اسلام آباد۔16مئی  (اے پی پی) وزارت منصوبہ بندی، ترقی تے خصوصی اقدامات  اعلیٰ تعلیمی اداریاں اچ انسانی وسائل (ایچ آر) دی بھرتی کیتے پے سکیل سسٹم دا جائزہ ڳھنݨ بارے خصوصی ٹاسک فورس ٻݨا ݙتے۔ ایں ٹاسک فورس دا مقصد ہک بہتر پے سکیل سسٹم ٻݨاوݨ اے جیڑھا تعلیمی اداریاں اچ اعلیٰ معیار دے ایچ آرکوں راغٻ کریسی اتے برقرار رکھیسی۔ ایندا باقاعدہ آغاز منگل کوں کر ݙتا ڳے۔ ایں موقع تے وفاقی وزیر منصوبہ بندی احسن اقبال آکھیا جو اعلیٰ تعلیم دے شعبے اچ اعلیٰ ٹیلنٹ دی بھرتی اتے اونکوں برقرار رکھݨ علمی معیشت کوں ودھاوݨ دا اہم عنصر اے۔ انہاں آکھیا جو اڄ دے اختراع دے دور اچ   تعلیم ٹیکنالوجی دی منتقلی اتے سماجی تے اقتصادی ترقی کوں اڳوں ودھاوݨ اچ اہم کردار ادا کریندی پی اے۔ انہاں آکھیا جو اعلیٰ تربیت یافتہ ایچ آر اختراعی ماحولیاتی نظام دا ہک اہم جزو ہن۔ وفاقی وزیر آکھیا جو خصوصی ٹاسک فورس دا قیام پاکستان اچ اعلیٰ تعلیم دے شعبے کوں درپیش چیلنجز نال نبڑݨ کیتے حکومت دے عزم دی نشاندہی کریندے۔  پے سکیل دے نویں نظام کوں نافذ کرݨ نال انہاں تفاوتاں کوں دور کیتا ویسی اتے یونیورسٹیاں اتے ایچ ای آئی کیتے ہک منصفانہ معاوضے دے نظام کوں فروغ ملسی۔  نواں پے سکیل منصفانہ، شفاف اتے مارکیٹ ریٹ دا عکاس ہوسی جیڑھا جو اعلیٰ کارکردگی ݙکھاوݨ آلیاں کوں کارکردگی تے مبنی مراعات اتے انعامات ݙتے ویسن۔

اسلام آباد۔16مئی  (اے پی پی) وزیراعظم محمد شہباز شریف آکھیا جو بلوچستان دی ترقی پاکستان دی ترقی نال اے، قومی سیاسی قیادت بلوچستان دی عوام کوں امن، دوستی اتے خوشحالی دا سنیھا ݙیندی پی اے، صوبے دے سارے مسئلے اتے لاپتہ لوکاں دا مسئلہ ریاست دے سارے فریقین کٹھے ٻہہ تے حل کرن۔ اے ڳالھیں انہاں بلوچستان دے طلباء دی شکایتاں بارے ٻݨے کمیشن دے ارکان دی ملاقات اچ کریندیں ہوئیں آکھی جنہاں منگل کوں انہاں نال ملاقات کیتی۔ کمیشن وزیراعظم کوں بلوچستان توں طلباء دی شکایتاں اتے انہاں دے ازالت بارے کمیشن ولوں ٻݨائی ڳی رپورٹ تے بریفنگ ݙتی۔ وزیراعظم کمیشن دی کارکردگی دی تعریف کریندیں ہوئیں آکھیا جو بلوچ طلباء دی شکایتاں اتے انہاں دے ازالے بارے رپورٹ جامع اے اتے ٻہوں ایمانداری اتے سنجیدگی نال ٻݨائی ڳی اے۔ وزیراعظم ہدایت کیتی جو وفاقی اتے صوبائی ادارے رپورٹ اچ ݙتی ڳی تجویزاں تے عمل کراون۔  ملاقات اچ کمیشن دے  کنوینئر رکن قومی اسمبلی سردار اختر مینگل ،اتے اراکین  سینیٹر مشاہد حسین سید ،سینیٹر کامران مرتضیٰ، افراسیاب خٹک ، ناصر محمود کھوسہ ، میجر (ر )حسنین  ایڈیشنل سیکرٹری سینیٹ شریک تھیے۔ ایں موقع تے وفاقی وزیر دفاع خواجہ آصف ، وفاقی وزیر داخلہ رانا ثنا اللہ ، وفاقی وزیر قانون و انصاف اعظم نذیر تارڑ ، مشیر وزیراعظم احد چیمہ  اتے متعلقہ اعلیٰ سرکاری افسران وی موجود ہن۔

اسلام آباد۔16مئی  (اے پی پی) صدر مملکت ڈاکٹر عارف علوی دی نجی بینکاں کوں فراڈ متاثرین کوں پنج لکھ 64 ہزار روپے توں ودھ دی رقم واپسی ݙیوݨ دی ہدایت کر ݙتی، متاثرین توں فنڈز دی آن لائن منتقلی اتے اے ٹی ایم فراڈ نال رقم ہتھیا ڳھدی ڳی ہئی۔ صدر  مملکت بینکنگ محتسب دے 3 فیصلیاں دے خلاف الائیڈ بینک ، یونائیٹڈ بینک اتے ہک شہری دی اپیلاں نبیڑ ݙتی۔ ایوان صدر دے پریس ونگ توں جاری تفصیل موجب شکایت کرݨ آلے محمد سلیم ظفر،  ہدایت اللہ اتے  غلام محمد بالترتیب لاہور اچ الائیڈ بینک لمیٹڈ، ضلع کرک اچ یونائیٹڈ بینک لمیٹڈ اتے پشاور اچ الائیڈ بینک لمیٹڈ انڄ انڄ اکاؤنٹس ہن۔ سلیم ظفر کوں الائیڈ بینک لمیٹڈ دی ہیلپ لائن توں ملدے جلدے ہک نمبر توں کال آئی اتے کال کرݨ آلے اپݨا تعارف بینک دے نمائندے دے طورکرایا۔ سلیم ظفر کال کرݨ نال اپݨی بینکنگ معلومات شیئر کیتی، جئیں دے بعد انہاں دے اکاؤنٹ توں کل 348,500 روپے کݙھ ڳھدے ڳے۔ اینویں ہدایت اللہ یونائیٹڈ بینک لمیٹڈ ڈیجیٹل ایپ دا استعمال کریندیں ہوئیں کہیں نامعلوم بندے 170,969 روپے کݙھ ڳھدے اتے نہ تاں الیکٹرانک فنڈز ٹرانسفر (EFT) سہولت کیتے درخواست کیتی ہئی اتے نہ اوندا استعمال کیتا ہئی۔ غلام محمد دا کارڈ اے ٹی ایم مشین اچ پھس ڳیا ہئی اتے بعد اچ اونکوں پتہ لڳا جو کجھ جعلسازاں دھوکے نال اوندا کارڈ استعمال کر تے اوندے اکاؤنٹ توں غیرمجاز طریقے نال 45000 روپے دی رقم کݙھ ڳھدی۔ شکایت کنندگان ریلیف کیتے بینکاں نال رابطہ کیتا پر کوئی نتیجہ نہ نکلیا۔ اوندے بعد انہاں انہاں اںج انج بینکنگ محتسب نال رابطہ کیتا جئیں سلیم ظفر اتے  ہدایت اللہ دے کیسز اچ انہاں کوں انڄی ہوئی رقم واپسی کرݨ اتے غلام محمد دا کیس شکایت بند کرݨ دا حکم ݙتا۔ فیصلیاں تے صدرمملکت کوں اپیلاں کیتی ڳی ۔ صدر مملکت ڈاکٹر عارف علوی دی نجی بینکاں کوں فراڈ متاثرین کوں پنج لکھ 64 ہزار روپے توں ودھ دی رقم واپسی ݙیوݨ دی ہدایت کر ݙتی۔

اسلام آباد۔15مئی  (اے پی پی) وزیراعظم محمد شہباز شریف مسلم لیگ (ن) دے قائد میاں نواز شریف دے ترقیاتی منصوبیاں دی تصویراں اتے نو مئی کوں پی ٹی آئی ولوں کیتی ڳی تباہی دی تصویراں شیئر کریندیں ہوئیں آکھیا جو سالہا سال ترقی دا پندھ نو مئی کوں تباہی دا منظر پیش کریندا پیا ہئی، عمران نیازی ایݙوں اوݙے دی ڳھڑی ہوئی ڳالھیں چھوڑن اتے اپݨی کرپشن دا حساب ݙیون۔ سنوار کوں اپݨے ہک ٹویٹ اچ انہاں راولپنڈی سکستھ روڈ میٹرو بس سٹیشن دی پراݨی اتے نویں تصویراں شیئر کیتی۔ وزیراعظم شہباز شریف اپݨے ٹویٹ اچ آکھیا جو سالہا سال ترقی دا پندھ نو مئی کوں تباہی دا منظر پیش کریندا پیا ہئی ایں میٹرو سٹیشن کوں پی ٹی آئی تباہ کر ݙتے۔ وزیراعظم اپݨے ٹویٹ اچ پی ٹی آئی دے چیئرمین عمران نیازی دا ہک ٹویٹ وی شیئر کیتا اتے حوالہ ݙیندیں ہوئیں آکھیا جو عمران نیازی ایݙوں اوݙے دی ڳھڑی ہوئی ڳالھیں چھوڑن اتے اپݨی کرپشن دا حساب ݙیون۔

اسلام آباد۔15مئی  (اے پی پی) وفاقی وزیر اطلاعات تے نشریات مریم اورنگزیب آکھیا جو عوام ملک دشمناں اتے دہشت گرداں دے ماسٹر مائنڈ کوں مسترد کر ݙتے، عوام عمران خان دی دہشت گردی اتے ملک دشمنی دا حصہ ٻݨݨ کوں تیار کائنی۔ عمران خان کینویں تیار رہݨ دا آکھدے پن؟ سنوار کوں پی ٹی آئی چیئرمین عمران خان دے بیان تے ردعمل اچ انہاں آکھیا جو دہشت گرد، مسلح جتھے اتے غنڈے قانون دے مطابق گرفتار ہن، شہیداں دی یادگاراں دی بے حرمتی، حساس سرکاری عمارتاں تے حملے، مسیتاں، سکولاں، مویشی منڈیاں اتے مریضاں کوں سرک تے لہا تے ایمبولینس کوں ساڑݨ آلے تاں گرفتار تھی ڳن، ہݨ عمران خان کینویں آواز ݙیندے پن؟ انہاں آکھیا جو عمران خان آرام نال زمان پارک ٻہہ ونجن، جیڑھی ٻھاہ انہاں لاوݨی ہئی لا ڳھدی اے، ولا ٻھاہ کائنا لاوݨ ݙیسوں۔

