاکستان تے قیدیاں دی سزاوں اچ 90 ݙینھ دی کمی دی منظوری ݙے ݙتی اے۔ سزاواں اچ کمی دا اطلاق قتل، جاسوسی اتے ریاست مخالف سرگرمیاں اچ ملوث قیدیاں تے نہ تھیسی۔ ایویں زنا، چوری، ڈکیتی، اغواء اتے دہشتگردی اچ سزا یافتہ مجرماں تے وی سزاواں اچ کمی دا اطلاق نہ تھیسی۔ سزا اچ کمی دا اطلاق مالی جرائم اتے قومی خزانے کوں نقصان پچاوݨ آلے مجرماں تے وی نا تھیسی۔ 65 سال توں ودھ اتے 18 سال توں ڳھٹ عمر دے قیدیاں ڄیڑھے اپݨی ہک ترہائی قید کٹ چکین کوں رعایت ملسی۔ صدر مملکت سزاواں اچ کمی دی منظوری آئین دے آرٹیکل 45 دے تحت ݙتی اے ۔

اسلام آباد۔ (اے پی پی)وزیر اعظم محمد شہباز شریف آکھیے جو پاݨی جیوݨ اے اتے ساکوں رل تے آبی وسائل محفوظ ٻݨاوݨ کیتے آڳاہی ݙیوݨ خاس کر ٻالاں اچ شعور اٻاھرݨ دی لوڑھ اے۔ پاݨی دے عالمی ݙینھ تے انہاں ٹویٹ کیتی جو اے ݙینھ اے سمڄھݨ کیتے ہے جو آبی وسائل کتنے قیمتی اتے نایاب ہین تے ساکوں پاݨی دے استعمال دی اپݨی عادات کیویں اپناوݨیان ہوسن، اے ساݙی سانڄھی ذمہ واری اے جو اساں آبی وسائل کوں محفوظ کروں اتے اپݨے ٻالاں کوں ایندے کیتے آڳاہی ݙیووں۔

اسلام آباد اے پی پی)صدر مملکت ڈاکٹر عارف علوی آکھیے جو پاکستان اتے ترکی دے چنڳے تکڑے تعلقات ہین، ترکیہ زلزلے دی آفت نال لڑݨ اچ دلیری ݙکھائی اے، ترکیہ پاکستان دی چھل اچ جیڑھی مدد کیتی اے او ٻھلݨ آلی نئیں۔ اے ڳالھ انہاں ترکیہ دے زلزلہ متاثرین کیتے ”پاکستان نیشنل ڈونرز کانفرنس“ نال خطاب اچ آکھی ڄیڑھی نیشنل یونیورسٹی آف سائنس اینڈ ٹیکنالوجی (نسٹ) ترکش سفارتخانے اتے ترکش ایرو سپیس دے ڳانݙھے نال کرائی ہئی۔ تقریب اچ نسٹ دے ریکٹر انجینئر جاوید محمود بخاری اتے ترک سفیر مہمت پچاچی سودھا یونیورسٹی دے اساتذہ تے طلبہ شرکت کیتی۔ صدر مملکت زلزلیاں توں محفوظ تعمیرات تے زور ݙیندے آکھیا جو ایندے نال جانی و مالی نقصان ڳھٹاوݨ اچ مدد ملسی، ساکوں اے سنڳت قائم رکھݨی ہوسی، پاکستان اچ تعلیم دا معیار ودھاوݨ دی لوڑھ اے ایں سانڳے نسٹ یونیورسٹی دا اہم کردار اے، یونیورسٹی طلباء علم، ہنر اتے پاکستانیت دا ڄذبہ اٻھارݨ اچ تیزی نال کم کریندی پئی اے۔ تقریب نال نسٹ دے ریکٹر انجینئر جاوید محمود بخاری وی خطاب کیتے۔

