اسلام آباد۔ 2 اپریل (اے پی پی) پاکستان مختلف فریقین دی طرفوں سخت بیاناں دے سامݨے آوݨ دے باوجود امریکہ تے ایران وچال جاری مذاکراتی کوششاں تے امید دا اظہار کیتے۔ دفترِ خارجہ دے ترجمان طاہر حسین اندرابی پریس بریفنگ اچ آکھیا جو پاکستان دی کوششاں دا مقصد کشیدگی دا خاتمہ تے پائیدار امن دا رستہ ہموار کرݨ اے۔ انھاں آکھیا جو بیجنگ اچ پیش کیتا ڳیا پنج نکاتی امن منصوبہ تے اسلام آباد دے چار فریقی مذاکرات دے ست نکات کوں عالمی سطح تے وی تعریف کیتی ویندی پئی اے ۔
انھاں آکھیا جو امریکہ تے ایران دا پاکستان تے اعتماد ایندے ثالثی کردار دا اعتراف اے جݙاں جو پاکستان دا موقف بین الاقوامی اصولاں تے خطے اچ امن و استحکام دے ودھارے مبنی اے۔ترجمان آکھیا جو پاکستان خلیجی ملکاں تے ایران دی طرفوں کیتے ڳئے حملیں دی مذمت کیتی تے ایندے توں پہلے ایران تے تھیوݨ آلے حملے دی وی مذمت کیتی اے۔ انھاں آکھیا جو اساݙا موقف اصولاں، انسانی چارٹر دے اصولاں تے خطے اچ امن و استحکام کوں ودھارا ݙیوݨ دے مقصد توں قائم اے۔
امریکی تے ایرانی وفد دے مذاکرات کیتے پاکستان دے دورے دے بارے اچ پچھے ڳئے سوال تے ترجمان واضح کیتا جو ممکنہ مذاکرات دے ویلھے، ایجنڈے تے وفد دا تعین متعلقہ ملک خود کریسن ۔ مذاکرات اچ کہیں اسرائیلی نمائندے دی شرکت متعلق ہک سوال تے ترجمان آکھیا جو انھاں کنے ایجھی کوئی اطلاع کائنی، البتہ پاکستان امریکہ، یورپی شراکت داراں، او آئی سی تے جی سی سی ملکاں نال ڳالھ کریندا پئے جنھاں اچوں کجھ دے اسرائیل نال سفارتی تعلقات ہن۔ترجمان آکھیا جو ایں ٻہوں اوکھے سہولتی عمل اچ پیدا تھیوݨ آلی پیچیدگیاں دے باوجود اساݙی کوششاں جاری رہسن، چیلنجز تے رکاوٹاں اپݨی جاہ تے تھی سڳدیاں ہن لیکن اساں سہولت کاری دی اپݨی کوششاں تے ڳالھ مہاڑ دے ودھارے کیتے اپݨی جدوجہد جاری رکھیسوں۔ انھاں ایں تاثر کوں مسترد کیتا جو پاکستان ایران تے دٻاؤ پیندا پئے تے آکھیا جو پاکستان صرف ڳالھ مہاڑ تے سفارت کاری کوں ودھارا ݙیندا پئے
انھاں میڈیا کوں آگاہ کیتا جو ایرانی حکومت پاکستانی پرچم بردار مزید 20 بحری جہازاں کوں آبنائے ہرمز توں گزرݨ دی اجازت ݙتی اے جنھاں اچوں روزانہ ݙو بحری جہاز آبنائے ہرمز توں گزردے پئن۔ ترجمان آکھیا جو اے مثبت اعلان ڳالھ مہاڑ، سفارت کاری تے اعتماد سازی دے اقدامات دی سمت اچ اساݙی اجتماعی کوششاں کوں تکڑا بݨاوݨ دی طرف ہک بامعنی پیش رفت اے جیڑھا جو اڳوں ودھݨ دا واحد رستہ اے۔طاہر حسین اندرابی آکھیا جو ایرانی وزارتِ خارجہ دے ترجمان دا اے بیان جو ایران مذاکرات اچ حصہ کائنی گھندا پیا، غلط انداز اچ پیش کیتا ڳیا تے ترجمان میڈیا کوں افغانستان تے بھارت اچ کوڑی معلومات کھنڈاوݨ آلیں وچال گٹھ جوڑ دے حوالے نال خبردار کیتے۔
انھاں آکھیا اے لوک عادی کوڑے ہن تے ایں صورتحال اچ جݙاں اساں ڳالھ مہاڑ دی سہولت کاری دے ہک نازک تے حساس عمل توں گزردے پئے ہیں تے اے جو اساݙے خطے اچ کشیدگی تے عملی طور تے جنگ جہیں صورتحال موجود اے، ایجھی کوڑی خبراں کھنڈاوݨ ٻہوں خطرناک تھی سڳدے۔ انھاں آکھیا جو یورپی کونسل تے ملائیشیا سودھے ٻئے ملکاں چار فریقی مذاکرات دے ست نکات تے نائب وزیراعظم محمد اسحاق ڈار دے دورہ بیجنگ دے دوران پیش کیتے ڳئے پنج نکاتی امن منصوبے دی حمایت دا اظہار کیتے۔انھاں آکھیا جو قابلِ تصدیق ریکارڈ موجب بھارت اچ ہر سال مسلماناں دے خلاف ہجوم دے تشدد (لنچنگ) دے تقریباً 100 واقعات پیش آندن لیکن مجرم ریاستی سرپرستی دی وجہ توں عدالتی گرفت توں بچ نکلدے ۔
ترجمان دفترِ خارجہ ارومچی اچ پاکستان-افغانستان مذاکرات دے حوالے نال آکھیا جو پاکستان ہک قابلِ اعتماد عمل دی حمایت کیتے اپݨا وفد بھیجے جیندے مقصد محفوظ پناہ گاہواں دے مسئلے دا پائیدار حل لبھݨ تے افغانستان توں سرحد پار دہشت گردی دا خاتمہ اے۔ انھاں آکھیا جو اساݙی شرکت اساݙے بنیادی خدشات دا اعادہ اے لیکن حقیقی عمل دی ذمہ داری افغانستان تے عائد تھیندی اے جینکوں پاکستان دے خلاف اپݨی سرزمین استعمال کرݨ آلے دہشت گرد گروہاں دے خلاف واضح تے قابلِ تصدیق اقدامات کرݨے پوسن۔
متحدہ عرب امارات تے افغان وزرائے خارجہ وچال ٹیلیفونک ڳالھ مہاڑ دے بعد سامݨے آوݨ آلے بیان متعلق سوال تے انھاں آکھیا جو افغان فریق جیں ارادے دا اظہار کیتے، ایندی حمایت تحریری شکل اچ ٹھوس، قابلِ تصدیق یقین دہانیاں دے ذریعے کرݨی ہوسی جو انھاں دی سرزمین سرحد پار دہشت گردی کیتے استعمال کائناں تھیسی۔ انھاں آکھیا جو ایجھی یقین دہانی 2021 اچ دوحہ اچ طالبان دی طرفوں تحریری صورت اچ ݙتی ڳئی ہئی پر ایندے تے عمل درآمد کائنی کیتا ڳیا۔ انھاں میڈیا کوں ݙسایا جو آپریشن ”غضب للحق“ جاری اے تے کجھ ݙینھ پہلے وی پاکستانی سکیورٹی فورسز کارروائیاں کیتن جݙاں جو مذاکرات دے باوجود ایں آپریشن اچ کوئی تبدیلی کائنی آئی۔