اسلام آباد۔15مئی  (اے پی پی) وفاقی وزیر برائے منصوبہ بندی ترقی تے اصلاحات وخصوصی اقدامات احسن اقبال آکھیا جو پاکستان دی 75 سالیں دی تاریخ اچ اڄ دا ݙینھ دل خراش اے، کجھ ججز پاروں عدلیہ توں لوکاں دا اعتماد اٹھ ڳے، سنوار کوں قومی اسمبلی اچ ڳالھ مہاڑ کریندیں ہوئیں انہاں آکھیا جو عمران خان دے کارکناں قومی املاک کوں ساڑیے۔ ۔جناح ہاؤس ،کورکمانڈر ہاؤس اتے ریڈیو سٹیشن پشاور کوں ساڑ ݙتا ڳے۔ انہاں آکھیا جو کجھ ججز دے جزوی فیصلیاں تے اعلیٰ عدلیہ تے تنقید کیتی ڳی اے جئیں پاروں تنازعہ کھڑا تھیے۔ انہاں آکھیا جو عمران خان ذاتی فائدے کیتے سٹھ ارب روپے دا غبن کیتے۔ انہاں پارلیمنٹ توں مطالبہ کیتا جو چیف جسٹس دے خلاف سپریم جوڈیشل کونسل اچ ریفرنس دائر کیتا ونڄے۔

اسلام آباد۔15مئی(اے پی پی) وزیراعظم محمد شہبازشریف استاد، ڈرامہ نویس، مزاح نگار، دانشور، شاعر اتے فیض احمد فیض دے جواترے شعیب ہاشمی دے انتقال تے ݙکھ تے افسوس دا اظہار کیتے ۔ وزیراعظم آفس دے میڈیا ونگ توں جاری بیان موجب وزیراعظم  منیزہ ہاشمی، سلیمہ ہاشمی اتے ٻئے اہل خانہ ںال شعیب ہاشمی دی وفات تے ہمدردی دا اظہار کیتے۔ وزیراعظم آکھیے شعیب ہاشمی پی ٹی وی دے سنہری دور اچ اہم کردار ادا کیتے ۔ انہاں طنز و مزاح دے پروگراماں اچ نویں جہت متعارف کروائی ۔شعیب ہاشمی یادگار تے ناقابل فراموش ڈرامے لکھیے ۔ وزیراعظم آکھیے انہاں دے قلم توں روشن اقدار، روایات اتے نظریات کوں ودھارا ملیے ۔ انہاں جیہے قلم کار اتے دانشور معاشرے کوں تہذیب، سلیقہ اتے ادب سکھائے ۔اُنہاں دی وفات معاشرے، فن اتے ادب دا وݙا ضیان اے ۔وزیراعظم اللہ تعالی توں مرحوم دے  درجات دی بلندی اتےلواحقین  کیتے صبر جمیل دی دعا کیتی۔

اسلام آباد۔15مئی  (اے پی پی):وفاقی وزیر اطلاعات و نشریات مریم اورنگزیب آکھیے پاکستان محفوظ ہتھاں وچ ہے، اساکوں ورثے اچ تباہ حال معیشت تے ڈیفالٹ کریندا ہویا ملک ملیا جیں کوں اساں بچائے ، اساکوں تباہ حال معیشت اتے ڈیفالٹ کریندا ہویا ملک ورثیے اچ ملیا ، عمران خان چار سال ملکی ساکھ دائو تے لاتی ، ملکی تاریخ دے ساریں توں ودھ زیادہ قرضے ڳھدے ، آئی ایم ایف دا پروگرام دستخط کرتے اوندی خلاف ورزی کیتی، عمران خان دی گرفتاری توں حکومت دا کوئی تعلق کائنی ، قومی احتساب بیورو القادر ٹرسٹ کرپشن کیس اچ عمران خان کوں گرفتار کیتے، پاکستان دی تاریخ اچ کݙاہیں ایویں نی تھیا جو جسمانی ریمانڈ تے موجود ملزم کوں اتنا وݙا ریلیف ملیا ہووے ، عمران خان توں پچھ ڳچھ یا تفتیش کیتی ونڄے تاں تشدد کریندن ۔ اے ڳالھیں انہاں عالمی نشریاتی ادارے ”الجزیرہ“ کوں آپݨے خصوصی انٹرویو اچ آکھئن ۔ وفاقی وزیر اطلاعات آکھیے عمران خان کوں گرفتار کرتے اساں کوئی ہدف حاصل نہ کرݨا ہئی ، انہاں دی گرفتاری توں حکومت دا کوئی تعلق کائنی ، عمران خان کوں قومی احتساب بیورو القادر ٹرسٹ کرپشن کیس اچ گرفتار کیتے، نیب ایں کیس دی تحقیقات کریندا پئے تے نیب عمران خان کوں کئی نوٹسز جاری کیتے لیکن عمران خان نیب دے کہیں نوٹس دا جواب نی ݙتا ۔انہاں آکھیے عمران خان دی گرفتاری کوں اسلام آباد ہائی کورٹ اچ چیلنج کیتا ڳئے جیں تے اسلام آباد ہائی کورٹ عمران خان دی گرفتاری کوں قانونی قرارݙتا ۔ ھک سوال تے وفاقی وزیر اطلاعات آکھیے ایجھیاں ٻہوں مثالاں موجود ہن جݙاں عمران خان اقتدار اچ ہن تاں اپوزیشن انہاں ٹوں سوال پچھدی تاں او اینکوں ڈیتھ سیل اچ بھیج ݙیندے، میڈیا سوال پچھدا تاں میڈیا دے لوکاں کوں جیلاں اچ پا ݙتا ویندا ۔ آر ایس ایف دی رپورٹ اچ عمران خان کوں میڈیا پریڈیٹر آکھیا ڳیا۔ انہاں آکھیے عمران خان ملک دے چیف ایگزیکٹو دے اعلیٰ ترین عہدے تے فائز رہ چکن ، جݙاں او اپوزیشن اچ آئے تاں انہاں توں مختلف کرپشن کیسز بارے پچھ ڳچھ کیتی ڳئی انہاں تشدد دی راہ اختیار کیتی۔ انہاں آکھیے ایف آئی اے تے نیب اچ مختلف مقدمات دی تفتیش جاری اے جیں دا عمران خان جواب ݙیوݨا اے تے عمران خان جواب ݙیوݨ کیتے تیار کائنی ، اے سلسلہ گزریل 14 مہینے توں جاری اے ، عدالت عمران خان دے وارنٹ جاری کیتے تاں پولیس عدالتی وارنٹ دی تعمیل کیتے زمان پارک ڳئی، اوں ویلھے وی عمران خان تشدد دی رستہ اختیار کیتا تے آپݨے تحفظ کیتے تریمتاں تے ٻالاں کوں انسانی ڈھال دے طور تے استعمال کیتا۔

اسلام آباد۔14مئی (اے پی پی):وزیراعظم محمد شہباز شریف نائلہ کیانی دی ماؤنٹ ایورسٹ سر کر تے پاکستان دا سر فخر نال اُچا کرݨ تے انہاں دی تعریف کیتی اے ۔ آپݨے ھک ٹویٹ اچ انہاں آکھیے نائلہ کیانی اپݨی ٹوپی اچ ھک ٻئے پنکھ دا ودھارے کریندے ہوئیں ماؤنٹ ایورسٹ کوں سر کر تے پاکستان دا سر فخر نال اچا کیتے ۔ انہاں مزید آکھیے جو کوہ پیمائی دے اپݨے شوق تے آپݨے کریڈٹ تے حیرت انگیز کامیابیاں دے ذریعے نائلہ کیانی ایں تصور کوں تقویت بخشی اے جو ساݙی تریمتاں کجھ وی حاصل کرݨ دی صلاحیت رکھیندن ۔ وزیر اعظم نائلہ کیانی کوں دلوں مبارخ ݙیندے ہوئیں انہاں دے مستقبل دے منصوبیں کیتے نیک خواہشات دا اظہار وی کیتے۔

اسلام آباد۔14مئی(اے پی پی) صدر مملکت ڈاکٹر عارف علوی انسدادِ ہراسیت محتسب کوں اسلام آباد پولیس اچ تریمت اہلکار دی مبینہ ہراسگی دی تحقیقات کرݨ دی ہدایت کیتی اے ۔ایوان صدرپریس ونگ توں جاری بیان موجب صدرمملکت وفاقی محتسب انسداد ہراسیت بمقام کار کوں مرد اہلکار دی طرفوں مبینہ ہراسانی تے 90 ݙینھ اچ کارروائی مکمل کرݨ دی ہدایت کیتی اے ۔ صدر مملکت وفاقی محتسب انسداد ہراسیت دے فیصلے دے خلاف شکایت کنندہ اتے ملزم دی اپیلاں تے فیصلہ ݙیندے ہوئیں اے ہدایت جاری کیتی ۔ تفصیلات موجب اسلام آباد پولیس دی ھک تریمت اہلکار ھک مرد اہلکار دے خلاف جنسی ہراسگی دی شکایت کیتی ہئی ،محتسب نویں سروں انکوائری کیتے آئی جی پولیس اسلام آباد دے ذریعے کیس اسلام آباد پولیس کوں واپس بھجوایا ہئی ، محتسب محکمانہ انکوائری کمیٹی دی طرفوں ملزم دی معطلی دے حکم کوں ختم کیتا ہئی تے ملزم کوں معمول دے فرائض انجام ݙیوݨ دی اجازت ݙتی ہئی ۔صدرمملکت اپݨے فیصلے اچ آکھیے کم دی جاہ تے ہراساں کرݨ دے الزامات دی تحقیقات تھیوݨ حالی باقی اے ، ملزم   دے وکیل خدشہ ظاہر کیتے جو معاملہ ول کمیٹی کوں بھجواوݨ مناسب کائنی کیوں جو ملزم نال ناانصافی دا امکان اے، صدر مملکت اپݨے فیصلے وچ آکھیے شکایت کنندہ اتے ملزم ݙوہیں ہی فیصلے توں مطمئن کائن ، ملزم انکوائری کمیٹی تے عدم اعتماد دا اظہار کیتے۔صدر مملکت اپݨے فیصلے اچ آکھیے انصاف دے تقاضے پورے کرݨ کیتے محتسب  خود انکوائری کرے اتے 90 ݙینھ دی قانونی مدت دے اندر معاملے کوں مکاوے ۔