اسلام آباد (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) ملک اچ بارشاں دا نواں سلسلہ شروع تھیوݨ دے امکان پاروں متعلقہ اداریاں کوں الرٹ رہݨ دی ہدایت، مقامی آبادیاں، سیاحاں تے مسافراں دی موسمی صورتحال بارے آگاہی کیتے ضروری اقدامات کرݨ دی ہدایت کیتی اے۔ محکمہ موسمیات 21 مارچ توں ملک اچ مغربی ہوائیں دا سلسلہ داخل تھیوݨ دی پیشین گوئی کیتی اے جئیں پاروں ملک دے کئی حصیاں اچ اندھاری اتے ڳاڄ کھمݨ نال مینہ وسݨ دا امکان اے۔ نویں موسمی نظام دے تحت جیڑھے علاقیاں اچ مینہ وسݨ دا امکان اے انہاں اچ بلوچستان اچ کوئٹہ، ژوب، زیارت، خضدار، سبی، نصیر آباد، جعفرآباد، ڈیرہ بگٹی، بارکھان، ہرنائی، چمن، پشین، قلعہ سیف اللہ، قلعہ عبداللہ، دالبندین، نوکنڈی، پنجگور، قلات، گوادر، لسبیلہ اور مکران کوسٹ، خیبرپختونخوا اچ گلیات، چترال، دیر، سوات، مانسہرہ، ایبٹ آباد، کوہستان، شانگلہ، بونیر، ہری پور، کرک، پشاور، کوہاٹ، چارسدہ، نوشہرہ، صوابی، باجوڑ، کرم، وزیرستان، مہمند، بنوں اتے ڈیرہ اسماعیل خان، پنجاب اچ مری، راولپنڈی، اٹک، چکوال، جہلم، گوجرانوالہ، گجرات، حافظ آباد، منڈی بہاؤالدین، سیالکوٹ، نارووال، لاہور، ٹوبہ ٹیک سنگھ، شیخوپورہ، ننکانہ صاحب، خوشاب، میانوالی، سرگودہا، ڈیرہ غازی خان، بھکر، لیہ، کوٹ ادو، ملتان، بہاولپور، بہاولنگر، رحیم یار خان، ساہیوال، فیصل آباد، اوکاڑہ ، قصور، سندھ اچ سکھر، جیکب آباد، لاڑکانہ، حیدرآباد، سانگھڑ، مٹھی، ٹھٹھہ، بدین، شہید بینظیر آباد، میرپورخاص، دادو اتے کراچی، اسلام آباد، گلگت بلتستان اچ دیامیر، استور، غذر، سکردو، ہنزہ، گلگت اتے شگر ، آزاد جموں و کشمیر اچ وادی نیلم، مظفرآباد، پونچھ، ہٹیاں، باغ، حویلی، سدھنوتی، کوٹلی، بھمبر اتے میرپور دے علاقے شامل ہن۔

اسلام آباد  (اے پی پی):وزیراعظم محمد شہباز شریف آکھیے ترکیہ اچ فروری اچ آوݨ آلے زلزلے توں تھیوݨ آلی تباہی دی اڄوکی تاریخ اچ مثال نی ملدی ، ایں اوکھے ویلھے اچ ترکیہ دے بھیݨ بھراویں کوں کلھا نہ چھوڑیسوں ، حکومت صنعتکاراں اتے سرمایہ کاراں کوں ساریاں سہولتاں ݙیوݨ کیتے ترجیحی بنیاداں تے اقدامات کریندی پئی اے ۔ اے ڳالھ انہاں ڈاؤلینس دے چیئرمین فاتح کمال دی صدارت اچ ترکیہ نال تعلق رکھݨ آلے صنعتکاراں دے وفد نال ملاقات اچ آکھی اے جنہاں سنوار کوں اتھاں انہاں دے نال ملاقات کیتی۔ ملاقات ویلھے پاکستان اچ ترکیہ دے سفیر مہمت پاچاجی وی موجود ہن ۔ وفد نال ڳالھ مہاڑ کریندے ہوئیں وزیراعظم آکھیے ترکیہ اچ فروری دے زلزلے توں تھیوݨ آلی تباہی دی مثال اڄوکی تاریخ اچ نی ملدی ۔ انہاں آکھیے جو ایں تباہی تے اساکوں ݙکھ تے افسوس اے ۔ وزیراعظم آکھیے پاکستان ایں زلزلے توں تھیوݨ آلی تباہی دے حوالے نال ترجیحی بنیاداں تے ریسکیو ، ریلیف اتے میڈیکل دیاں ٹیماں ترکیہ روانہ کیتن امدادی سامان بھیجݨ دا سلسلہ اڄ وی جاری اے ۔ وزیراعظم آکھیے پاکستان دی حکومت تے عوام تریہ دے آپݨے بھیݨ بھراویں تے کوں ایں اوکھے ویلھے کلھا نہ چھوڑیسن ۔ انہاں آکھیے ترکیہ وی پاکستان دی ہراوکھے ویلھے مدد کیتی اے ۔ وزیراعظم وفد کوں ݙسایا جو پاکستان اچ انفارمیشن ٹیکنالوجی ، صنعت ، توانائی ، مواصلات اتے انفراسٹرکچر اچ سرمایہ کاری دے ٻہوں سارے موقع موجود ہن حکومت سرمایہ کاراں تے صنعتکاراں کوں ساریاں سہولتاں ݙیوݨ کیتے ترجیحی بنیاداں تے اقدامات کریندی پئی اے ، ایں موقع تے وفاقی وزیر سرمایہ کاری بورڈ چوہدری سالک حسین ، وزیراعظم دے معاون خصوصی جہانزیب خان اتے متعلقہ سرکاری افسران موجود ہن۔

