مظفرگڑھ،ایڈیشنل انسپکٹر جنرل ساؤتھ پنجاب دا 3 چھوہراں دے قتل دا نوٹس
مظفرگڑھ۔ 25 اکتوبر (اے پی پی) کوٹ ادو اچ ڈکیٹی وچال ترائے چھوہراں دے قتل تے ایڈیشنل آئی جی ساوتھ پنجاب ڈاکٹر احسان صادق سخت نوٹس ڳھندیں ہوئیں ݙو ایس پیز دے تحت سپیشل ٹیماں ٻݨائن۔ انہاں ڈی پی او کوٹ ادو کوں ڈاکواں دی فوری گرفتاری دا حکم ݙتے اتے متاثرین کوں یقین ݙوائے جو واقعے دے مجرماں کوں جلدی گرفتار کیتا وںجے۔ ایڈیشنل آئی جی حکم ݙتا جو ڈیوٹی اچ غفلت ورتݨ آلے پولیس افسراں دے خلاف سخت کاروائی کیتی ونڄے اتے ماتثرین کوں انصاف ݙیوݨ کیتے سارے وسائل لاتے ونجن۔ گزریل رات کوٹ ادو اچ تھاݨاں کوٹ ادو توں ہک کلومیٹر دے فاصلے تے واپڈا کالونی دے نیڑے سبزی منڈی دے سامھے ترائے مسلح ڈاکواں گن پوائنٹ تے ہک شہری توں موٹرسائیکل کھس تے بھجدیں ہوئیں رستے اچ آوݨ آلے ترائے نکے چھوہر 12 سالہ شعیب، 14 سالہ احسن اتے 16 سالہ طیب کوں فائرنگ کر تے قتل کر ݙتا ہئی اتے موقع توں ٻھج ڳئے ہن۔