لاہور۔14مئی(اے پی پی) وزیراعظم محمد شہباز شریف نال سینیٹر شاہین بٹ ملاقات کیتی  اے۔ وزیراعظم آفس میڈیا ونگ توں جاری اعلامیہ موجب ملاقات اچ ملکی مجموعی سیاسی صورتحال اتے ٻئے سانجھی دلچسپی دے امور تے ڳالھ مہاڑ کیتی ڳئی ۔

اسلام آباد۔14مئی(اے پی پی) وفاقی وزیر اطلاعات و نشریات مریم اورنگزیب پی ٹی آئی چیئرمین عمران خان دے بیان کوں اعتراف جرم قرار ݙیندے ہوئیں آکھیے عمران خان کوں مسلح جتھیں دے حملیں ، دہشت گردی اتے بلوائی دا بالکل ایویں  کائناں پتہ ہئی جیویں انہاں کوں عدت اچ شادی اتے ٹیریان دا پیو ہووݨ دا کائناں پتہ ہئی ، حساس تنصیبات، عمارتاں، ایمبولینس، سکولاں، ہسپتال، مسیتاں، جانور منڈی تے حملے اتے شہدا تے غازیاں دی یادگاراں دی بے حرمتی عمران خان دی منصوبہ بندی نال تھئی اے ۔ اتوار کوں آپݨے ھک بیان اچ انہاں آکھیے عمران خان ول ول آکھیا جو میں گرفتار تھیا تاں حملہ کرݨا اے ، انہاں سوچی سمجھی منصوبہ بندی نال حملے کروائے ۔ وفاقی وزیر آکھیے پاکستان دے ساریں توں وݙے دہشت گرد ہی ملک تے حملہ آور تھیندن جیں دے اے ماسٹر مائنڈ ہن۔ انہاں آکھیے عمران خان چیف آف آرمی اسٹاف اتے ڈی جی آئی ایس پی آر دا ول ول ایں سانڳے ناں گھندا پئے جو او فارن ایجنٹ نال بند کمرے اچ نی ملدے پئے ، ایوانِ صدر اچ کوئی خفیہ ملاقات نی تھیندی پئی ، انہاں آکھیے میݙی گھڑی میݙی مرضی کائنی ، انہاں قوم دا 60 ارب چوری کیتے، ہݨ میݙی مرضی نہ چلسی ۔ انہاں آکھیے برطانیہ توں 190 ملین پائونڈ سپریم کورٹ اچ کیوں جمع کرائے ڳئے؟ عمران خان تے انہاں دی ذال القادر ٹرسٹ دی بالترتیب 458 کنال تے 254 کنال زمین ہڑپ کیتی۔ انہاں آکھیے فارن فنڈنگ وانڳوں فارن ایجنٹ اتے ایندا ایجنڈا وی پوری طرح بے نقاب تھی ڳئے ۔ وفاقی وزیر اطلاعات آکھیے عمران خان ڈی جی آئی ایس پی آر کوں مشورہ ݙیوݨ توں پہلے اپݨی جماعت دا ناں  پاکستان تحریک دہشت گردی رکھ ݙیون ۔ انہاں آکھیے فارن ایجنٹ دی ملک دشمنی کھل تے سامݨے آ ڳئی اے، انہاں دی ملک دشمنی، دہشت گردی اتے مسلح جتھے بے نقاب تھی ڳئن۔ ایمبولنس، سکول، ہسپتال، مسیت، میٹرو بس، موٹر ویز اتے قومی اثاثیں تے حملہ آور صرف دہشت گرد اتے ملک دشمن ہوندن ۔

اسلام آباد۔14مئی(اے پی پی):وزارت منصوبہ بندی ، ترقی اتے  خصوصی اقدامات اردو کوں بطور قومی زبان نافذ کرݨ تے ودھارا ݙیوݨ کیتے “نیشنل لینگویج پروسیسنگ لیبارٹری (این ایل پی ایل) دے قیام دی منظوری ݙے ݙتی ۔وزارت منصوبہ بندی ، ترقی تے خصوصی اقدامات دی طرفوں جاری رپورٹ موجب وزارت قومی ورثہ اتے ثقافت ڈویژن سپانسرنگ ایجنسی اے جݙاں جو نیشنل لینگویج پروموشن ڈیپارٹمنٹ (این ایل پی ڈی) ایں منصوبے دے عملدرآمد کوں یقینی بݨیسی ۔ایں منصوبے دا بنیادی مقصد اردو کوں وسیع ڈیجیٹل ڈیٹا وسائل دے نال زباناں دے درجے تئیں پڄاوݨ تے اینکوں جدید ٹیکنالوجی دی ایپلی کیشنز توں آراستہ کرݨا اے۔  ڈاکٹر راشد حمید،  ڈائریکٹر جنرل این ایل پی ڈی دا ایں منصوبے دے حوالے نال آکھݨ ہئی جو اے ادارہ اکتوبر 1979 اچ قائم ڳیا ہئی جیں دا مقصد قومی زبان اردو کوں ودھارا ݙیوݨ اے تے اے لیب ایں ادارے دے تحت قائم کیتی ڳئی اے ۔ منصوبے دی مزید تفصیلات ݙسیندے ہوئیں انہاں آکھیے ایں منصوبے اچ مشین ٹرانسلیشن (MT)، سپیچ ریکگنیشن (SR) تے آپٹیکل کریکٹر ریکگنیشن (OCR) جیہی ٻہوں ساری ایپلی کیشنز دی تیاری شامل اے، جیں توں زبان سیکھݨ اچ مزید ودھارا تھیسی جݙاں جو ایں منصوبے دے تحت قابل رسائی، سرحد پار مواصلات اتے تجارت کوں سوکھا بݨاوݨ ، لوکاں کوں آن لائن مواد تئیں رسائی دے قابل بݨاوݨ ، ثقافتی تفہیم کوں ودھارا ݙیوݨ تے زبان دے وسائل کوں محفوظ رکھݨ اچ مدد کرݨ شامل ہن ۔ وفاقی وزیر منصوبہ بندی احسن اقبال انہاں اقدامات دے پچھوں انتہائی محرک رہین ۔ گزریل مہینے وفاقی وزیر منصوبہ بندی انفارمیشن ٹیکنالوجی اتے نجی شعبیں دے ماہرین تے مشتمل ھک سٹیئرنگ کمیٹی قائم کیتی ہئی تے کمیٹی دا مقصد ڈیجیٹل تبدیلی دے نفاذ اچ سہولت ݙیوݨ تے ملک دی برآمدات دے حجم اچ ودھارا کرݨا اے ۔

اسلام آباد۔13مئی(اے پی پی):وزیراعظم محمدشہبازشریف بلوچستان اچ ایف سی کمپائونڈ اچ کلیئرنس آپریشن اچ 6 سیکیورٹی اہلکاراں تے ھک شہری دی شہادت تے ݙکھ تے افسوس کریندے آکھیے جو قوم جاناں دانذرانہ پیش کرݨ آلے ہیروز کوں خراج عقیدت پیش کریندی اے ۔  آپݨے ھک ٹویٹ اچ وزیراعظم آکھیے بلوچستان اچ ایف سی کمپائونڈ اچ کلیئرنس آپریشن اچ 6 سیکیورٹی اہلکاراں اتے ھک شہری دی شہادت دا سݨ تے انہاں کوں ٻہوں ݙکھ تے افسوس تھئے ۔وزیراعظم آکھیے مٹی دے انہاں بہادر پتراں ترائے خانداناں کوں یرغمال تھیوݨ دی صورتحال توں بچیندے ہوئیں آپݨی جاناں دی عظیم قربانی پیش کیتی اے ۔وزیراعظم آکھیے قوم اپݨے ہیروز کوں خراج تحسین تے انہاں دی بہادری اتے مل ککیتے بے لوث خدمات تے خراج عقیدت پیش کریندی اے ۔وزیراعظم شہدا دے اچے درجات دی دعا کریندے ہوئیں آکھیے او ݙکھی خاندان دے ݙکھ اچ برابر دے شریک ہن۔

اسلام آباد۔13مئی  (اے پی پی):وزیراعظم محمدشہباز شریف آکھیے 9 مئی 2023 کوں ملک دی پچھتر سالہ تاریخ دے دلخراش واقعات پیش آئے ، جیڑھا کم ساݙا ازلی دشمن وی کݙاہیں نی کرسڳیا ایں کوں سیاسی جماعت دے حواریاں باقاعدہ منصوبہ بندی اتے اشتعال انگیزی دے ذریعے کیتا، وزیراعظم متعلقہ حکام کوں قومی تنصیبات اتے عمارتاں تے حملیں اچ ملوث سارے شرپسنداں دی نشاندہی کرݨ تے انہاں کوں 72 گھنٹے اچ گرفتار کرݨ دی وی ہدایت کیتی ۔ انہاں اے ہدایات ہفتے کوں لاہوراچ   امن و امان دے حوالے  نال ھک اعلی سطح اجلاس دی صدارت کریندے ہوئیں جاری کیتی ۔ اجلاس دے شرکا نال ڳالھ مہاڑ کریندے ہوئیں وزیراعظم آکھیے 9 مئی 2023 کوں ملک دی پچھتر سالہ تاریخ دے دلخراش واقعات پیش آئے ،  جناح ہائوس لاہور کوں سݙ تے ساڑیا ڳئے ایندی حرمت کوں پامال کیتا ڳئے ، پاک فوج اتے سول ملازمین کوں شدید زخمی کیتا ڳئے ۔ وزیراعظم مزید آکھیے اساں کیتے افسوس تے تشویش دا مقام اے جیڑھا کم ساݙا ازلی دشمن وی نہ کرسڳیا اینکوں ھک سیاسی جماعت دے حواریاں باقاعدہ منصوبہ بندی اتے اشتعال انگیزی دے ذریعے کیتا ، اڄ ہر محب وطن پاکستانی 9 مئی دے واقعات تے ݙکھی اے ۔وزیراعظم متعلقہ حکام کوں ہدایت کیتی جو قومی تنصیبات اتے عمارتاں تے حملیں اچ ملوث سارے شرپسنداں دی نشاندہی کیتی ونڄے تے انہاں کوں72 گھنٹے اچ گرفتار کیتا ونڄے ۔انہاں مزید ہدایت کیتی جو حملہ آوراں دی نشاندہی دے عمل اچ ایں ڳالھ کوں یقینی بݨایا ونڄے جو کہیں صورت کوئی بے گناہ نہ وٹھیا ونڄے۔ وزیراعظم مزید آکھیے ایں سلسلے اچ قانونی تقاضے نظر انداز نی تھیوݨے چاہیدے ۔ وزیراعظم  انسپکٹر جنرل  پنجاب پولیس اتے انسپکٹر جنرل خیبر پختونخوا پولیس کوں ہدایت کیتی جو نادرا اتے سیکورٹی ایجنسیز دی خدمات حاصل کیتیاں ونڄن تاں جو شر پسند عناصر دے خلاف وختی توں وختی گھیرا تنگ کیتا ونڄ سڳے ۔ اجلاس دے شرکا اچ وفاقی وزیر داخلہ رانا ثنا اللہ ، وفاقی وزیر قانون و انصاف اعظم  نذیر تارڑ ، مشیروزیراعظم احد چیمہ، نگران وزیر اعلی پنجاب سید محسن نقوی، وزیراعظم دے معاون خصوصی  ملک محمد احمد خان ، چیف سیکرٹری پنجاب ،چیف سیکرٹری کے پی ، انسپکٹر جنرل پنجاب پولیس ، انسپکٹر جنرل  کے پی پولیس اتے کمشنر لاہور ڈویژن شامل ہن۔