اسلام آباد  (اے پی پی) وفاقی وزیر منصوبہ بندی و ترقی احسن اقبال آکھیا جو یونیورسٹیاں انسانی وسائل پیدا کریندن،ایں ویلھے اساں چوتھے صنعتی زون اچ ویندے پیوں، تھری جی فورجی اتے سمارٹ فون دا دور اے، بدقسمتی نال اساں سکولاں اتے یونیورسٹیاں 50 سال پراݨے طریقے اپنائے ہوئن۔ اے ڳالھیں انہاں سنوار کوں وائس چانسلرز فورم توں خطاب کریندیں ہوئیں آکھی۔ انہاں آکھیا جو ترقی یافتہ ملکاں اچ جدت آڳی اے، اساں یونیورسٹیز اچ بہتری کیتے ست نکاتی اصلاحات پروگرام ٻݨائے۔ نینگراں کوں ایچ ای سی تئیں سوکھی رسائی ݙتی ویندی پی اے، انہاں آکھیا جو 12 توں 15 یونیورسٹیاں کوں دنیا دی بہترین یونیورسٹیاں اچ رلاوݨ کیتے اقدامات کیتن۔ یونیورسٹیاں اچ تحقیق اتے جدت تے توجہ ݙیوݨٰی اے، صنعت اتے تعلیمی اداریاں وچال رابطے ودھاوݨے چاہیدن۔

اسلام آباد (اے پی پی) وفاقی وزیرخزانہ تےمحصولات سینیٹر محمد اسحاق ڈار نشابر کیتا جو بین الاقوامی مالیاتی فنڈ(آئی ایم ایف) یا کہیں ملک پاکستان دی جوہری صلاحیت بارے کوئی شرط کائنی لاتی نہ پاکستان توں کوئی مطالبہ کیتے، ، آئی ایم ایف نال سٹاف لیول معاہدے اچ دیر تکنیکی وجوہات پاروں اے۔ سنوار کوں جاری وضاحتی بیان اچ وفاقی وزیرخزانہ آکھیا جو 16 مارچ 2023 کوں سینیٹ آف پاکستان دے فلور تے آئی ایم ایف پروگرام اچ دیر دی وجہ بارے ہک سوال دے ولدے اچ انہاں دے بیان کوں سیاق و سباق توں ہٹ تے پیش کیتا ویندا پے۔ وزیرخزانہ آکھیا جو پاکستان دے جوہری پروگرام بارے انہاں دا تبصرہ ہک ساتھی سینیٹرز دے مخصوص سوال دے ولدے اچ ہئی جئیں اچ میں ایں ڳالھ تے زور ݙتا جو پاکستان کوں بغیر کہیں ٻاہرلے ڈکٹیشن دے اپݨا جوہری پروگرام ڈویلپ کرݨ دا حق اے۔ ایں بیان کوں آئی ایم ایف نال جاری مذاکرات نال نی جوڑݨا چاہیدا۔ آئی ایم ایف یا کہیں ملک پاکستان دی جوہری صلاحیت بارے کوئی شرط کائنی لاتی۔

اسلام آباد۔15مارچ (اے پی پی):حیاتیاتی تنوع اتے آبی وسائل کیتے امریکی خصوصی ایلچی مونیکا میڈینا 15-17 مارچ کوں اسلام آباد اتے کراچی دا دورہ کریسن ۔ اپݨے دورے اچ او امریکہ پاکستان کلائمیٹ اینڈ انوائرمنٹ ورکنگ گروپ دے اجلاس اچ شرکت کریسن ۔ او آپݨی مصروفیات اچ آب و ہوا اتے ماحولیاتی مسئلیں بشمول کلائمیٹ سمارٹ ایگریکلچر، واٹر مینجمنٹ، ہوا دے معیار، تحفظ اتے پلاسٹک دی آلودگی تے توجہ ݙیسن۔ امریکی سفارتخانہ توں جاری ھک پریس ریلیز موجب پاکستان اچ آپݨے قیام ویلھے حکومتی اہم عہدیداران نال نجی شعبے اتے سول سوسائٹی دے اسٹیک ہولڈرز نال حیاتیاتی تنوع اتے آب و ہوا دے بحران نال نبݨݨ ، صاف توانائی دے اہداف کوں اڳوں ودھاوݨ تے سائنس و ٹیکنالوجی دے شعبہ اچ تعاون ودھاوݨ جیہے امور تے ڳالھ مہاڑ کریسن۔