راولپنڈی۔13مئی(اے پی پی) بری فوج دے سربراہ جنرل سیدعاصم منیرآکھیے جو مسلح افواج اپݨی تنصیبات دے تقدس اتے سلامتی کوں پامال کرݨ یا بھن تروڑ دی مزید کہیں کوشش کوں برداشت نہ کریسی ، دشمن عناصر دی طرفوں مسلح افواج کوں نشانہ بݨاوݨ کیتے بدنیتی توں بھرپور کوشش کیتی ویندی پئی اے ، پاکستانی عوام دی حمایت نال مذموم کوششاں کوں ناکام بݨایا ویسی ۔ پاک فوج دے شعبہ تعلقات عامہ (آئی ایس پی آر) توں جاری پریس ریلیز موجب آرمی چیف جنرل سید عاصم منیر ہفتے کوں کور ہیڈ کوارٹرز پشاور دا دورہ کیتے۔ آرمی چیف  کوں سلامتی دی موجودہ صورتحال تے انسداد دہشت گردی دے حوالے نال جاری کوششاں بارے تفصیلی بریفنگ ݙتی ڳئی ۔ آرمی چیف دہشت گردی دے خلاف جاری جنگ اچ قانون نافذ کرݨ آلے اداریں دی پیشہ ورانہ اہلیت، کارکردگی اتے کامیابیاں دی تعریف کیتی ۔ آرمی چیف کور دے افسران توں وی خطاب کیتا تے قومی سلامتی کوں پیش آندے خطرات تے زورݙتا۔ انہاں آکھیے امن و استحکام  کیتےاساں اپݨی کوششاں جاری رکھیسوں تے ایں عمل کوں خراب کرݨ آلیں کیتے کوئی گنجائش نہ ہوسی ۔آرمی چیف آکھیے مسلح افواج اپݨی تنصیبات دے تقدس اتے سلامتی کوں پامال کرݨ یا بھن تروڑ دی مزید کہیں کوشش کوں برداشت نہ کریسی ۔آرمی چیف 9 مئی دے یوم سیاہ تے بھن تروڑ دے سارے منصوبہ سازاں، مشتعل لوکاں ، اکساوݨ آلیں تے انہاں تے عمل کرݨ آلیں کوں انصاف دی دے کٹہرے اچ گھن آوݨ دا عزم کیتا ۔آرمی چیف معلومات دی جنگ دے چیلنجاں اتے غلط فہمیاں پیدا کرݨ دی کوششاں بارے وی روشنی پاتی ۔آرمی چیف ایں ڳالھ تے روشنی پاتی جو دشمن عناصر دی طرفوں مسلح افواج کوں نشانہ بݨاوݨ کیتے  بدنیتی توں  بھرپور کوشش کیتی ویندی پئی اے ۔ انہاں عہد کیتے جو پاکستانی عوام دی حمایت نال ایجھی مذموم کوششاں کوں ناکام بݨایا ویسی ۔ایندے توں پہلے کورہیڈکوارٹرز آمد تے کور کمانڈر پشاور آرمی چیف دا استقبال کیتا۔

اسلام آباد۔11مئی  (اے پی پی) وزیر مملکت برائے امور خارجہ حنا ربانی کھر اتے ایتھوپیا دے وزیر مملکت برائے خارجہ امور مسگانو آریگا خمیس کوں اسلام آباد اچ ایتھوپیا دے سفارت خانے دا افتتاح کرݙتے۔  ایتھوپیا دے سفارت خانے دا افتتاح پاکستان اتے ایتھوپیا وچال آپسی تعاون کوں ودھاوݨ اتے اقتصادی، ثقافتی اتے سفارتی تعلقات کوں ودھاوݨ کیتے اہم کردار ادا کریندا رہسی۔

اسلام آباد۔11مئی  (اے پی پی) آئین پاکستان دی گولڈن جوبلی بارے ݙو ݙینھ دا بین الاقوامی کنونشن مُک ڳیا۔ کنونشن اچ 17 توں ودھ ملکاں دے مندوبین شریک تھیے۔ انہاں اچ بیلجیئم،ایران،کینیا،شام،جمہوریہ کرغستان ،برطانیہ،امریکہ،سکاٹ لینڈ سودھے ٻے ملک شامل ہن۔ کنونشن اچ ملک اچوں اراکین پارلیمنٹ سیاسی رہنما،سول سوسائٹی دے ممبران،تریمتیں، اکیڈمیا، غیر مسلم رہنما شریک تھیے۔ سعودی عرب دی مجلس شوریٰ دے چئیرمین ڈاکٹر عبداللہ بن محمد بن ابراہیم الشیخ وی شریک تھیے۔ کنونشن دے پہلے ݙینھ پی ڈی ایم دے سربراہ مولانا فضل الرحمان،وفاقی وزیر قانون اعظم نذیر تارڑ،شیری رحمان،سابق چئیرمین سینٹ فاروق ایچ نائیک،قمر زمان کائرہ خطاب کیتا۔ کنونشن دے ݙوجھے ݙینھ چھیکڑی تقریب توں وزیر خارجہ بلاول بھٹو زرداری خطاب کیتا۔ ایں موقع تے اعلامیہ وی جاری کیتا ڳیا۔ کنونشن دے چھیکڑی سیشن اچ ڈاکٹر نفیسہ شاہ اعلامیہ پیش کیتا۔

اسلام آباد۔11مئی  (اے پی پی) وفاقی وزیرخزانہ تے محصولات سینیٹرمحمداسحاق ڈارآکھیا جو پاکستان دیوالیہ کائنا تھیسی، حکومت دسمبر تئیں سارے ٻاہرلی ادائیگیاں کوں یقینی ٻݨائے۔ اے ڳالھ انہاں خمیس کوں نیشنل سکیورٹی ڈویژن اتے اسلام آبادپالیسی ریسرچ انسٹی ٹیوٹ ولوں تھیوݨ آلے اسلام آباد سکیورٹی ڈائیلاگ دے تحت پاکستان دے اقتصادی چیلنجز دے موضوع تےسیشن توں خطاب کریندیں ہوئیں آکھی۔ وزیرخزانہ آکھیا جو حکومت اپݨے سیاسی اثاثہ دی قیمت تے ہر اوکھے اقتصادی فیصلے کیتن کیونجو اساݙے کیتے سیاست توں ودھ ریاست ضروری اے۔  وزیرخزانہ آکھیا جو حکومت جامع اتے پائیدار اقتصادی بڑھوتری کیتے مختلف شعبیاں اچ ڈھانچہ جاتی اصلاحات متعارف کریندی پی اے۔ ایندے نال نال علاقائی رابطیاں اچ ودھارا، درآمدات دی حوصلہ شکنی اتے برآمدات اچ ودھارا تے وی اساݙی توجہ اے۔ پاکستان دیوالیہ کائنا تھیسی، حکومت دسمبر تئیں سارے ٻاہرلی ادائیگیاں کوں یقینی ٻݨائے۔

اسلام آباد۔10مئی  (اے پی پی) صدر مملکت ڈاکٹر عارف علوی شہیداں دی فرڄ نال لگن اتے وطن نال محبت تے انہاں کوں سلام پیش کریندیں ہوئیں قوم ولوں شہیداں دے ٹبراں دا شکریہ ادا کیتے اتے انہاں دےجذبہ حب الوطنی دی تعریف کیتی اے۔ بدھ کوں ایوان صدر دے پریس ونگ توں جاری بیان موجب پاک فوج دے شہداں دے لواحقین نال ٹیلی فون تے افسوس کیتا۔ صدر چار مئی کوں دیردونی شمالی وزیرستان اچ شہید تھیوݨ آلے پاک فوج دے نینگراں دے ورثا نال فون تے ڳالھ کیتی۔ صدر مملکت حوالدار سلیم اتے نائیک جاوید دے لواحقین نال ڳالھ مہاڑ کیتی۔ صدر مملکت سپاہی بسم اللہ جان، سید رجب اتے حضرت بلال دے ورثاء نال وی ڳالھ کیتی۔ صدرمملکت شہیداں دے درجات دی بلندی اتے لواحقین کیتے صبر دی وی دعا کیتی۔

اسلام آباد۔10مئی  (اے پی پی) وزارت داخلہ پنجاب اچ امن و امان دی صورتحال برقرار رکھݨ کیتے فوج تعینات کرݨ دی منظوری ݙے ݙتی اے۔ بدھ کوں وزارت داخلہ توں جاری نوٹیفیکیشن اچ آکھیا ڳیا جو عمران خان دی گرفتاری دے بعد پنجاب اچ حالات وڳڑیے، امن و امان دی صورتحال بہتر کرݨ کیتے حکومت پنجاب دی ریکوزیشن تے فوج تعینات کرݨ دی منظوری ݙتی اے۔

اسلام آباد۔10مئی  (اے پی پی) پاکستان تحریک انصاف دے مسلح جتھیاں ریڈیو پاکستان پشاور دی عمارت تے حملہ، نیوز روم اتے مختلف سیکشنز اچ بھن تروڑ، ڳاݙیاں کوں ٻھاہ لا ݙتی ڳی۔ ڈائریکٹر جنرل ریڈیو پاکستان طاہر حسن بدھ کوں اپݨے بیان اچ آکھیا جو سینکڑاں دی تعداد اچ پی ٹی آئی دے شرپسنداں ریڈیو پاکستان پشاور دی عمارت اچانک دھاوا پا ݙتا، ریڈیو پاکستان دا گیٹ ٻھن تے اندر آئے اتے نیوز روم سودھے مختلف سیکشنز اچ تباہی مچائی۔ انہاں ݙسیا جو پی ٹی آئی دے شرپسنداں ریڈیو پاکستان تے گزریل ݙینھ حملہ کیتا ہئی، اڄ ولا حملہ کیتے، بھن تروڑ کیتی، سٹاف تے تشدد کیتے اتے ٻھاہ لاتی۔ انہاں آکھیا جو شرپسند عناصر چاغی یادگار اتے ریڈیو آڈیٹوریم کوں وی ٻھاہ لاتی۔ تریمتیں سودھے عملے دے ارکان تے وی تشدد کیتا ڳیا۔

اسلام آباد۔10مئی  (اے پی پی):صدر مملکت ڈاکٹر عارف علوی وفاقی انشورنس محتسب دی کارکردگی دی تعریف کریندے ہوئیں انشورنس معاملات اچ انصاف دی فراہمی کیتے ادارے دے کردار بارے آگاہی پیدا کرݨ دی لوڑھ تے زور ݙتا ۔ ایوانِ صدر دے پریس ونگ توں جاری بیان موجب صدر مملکت کوں وفاقی انشورنس محتسب دی سالانہ رپورٹ برائے سال 2022 ایوان صدر اچ پیش کیتی ڳئی ، وفاقی انشورنس محتسب ڈاکٹر محمد خاور جمیل رپورٹ پیش کیتی۔ ایں موقع تے ڳالھ مہاڑ کریندے ہوئیں صدر آکھیے عوام کوں انشورنس معاملات اچ انہاں دی دہلیز تے انصاف دی فراہمی تکھی کرݨی ہوسی ۔ انہاں آکھیے جو عوام انشورنس پالیسیاں متعلق شکایات دے حل کیتے وفاقی انشورنس محتسب نال رجوع کرن تے انشورنس معاملات اچ انصاف دی فراہمی اچ ادارے دے کردار بارے آگاہی پیدا کیتی ونڄے ۔ صدر مملکت وفاقی انشورنس محتسب دی سال 2022 دی کارکردگی دی تعریف کیتی ۔ وفاقی انشورنس محتسب سال 2022 دی رپورٹ اچ آکھیے 4634 شکایات دا ازالہ کیتا ڳئے جݙاں جو سال دے دوران انشورنس پالیسی ہولڈرز کوں 2.5 ارب روپے دا ریلیف ݙتا ڳئے ۔ رپورٹ وچ ݙسایا ڳئے جو وفاقی انشورنس محتسب 95 فیصد انشورنس کیسز دا ازالہ 60 ݙینھ اچ کیتے ۔ رپورٹ اچ آکھیا ڳئے جو لوکاں کوں انہاں دی دہلیز تے انصاف ݙیوݨ کیتے انشورنس محتسب سکھر تے حیدر آباد اچ نویں دفتر کھولئن ۔

اسلام آباد۔8مئی(اے پی پی) افغانستان دے عبوری وزیر خارجہ امیرخان متقی آکھیے پاکستان اتے وسطی ایشیائی ملکاں دے نال تعلقات استوار کرݨ چاہندوں ، پاکستان دہشت گردی دےخلاف جنگ اچ بے شمار قربانیاں ݙتن ، ساݙی خارجہ پالیسی سانجھے رابطے تے مذاکرات تے استواراے، پاک افغان تعلقات معاشی اتےعوامی رابطیں توں مربوط ہن۔ اے ڳالھ انہاں سنوار کوں اتھاں انسٹی ٹیوٹ آف سٹرٹیجک سٹڈیز اسلام آباد اچ منعقدہ تقریب توں خطاب کریندے ہوئیں آکھی اے ۔ تقریب اچ سابق سیکرٹری خارجہ اتے انسٹی ٹیوٹ دے سربراہ سہیل محمود ، سفارتکاراں، مختلف شعبہ ہائے زندگی توں تعلق رکھݨ آلی نمایاں شخصیات اتے صحافیاں شرکت کیتی۔ امیر خانہ متقی آکھیے افغانستان اتے پاکستان کوں انفراسٹرکچر تے کٹھے سرمایہ کاری کرݨ دی لوڑھ اے ، ݙوہیں ملکاں توانائی دے شدید بحران دا سامݨا کیتے، 20 مہینے پہلے برسراقتدار آوݨ توں بعد افغانستان اچ امن قائم اے اتے ملک کوں کہیں خانہ جنگی یا انتشار دا سامݨا کائنی ، افغانستان اچ ایں ویلھے مثالی امن اے ، تاجرملک اچ کاروبار کرن۔ انہاں آکھیے پاکستان نال رسمی تے غیررسمی ڳالھ مہاڑ تھیندی رہ ویندی اے ، پاکستان نال ساݙے تاریخی ، ثقافتی  تے بھرپی آلے تعلقات ہن ۔ انہاں اے ڳالھ زور ݙے تے آکھی اے جو افغانستان دی سرزمین کوں ٹی ٹی پی سودھے کہیں دہشت گردی کوں استعمال کرݨ نہ ݙیسوں ۔ پاکستان دہشت گردی دے خلاف جنگ اچ بے شمار قربانیاں ݙتن ، پاکستان 80 ہزار جاناں دی قربانی ݙتی تے لکھاں لوگ بے گھر تھئن ، ساݙی خواہش ہے جو پاکستان تے افغانستان اچ امن قائم تھیوے ۔

اسلام آباد۔8مئی(اے پی پی) صدر مملکت ڈاکٹر عارف علوی نے جسٹس مسرت ہلالی دی بطور چیف جسٹس  پشاور ہائیکورٹ تعیناتی دی منظوری ݙے ݙتی۔ ایوان صدر دے پریس ونگ موجب محترمہ جسٹس مسرت ہلالی  پشاور ہائیکورٹ اچ بطور قائمقام چیف جسٹس دی ذمہ واریاں ادا کریندیاں پئن ۔صدر مملکت نے چیف جسٹس دی تعیناتی دی منظوری آئین دے آرٹیکل 175 اے 13 دے تحت ݙتی ۔

لندن۔8مئی(اے پی پی) وزیراعظم محمد شہبازشریف امیر مقام  دی طرفوں خیبرپختونخوا اچ اٹے دے بحران تے ݙیوائی ونڄݨ آلی توجہ دا وختی نوٹس گھندے ہوئیں ایندی تحقیقات تے وختی طور تے بحران مکاوݨ کیتے ضروری اقدامات چاوݨ دی متعلقہ حکام کوں ہدایت کرݙتی۔ وزیراعظم آفس دے میڈیا ونگ توں جاری بیان موجب وزیراعظم شہبازشریف  نال مشیر و صدر پاکستان مسلم لیگ(ن )خیبرپختونخوا انجینئرامیرمقام  خیبرپختونخوا اچ اٹے دے بحران بارے ازبکستان توں وزیر اعظم نال رابطہ کیتے تے وزیراعظم کوں صوبے اچ اٹے دے بحران بارے عوام اچ پاتی ونڄݨ آلی تشویش دا ݙسائے جیں تے وزیراعظم وختی ایکشن گھندے ہوئیں تحقیقات دا حکم ݙتا تے وختی بحران مکاوݨ کیتے حکام کوں ضروری اقدامات چاوݨ دی ہدایت کرݙتی ۔وزیراعظم شہبازشریف آکھیے خیبرپختونخوا سودھے ٻئے صوبے اتنے ہی اہمیت دے حامل اے جتنا جو پنجاب ،انہاں آکھیے خیبرپختونخوا دے عوام دی مشکل ساݙی مشکل اے۔

اسلام آباد۔8مئی(اے پی پی) صوبہ سندھ اچ ضمنی بلدیاتی انتخابات اچ 63مختلف یونین کونسلاں اچوں 61 دے نتائج مل ڳئن جݙاں جو ݙونشستاں تے تصادم پاروں پولنگ مکمل نی تھی سڳی ۔ الیکشن کمیشن توں جاری کیتی ڳئی تفصیلات موجب کراچی اچ 11 یونین کونسلاں دے نتائج مکمل تھی ڳئن ، ایں توں انڄ حیدر آباد اچ 10 اچوں 8 یونین کونسلاں اچ پولنگ مکمل جݙاں جو 2 اچ تصادم پاروں ملتوی تھی ڳئی ۔ اندرلے سندھ دے مختلف ضلعیں اچ ضمنی بلدیاتی الیکشن کیتے نتائج داعمل مکمل تھی ڳئے ۔

اسلام آباد۔7مئی  (اے پی پی) وزیر اطلاعات مریم اورنگزیب آکھیا جو فارن ایجنٹ دا بیان سݨ تے لڳدے جو اوں وزیراعظم دی برطانوی بادشاہ نال ویڈیو ݙیکھ ڳھدی اے۔ ملکی مسئلے دا حل اے جو تساں جیل ونڄو اتے ملک دے خلاف سازش، کوڑ اتے چوریاں تے تساں کوں سزا تھیوے۔ آݙت وار کوں عمران خان دے بیان تے ردعمل اچ انہاں آکھیا جو تساݙا شر، زہر، غلیظ ذہنیت، معاشرے اچ عدم برداشت اتے تشدد پیدا کریندا پے۔ ملک کوں تساݙے جیہا فراڈ، فتنہ، فساد، انتشار اتے خلفشار نیں روٹی، روزگار اتے کاروبار چاہیدے۔ انہاں آکھیا جو ملک اچ انتہاپسندانہ رویاں دی وجہ تساں ہیوے جئیں پاروں اڄ جتھاں دے ہتھوں لوکاں دا قتل تھیندا پے۔ ہندوستان، کݙاہیں کشمیر، کݙاہیں اسلام تے گھٹیا سیاست کریندے امدو اتے اج وی کریندے پیو۔ سی پیک تے کم دی رفتار تکھی تھیندیں ای فارن فنڈڈ ایجنٹ کوں پاگل پن دا دورہ پے ڳے۔ وزیر خارجہ بلاول بھٹو دے کامیاب دورہ بھارت اتے بھارتی وزیر خارجہ کوں جواب دے بعد عمران خان پورا پاگل تھی ڳے۔

اسلام آباد۔7مئی  (اے پی پی) وفاقی وزیرمنصوبہ بندی،ترقی تے اصلاحات  احسن اقبال آکھیا جو عمران نیازی جیڑھی ڈھٹائی نال اتے بے دریغ مذہب کارڈ استعمال کیتے اوندے نتیجے سامھے امدے پن۔ خود ایندے قبیلے اچ مردان دا واقعہ ایں “مذہبی ٹچ” دا شاخسانہ اے۔ آݙت وار کوں اپݨے ٹویٹ اچ انہاں آکھیا جو عمران نیازی اتے اوندے مقامی رہنماواں میݙے خلاف وی مذہبی کارڈ کھیڈیا جئیں دا نتیجہ مئیں تے قاتلانہ حملے دی صورت نکلیا۔ عمران نیازی معیشت اتے سیاست تاں تباہ کیتی، معاشرت وی جنونیت اتے عدم برداشت دا شکار کر ݙتی اے۔

اسلام آباد۔1مئی  (اے پی پی) وزیراعظم شہباز شریف آکھیا جو محنت کشاں اتے مزدوراں دا جڳ ݙیھاڑ اساکوں انہاں محنت کشاں دی قربانیاں دی یاد ݙویندے جنہاں اپݨے حقوق کیتے ٻہوں جدوجہد کریندیں ہوئیں اپݨی جاناں دا نذرانہ پیش کیتے۔ اے نا صرف محنت دے تقدس اتے وقار دی علامت اے بلکہ اے ملک دی معاشی ترقی اچ مرکزی حیثیت رکھݨ آلے مزدوراں اتے محنت کشاں دی اہمیت دا اعتراف اے۔ وزیر اعظم آفس دے  میڈیا ونگ توں جاری بیان موجب وزیراعظم محنت کشاں دے جڳ ݙیھاڑ تے سنیھے اچ آکھیا جو وزیراعظم آکھیا جو اساݙا عظیم مذہب اسلام سماجی انصاف، مساوات اتے انسانی  حقوق دے احترام دے اصولاں تے زور ݙیندے، اللہ تعالیٰ اتے خاتم النبیین رسول اللہ صلی اللہ علیہ وسلم اساکوں حکم ݙتے جو اساں مزدوراں دے حقوق کوں ٻہوں اہمیت ݙیوں اتے انہاں حقوق کوں اپݨا بنیادی فریضہ سمجھدیں ہوئیں انہاں دی انجام دہی اچ کوتائی نہ کرن۔ حضور صلی اللہ علیہ وسلم دی زندگی اچ اساکوں محنت دی عظمت اتے محنت کش طبقے دے حقوق دے احترام دی ٻہوں متاثر کن مثالاں ملدن۔

اسلام آباد۔1مئی  (اے پی پی) وزارت خارجہ آکھیا جو سوڈان اچ پھتے ٻے 93 93 پاکستانی پی کے 754 دے ذریعے اسلام آباد انٹرنیشنل ایئرپورٹ پڄ ڳن، ایں توں پہلے اتھ 636 پاکستانیاں کوں ایئرفورس دی پنڄ خصوصی پروازاں دے ذریعے کراچی دے جناح انٹرنیشنل ایئر پورٹ تے آندا ڳیا ہئی۔ ترجمان دفتر خارجہ اپݨے جاری بیان اچ آکھیا جو الحمد للہ سوڈان توں سارے پاکستانیاں تقریباً ہک ہزار دے انخلا دا عمل آندے چووی توں 48 گھنٹیاں اچ پورا کر ڳھدا ویسی۔

اسلام آباد۔1مئی  (اے پی پی):وفاقی حکومت قومی صنعتی تعلقات کمیشن (این آئی آر سی) دے 8 ارکان دی تقرری کر ݙتی اے جئیں دا وزارت اطلاعات تے نشریات وفاقی کابینہ دی منظوری دی روشنی اچ باضابطہ نوٹیفکیشن جاری کرݙتے۔ وزارت اطلاعات توں جاری نوٹیفکیشن موجب 8 شخصیات دا این آئی آر سی دے ارکان دے طور تقرر کیتا ڳے انہاں اچ   ریٹائرڈ سول سرونٹ سید نورالحسنین ، ریٹائرڈ ڈسٹرکٹ اینڈ سیشن ججوں عبدالقیوم، سہیل اکرم ،محمد زبیر خان اتے شبیر حسین اعوان کوں رکن مقررکیتا ڳے۔ وکلا توں   محمد سراج الاسلام خان، عبدالغنی اتے منور حسین طوری وی این آئی آر سی دے مقرر تھیوݨ آلے ارکان اچ شامل ہن۔ کابینہ وزارت اطلاعات دی سمری تے انہاں خالی عہدیاں تے تقرریاں دی منظوری ݙتی ہئی۔  مزدوروں دے حقوق دے تحفظ اتے انہاں دے حالات کار دی بہتری کیتے ٻݨے این آئی آر سی وزارت اطلاعات دا ذیلی  ادارہ اے ۔ اے  این آئی آر سی انڈسٹریل ریلیشنز کمیشن (آئی آر اے) دے سیکشن 53 دے تحت ٻݨایا ویندے۔ مزدوراں دے عالمی ݙینھ دے موقع تے وزیراعظم محمد شہباز شریف دا اے مزدوراں اتے محنت کشاں کیتے ہک تحفہ اے۔

اسلام آباد۔1مئی  (اے پی پی) اسپیکر قومی اسمبلی راجہ پرویز اشرف اتے ڈپٹی اسپیکر زاہد اکرم درانی وادی نیلم اچ سیاحاں نال تھیوݨ آلے حادثے تے افسوس کیتے۔ جاری بیان اچ انہاں وادی نیلم اچ سیاھاں دی جیپ کوں پیش تھیوݨ آلے حادثے تے افسوس کریندیں ہوئیں حادثے اچ قیمتی جاناں دے ضیان تے ݙکھ تے افسوس کیتے۔ انہاں آکھیا جو حادثے اچ جاں بحق تھیوݨ آلیاں دے ݙکھ اچ برابر دے شریک ہیسے۔  اسپیکر اتے ڈپٹی اسپیکر قومی اسمبلی اللہ تعالیٰ حادثے اچ جاں بحق تھیوݨ آلیاں دے درجات دی بلندی اتے سوگوار ٹبر کوں اے صدمہ برداشت کرݨ کیتے صبر عطا کرݨ دی دعا کیتی۔

اسلام آباد۔1مئی (اے پی پی) وزیر مملکت برائے خارجہ  امور  حنا ربانی کھر  قطر دے دارالحکومت دوحہ اچ اقوام متحدہ ولوں افغانستان بارے  خصوصی اجلاس اچ شریک تھیندی پن، ٻے ملکاں دے رہنماواں نال ملاقاتاں وی کریسن۔ دفتر خارجہ توں جاری بیان موجب اقوام متحدہ دے سیکرٹری جنرل انتونیو گوتریش دی سربراہی اچ تھیوݨ آلے ایں اجلاس اچ علاقائی اتے عالمی ملک افغانستان دی اڄوکی صورتحال کوں تعمیری ڳالھ مہاڑ دے تناظر اچ بحث کریسن۔  وزیر مملکت برائے خارجہ امور افغانستان بارے پاکستان دا نقطہ نظر پیش کریسن۔

پنجاب اچ مفت اٹے دی تقسیم صرف صوبے دے رہݨ آلیاں تئیں محدود کائنا ہئی بلکہ پنجاب اچ رہݨ آلے کے پی، آزاد کشمیر، گلگت بلتستان دے لوکاں کوں وی اے سہولت ݙتی ڳی ہئی۔ اینویں خیبرپختونخوا دے تقریبا 5.23 ملین ٹٻرحکومت دی فلاحی سکیم توں فائدہ چاتے جیڑھے جو مقررہ ہدف دا نوے فیسڈ توں ودھ حاصل کر چکین۔ وزیراعظم شفافیت کوں یقنی ٻݨاوݨ اتے مستحقین دی مناسب سہولت کیتے   راولپنڈی، سرگودھا، بہاولپور، لاہور، قصور، ڈیرہ غازی خان اتے مظفر گڑھ سودھے صوبیاں اچ اٹے دی تقسیم دے جہیں دے غیر اعلانیہ دورے وی کیتے ۔ایں موقع تے انہاں لوکاں نال ڳالھ مہاڑ کیتی، انہاں دے مسئلے سݨیے اتے انہاں دے فوری ازالے دی ہدایت جاری کیتی۔ انہاں اٹے دے تھیلے حوالے کرݨ توں پہلے مستحقین دی تفصیلات دی تصدیق دے عمل دا وی جائزہ ڳھدا اتے ہدایت کیتی جو رمضان المبارک اچ کہیں شہری کوں کہیں قسم دی پریشانی نہ تھیوے۔ وزیراعظم ایں ڳالھ تے زور ݙیندے رہیے جو اینکوں صرف ہک سرکاری فریضہ نہ سمجھیا ونڄے بلکہ رمضان المبارک اچ اللہ تعالیٰ دی خوشنودی حاصل کرݨ کیتے انسانیت دی خدمت دے طور کم کرن۔ وزیراعظم شہباز شریف آکھیا جو 75 سالیں اچ پہلی واری مفت اٹا ݙتا ویندا پے۔  وفاقی وزیر اطلاعات مریم اورنگزیب اپݨے ٹویٹ اچ آکھیا جو  رمضان اچ پنجاب،خیبرپختونخوا ، سندھ اتے اسلام آباد اچ کروڑاں غریباں کوں ایں مہانگ اچ پوری شفافیت اتے ایمان داری نال مفت اٹا ݙتا ڳیا۔ وفاقی وزیر اطلاعات آکھیا جو وزیراعظم شہباز شریف خود ایں عمل دی نگرانی کیتی، شہراں دے دورے کر تے جائزہ ڳھدا۔ وزیراعظم آکھیا جو تاریخی سکیم دی کامیابی اچ انتظامی افسراں اتے عملے ݙینھ رات محنت کیتی جیڑھی قابل تعریف اے۔ یاد راہوے جو حکومت ایں بارے ہک جامع آگاہی مہم وی چلائی ہئی جئیں اچ لوکاں کوں آکھیا ڳیا ہئی جو او اپݨے شناختی کارڈ نمبر دا ہک ایس ایم ایس ٻھیج تے مفت اٹے کیتے اپݨی اہلیت کوں بینظیر انکم سپورٹ پروگرام دی 8717 ہیلپ لائن تے ٻھیجن کیونجو ڈیٹا بی آئی ایس پی نال منسلک اے۔ معیار موجب بی آئی ایس پی نال رجسٹرڈ اتے 60   یا ایں توں ڳھٹ کرتے  “پاورٹی سکور ” دے حامل غریب ٹٻر ایں سہولت توں فائدہ چاوݨ دے اہل ہن۔ رجسٹرڈ ٹبر ہک مہینے اچ 30 کلو اٹا ڳھنݨ دے حقدار ہن۔ وزیراعظم بعد اچ اعلان کیتا ہئی جو بی آئی ایس پی دے ڈیٹا نال رجسٹرڈ نہ تھیوݨ آضے لوکاں اچ وی تقسیم دی ڄاہ تے مخصوص ڈیسک دے ذریعے سکیم توں فائدہ چاوݨ دے اہل ہوسن۔ ایں کم کوں ملک دی تاریخ دے ساریاں توں وݙے پیکیج دے طور تعریف کیتی ڳی۔

اسلام آباد۔30اپریل(اے پی پی)وفاقی حکومت دے توانائی دی بچت و تحفظ دے منصوبہ سانڳے کفایت شعاری مہم، متبادل توانائی ذرائع دی حوصلہ افزائی سودھا کثیرالجہتی اقدامات تے کامیابی نال عمل درآمد جاری اے جیندا مقصد قومی وسائل دا مناسب تے منصفانہ استعمال اے۔ وزیر اعظم شہباز شریف ایں سال جنوری اچ کثیر الجہتی منصوبہ شروع کیتا ہا ڄیڑھا بجلی و ایندھن دی بچت سودھا شمسی ٹیکنالوجی اتے برقی گاݙیان ڄھیں متبادل ذرائع استعمل کرݨ دے کئی اقدامات تے توجہ ودھیندے۔ منصوبے نال حکومت قومی وسائل دے ضیان کوں روکݨ، قوم  دی ریت وٹاوݨ دی حوصلہ افزائی کریندی پئی اے، وفاقی محکماں بجلی دے غیر ضروری استعمال توں بچت اپنائی اے جو ایندے نال توانائی دے استعمال اچ 30 فیصد کمی آسی، ملک اچ پچھلے انہالے اچ 29 ہزار میگاواٹ اتے سیالے اچ 12 ہزار میگاواٹ بجلی استعمال تھئی۔ ٻئی 17 ہزار میگاواٹ بجلی گرمیاں اچ استعمال تھئی جیندے اچ 5 ہزار 3 سو میگاواٹ ایئر کنڈیشنرز پاروں اتے 12 ہزار میگاواٹ پکھیاں پاروں رلی اے، بجلی کھپت ڳھٹاوݨ کیتے حکومت پروگرام ٻݨائے جو توانائی دی بچت آلے پکھے استعمل کیتے ونڄن، ودھ بجلی لاوݨ آلے پکھیاں تے وادھو ڈیوٹی لائی ویسی اتے یکم جولائی 2023 توں انہاں دی پیداوار روکی ویسی۔ ڳھٹ توانائی دے پکھیاں نال سالانہ 15 ارب روپے بچسن۔ یکم فروری دے بعد ودھ بجلی آلے بلب دی پیداوار وی روک ݙتی ڳئی اے جیندے نال 23 ارب روپے سالانہ دی بچت تھیسی، توانائی بچاوݨ کیتے ہائوسنگ سوسائٹیز دے ضمنی قوانین اتے بلڈنگ کوڈز اچ اصلاحات کیتاں ڳن، گیزر اچ مخروطی آلہ لاوݨ نال سالانہ 92 ارب روپے دی بچت تھیسی۔ سٹریٹ لائٹس دا سوڄھلا دی صلاحیت 50 فیصد تئیں ڳھٹاوݨ نال سالانہ 4 ارب روپے بچسن۔ ای بائک دی مقامی پیداوار کیتے کوشش تھیندی پئی اے، ای بائیک آوݨ نال قومی خزانے کوں 86 ارب روپے دی بچت تھیسی۔ حکومت دے سولر انرجی منصوبے نال مہانگے ڈیزل اتے فرنس آئل دے درآمدی  بل کوں ڳھٹاوݨ، سرکاری عمارتاں، بجلی و ڈیزل تے چلݨ آلے ٹیوب ویلاں و ڳھٹ کھپت گھریلو صارفین کوں بجلی ملدی پئی اے، سرکاری عمارتاں دی سولرائزیشن، ݙیݙھ لکھ توں ودھ صنعتی اتے تجارتی صارفین کوں جون تئیں ایڈوانسڈ میٹرنگ انفراسٹرکچر سسٹم تے منتقل کیتا ویندا پئے۔ دیہپی علاقیاں اچ وی 1-4 میگاواٹ دے سولر مائیکرو گرڈ اسٹیشن لاعے ویسن۔ “پلینیٹ چیمپس” ایپلی کیشن نال آب و ہوا، پاݨی و توانائی دے تحفظ نال فضلہ ٹھکانے لاوݨ کیتے آڳاہی کیتی ویسی، موسمیاتی تبدیلی، پاݨی دی کمی و توانائی دی کمی ڄھیں عالمی مسائل بارے اچ نوجوان نسل اچ شعور ودھایا ویسی۔

اسلام آباد۔30اپریل(اے پی پی)وفاقی وزیر خزانہ و ریونیو سینیٹر محمد اسحاق ڈار نال پاکستان اچ اسلامی جمہوریہ ایران ے سفیر سید محمد علی حسینی الوداعی ملاقات کیتی۔ وزیر خزانہ پاکستان اتے ایران وچال تکڑے مشترکہ مذہبی و ثقافتی تعلقات ودھاوݨ دا عزم کریندے پاکستان اچ کامیاب سفاتکاری تے ایرانی سفیر کوں مبارک ݙتی۔ وزیر خزانہ ایرانی سفری کوں الوداع کریندے ایران اتے عوام کیتے نیک خواہشات پچائن۔ ایرانی سفیر سید محمد علی حسینی مختلف شعبیاں اچ پاکستان نال تعاون ودھاوݨ تے تعلقات ٻئے تکڑے کرݨ کیتے روابط جوڑے رکھݨ تے زور ݙتا۔

اسلام آباد۔26اپریل (اے پی پی):وفاقی کابینہ پنجاب اتے خیبر پختونخوا دے عام انتخابات دے حوالے نال الیکشن کمیشن آف پاکستان کوں 21 ارب روپے دی فراہمی دے حوالے نال وفاقی وزارت خزانہ دی سمری پارلیمنٹ کوں ریفر کرݨ، الیکٹرک بائیکس اتے الیکٹرک رکشیں دے حوالے نال فنانسنگ فسیلیٹی اتے انویسٹ پاکستان کیتے قانون سازی کرݨ دی منظوری ݙتی جݙاں جو وزیراعظم محمد شہباز شریف کبل سوات دے سی ٹی ڈی سٹیشن اچ تھیوݨ آلے واقعہ دی تحقیقات اچ وفاقی حکومت دا نمائندہ شامل کرݨ تے شہید تھیوݨ آلے شہدا کوں شہدا پیکیج ݙیوݨ دی ہدایت کیتی ۔وزیراعظم آفس دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت وفاقی کابینہ دا اجلاس ٻدھ کوں وزیراعظم ہاؤس اچ منعقد تھیا۔وفاقی کابینہ دے اجلاس اچ سوات دے علاقے کبل اچ کاؤنٹر ٹیررازم ڈیپارٹمنٹ پولیس سٹیشن اچ تھیوݨ آلے واقعہ دے نتیجہ اچ قیمتی جانی ضیان تے ݙکھ تے افسوس کیتا ڳئے اتے شہداء کیتے فاتحہ خوانی اتے حادثے اچ زخمی تھیوݨ آلے لوکاں دی وختی صحت یابی کیتے دعا کیتی ڳئی ۔ وزیراعظم وفاقی وزارت داخلہ کوں کبل سوات دے سی ٹی ڈی سٹیشن اچ تھیوݨ آلے واقعہ دی تحقیقات اچ وفاقی حکومت دا نمائندہ شامل کرݨ دی ہدایت کیتی ۔ وزیراعظم مزید ہدایت کیتی جو پشاور پولیس لائن دھماکے اچ شہید تھیوݨ آلیں کوں جیڑھا شہدا پیکیج ݙتا ڳئے ایں طرز تے شہداء پیکیج کبل واقعہ اچ شہید تھیوݨ آلیں کوں وی ݙتا ونڄے ۔ وفاقی کابینہ پنجاب اتے خیبر پختونخوا دے عام انتخابات دے حوالے نال الیکشن کمیشن آف پاکستان کوں 21 ارب روپے دی فراہمی دے حوالے نال وزارت خزانہ دی سمری کوں پارلیمنٹ کوں ریفر کرݨ دی منظوری ݙتی ۔ وفاقی کابینہ سرمایہ کاری بورڈ دی سفارش تے انویسٹ پاکستان کیتے قانون سازی کرݨ دی منظوری ݙتی ، ایں قانون سازی دے ذریعے سرمایہ کاری بورڈ دے تحت ”انویسٹ پاکستان“ دا دفتر قائم کیتا ویسی جیڑھا جو پبلک پرائیویٹ پارٹنر شپ اچ کم کریسی ، مذکورہ قانون سازی سرمایہ کار دوست سروسز دی فراہمی کوں یقینی بݨاوݨ اچ مدد ݙیسی ۔ وفاقی کابینہ دے اجلاس اچ کابینہ دے 8 نومبر 2017ء دے فیصلے جیں اچ ساریاں وزارتاں تے ڈویژنز کوں ایں ڳالھ دا پابند کیتا ہئی جو او آپݨے ایکٹ تے رولز اچ لفظ ”وفاقی حکومت“ دی جاہ ’’موزوں اتھارٹیز‘‘ دا استعمال کرݨ کیتے ترامیم کرن، دے حوالے نال گائیڈ لائنز دی منظوری ݙتی ڳئی ۔ وفاقی کابینہ وزارت بحری امور دی سفارش تے اِن لینڈ ریوینو سروس دے گریڈ21 دے افسر سیدین رضا زیدی کوں ڈیپوٹیشن دی بنیاد تے کراچی پورٹ ٹرسٹ دا چیئرمین تعینات کرݨ دی منظوری ݙتی ۔ وفاقی کابینہ اقتصادی رابطہ کمیٹی دے 13 اپریل 2023 کوں منعقد تھیوݨ آلے اجلاس اچ کیتے ڳئے فیصلیں دی توثیق کرݙتی ۔ انہاں فیصلیں اچ جنوبی وزیرستان دے انگور اڈہ کسٹم اسٹیشن کوں افغانستان اتے وسطی ایشیائی ریاستاں کیتے ایکسپورٹ لینڈ روٹ ڈیکلیئر کرݨ دی منظوری شامل اے ، مزید برآں انہاں فیصلیں اچ ماحول دوست الیکٹرک بائیکس تے الیکٹرک رکشیں دا استعمال عام کرݨ کیتے فنانسنگ فسیلیٹی دی منظوری وی شامل اے جیں دے تحت 5 لکھ روپے دا قرضہ پرائم منسٹر یوتھ بزنس اینڈ ایگرکلچر لون اسکیم دے ذریعے صفر فیصد مارک اَپ تے دستیاب ہوسی۔ ایں اقدام توں ملک کوں مہانگے ایندھن دے درآمد دی مد اچ خاطر خواہ بچت تھیسی ۔

اسلام آباد۔22اپریل(اے پی پی):وزیرِ اعظم محمد شہباز شریف ہفتے کوں چارے صوبیں دے گورنراں کوں ٹیلی فون کرتے انہاں کوں عید الفطر دی مبارخ ݙتی ۔ وزیرِ اعظم آفس دے پریس ونگ دے بیان موجب وزیرِ اعظم محمد شہباز شریف گورنر بلوچستان عبدالولی کاکڑ، گورنر خیبر پختونخوا غلام علی، گورنر سندھ کامران خان ٹیسوری اتے گورنر پنجاب بلیغ الرحمن کوں ٹیلی فون تے عید دی مبارخ تے انہاں کیتے آپݨی نیک خواہشات دا اظہار وی کیتے

اسلام آباد۔22اپریل(اے پی پی)صدر مملکت ڈاکٹر عارف علوی نال عید الفطر دے موقع تے سفارتکارں سودھے مختلف شعبہ ہائے زندگی توں تعلق رکھݨ آلی شخصیات ایوان صدر اچ ملاقات کیتی۔ اسلام آباد اچ متعین مختلف ملکاں دے سفیراں، ارکان پارلیمنٹ، سول سوسائٹی دی نمایاں شخصیات، ایوان صدر دے عملہ اتے انہاں دے اہل خانہ سودھے زندگی دے مختلف شعبیں توں تعلق رکھݨ آلے لوکاں ہفتے کوں اتھاں ایوان صدر اچ عید ملن پروگرام اچ صدر مملکت نال ملاقات کیتی تے انہاں کوں عید الفطردی مبارکباد ݙتی۔ خاتون اول بیگم ثمینہ عارف علوی وی ایں موقع تے صدر مملکت دے رلے ہن ۔ صدر مملکت ایوان صدر اچ مہماناں دا پرتپاک خیرمقدم کیتا، ڈاکٹر عارف علوی نال عید الفطر دے موقع تے ملاقات کرݨ آلے غیر ملکی سفارت کاراں صدر مملکت اتے خاتون اول کوں عیدالفطر دی مبارخ ݙتی تے انہاں نال تصویراں بݨوائیاں ۔

راولپنڈی ۔22اپریل (اے پی پی):پاک فوج دےسربراہ جنرل سید عاصم منیر عیدالفطر دا پہلا ݙینھ باجوڑ ، خیبر پختونخوا اچ پاک افغان بارڈر تے تعینات فوجی جواناں دے نال گزاریا، آرمی چیف افسراں تے نینگراں نال عید دی نماز ادا کیتی تے انہاں دے بلند حوصلے دی تعریف کیتی ۔ آئی ایس پی آر موجب ایں موقع تے پاک فوج دے سربراہ جنرل قمر جاوید باجوہ آکھیے پاک فوج سرحداں دے دفاع کیتے پرعزم اے اتے افواجِ پاکستان ملکی سالمیت کوں یقینی بݨاوݨ کیتے کہیں وی خطرے کوں ناکام بݨاوݨ کیتے ہر ویلھے تیار اے ۔ انہاں آکھیے محافظینِ پاکستان دشوار رستیں ، سخت موسمی حالات اتے اپݨے پیاریں توں پرے رہݨ دے باوجود، اپݨے فرائض کوں مقدم رکھیندن کیوں جو سرحداں دی حفاظت توں ودھ مقدس کجھ کائنی ۔آرمی چیف شہداء کوں زبردست خراجِ تحسین پیش کیتے تے زور ݙتے جو عید دے ݙینھ اساکوں مادر وطن دے دفاع اتے دہشت گردی دی لعنت مکاوݨ کیتے آپݨی جاناں دا نذرانہ پیش کرݨ آلیں کوں ہرگز فراموش نی کرݨا چاہیدا ۔ آرمی چیف خصوصی طور تے شُہداء دے اہل خانہ کیتے نیک خواہشات دا اظہار کیتے۔ایں توں انڄ آرمی چیف جواناں تے آفیسرز دی آپریشنل تیاری اتے مستعدی دی وی تعریف کیتی ۔ ایں توں پہلے آمد تے کور کمانڈر پشاور آرمی چیف دا استقبال کیتا۔

اسلام آباد۔21اپریل(اے پی پی)صدر مملکت ڈاکٹر عارف علوی ہراسانی کیس اچ ناقص بنیاداں تے غیر ضروری قانونی چارہ جوئی دی حوصلہ شکنی کیتے ملزم تے جرمانہ عائد کرݙتا۔ ایوان صدر دے پریس ونگ توں جاری بیان موجب صدر مملکت آکھیے اصل کیس دی کارروائی حالی زیر التوا اے جیں اچ ہراسانی دی حقیقت دا پتہ لاوݨ کیتے شواہد ریکارڈ کیتے ونڄݨ باقی ہن ، ملزم کارروائی کوں طول ݙیوݨ کیتے غیر ضروری طور تے درخواست دائر کیتی۔ صدر آکھیے ایجھے رجحان دی حوصلہ شکنی دی لوڑھ اے کیوں جو اے ویلھا حربے استعمال کرݨ دے سوا کجھ کائنی ۔ ڈاکٹر عارف علوی آکھیے اے طے شدہ ڳالھ اے جو کہیں وی فریق کوں عجلت اچ اپیل دائر کرݨ دی اجازت کائنی ، اپیل توں نہ صرف محتسب بلکہ صدر دا قیمتی وقت ضائع تھئے۔ تفصیلات موجب سکھر اچ تعینات ایئرپورٹ سکیورٹی فورس (اے ایس ایف) دی خاتون اسسٹنٹ سب انسپکٹر اے ایس آئی (شکایت کنندہ) کوں ایئرپورٹ منیجر مبینہ طور تے ہراساں کیتا۔ الزامات دے مطابق ملزم خاتون کوں شادی کیتے دٻاؤ پاتا تاں جو شادی دے چار مہینے دے اندر ہی ملزم اوندے نال بدسلوکی شروع کرݙتی، فروری 2022 اچ ملزم خاتون کوں طلاق ݙتی تے بعد اچ کٹھے رہݨ کیتے دٻاؤ پاتا ، ملزم ایئرپورٹ منیجر دی حیثیت نال نوکری ختم کرݨ دی وی تڑی ݙتی تے ناشائستہ واٹس ایپ پیغامات بھیجے۔ شکایت کنندہ وفاقی محتسب انسداد ہراسیت نال رابطہ کیتا ۔ محتسب کیس تے محتسب دے دائرہ اختیار دے حوالے نال ملزم دے اعتراضات کوں مسترد کرݙتا ۔ ملزم محتسب دے حکم دے خلاف صدر مملکت کوں اپیل کیتی جیں کوں صدر دی مسترد کرݙتا ۔ صدر مملکت اپݨے فیصلے اچ آکھیے ملزم فضائی سفر دا کرایہ ادا کرے، خاتون کوں سماعت کیتے کراچی توں اسلام آباد دا سفر کروا تے مزید ذہنی اتے مالی مشکلات اچ پاتا ڳئے ۔

اسلام آباد۔21اپریل (اے پی پی):وفاقی وزیر اطلاعات و نشریات مریم اورنگزیب آکھیے ‏قائد محمد نواز شریف دی مریم نواز دے رلے وزیراعظم سعودی عرب، ولی عہد شہزادہ محمد بن سلمان نال ملاقات تھئی اے ۔ آپݨے ٹویٹ اچ وفاقی وزیر مریم اورنگزیب آکھیے جو قائدین سعودی پاک برادرانہ تعلقات کوں مزید ودھاوݨ تے پاکستان کوں پیش آندے مسئلیں دے حل تے ڳالھ کیتی ۔ ۔ قائد نوازشریف سعودی قیادت کیتے نیک تمناواں دا اظہارکیتے۔

اسلام آباد۔21اپریل(اے پی پی):چیئرمین سینیٹ محمد صادق سنجرانی مسلمانانِ عالم اسلام اتے خاص طور تے پاکستانیاں کوں عید الفطر دے بابرکت اتے پر مسرت موقع تے دلی مبارخ ݙیندے ہوئیں آکھیے جو ماہ رمضان دی عبادات قوم اچ تقویٰ، نظم وضبط اتے صبرو تحمل دی خوبیاں کوں ودھارا ݙیندن ،سارے اہل اسلام ایں جوش وجذبے دا عملی مظاہرہ کریندے ہوئیں آپݨی دنیاوی اتے آخرت دی زندگی کوں کامیاب بݨاون، ماہ رمضان مسلماناں کیتے اللہ تعالیٰ دی طرفوں ھک عظیم تحفہ اے جیں دے فیوض و برکات توں مستفید تھی تے آخرت دی کامیابی حاصل کیتی ونڄ سڳدی اے ۔عیدالفطر دے موقع تے اپݨے پیغام اچ چیئرمین سینٹ آکھیے اللہ تعالیٰ سارے مسلماناں دی عبادات اتے دعاواں قبول فرمیندے ،عیدالفطر داݙینھ رمضان المبارک دے حوالے نال یوم تکمیل رحمت الٰہی اتے یوم تشکر اے۔

اسلام آباد۔21اپریل(اے پی پی):وفاقی وزیر داخلہ رانا ثنا اللہ خان عیدالفطر دے پر مسرت موقع تے پوری قوم تے امت مسلمہ کوں دلی مبارخ پیش کریندے ہوئیں آکھیے جو عیدالفطر مسلماناں کیتے خوشی اتے تشکردا ݙینھ ہے، پاکستانی ھک غیور اتے عزم و استقلال دی حامل قوم ہن،وزیراعظم شہباز شریف دی قیادت اچ اتحادی حکومت ݙینھ رات عوامی خدمت دے ایجنڈے کوں اڳوں ودھیندی پـئی اے ، پوری قوم رل تے جیویں ماضی اچ مختلف بحراناں کوں شکست ݙتی ہݨ وی انشاءاللہ سرخرو تھیسی ۔ عیدالفطر دے موقع تے اپݨے پیغام اچ وزیر داخلہ رانا ثنا اللہ خان آکھیے عید الفطر دا مقصد مسلمانا ں اچ اتحاد ، اخوت ، بھرپی ، ایثار تے سخاوت جیہے جذبات کوں ودھارا ݙیوݨا اے ۔ انہاں آکھیے غریب،مستحقین اتے ضرورت منداں کوں وی عید دیاں خوشیاں اچ شریک کروں، عید دے موقع تے دعا ہے اللہ تعالیٰ پاکستان اتے پاکستانی قوم دی مشکلات حل کرے۔